Bial Inkhawmpui-ah Zu khap burna dan chungchang khel
Presbyterian Kohhran Kolasib Diakkawn Pastor Bial Inkhawmpui-ah zu khap burna dan MLTP Act Mizorama hman mek chungchang sawiho a ni.
MLTP Act hi enthat ni rawh se tih Kolasib Vengthar Kohhran atanga thulut chu Inrinni khan palaiten an sawiho a, Agenda puluttu lam chuan zu khap burna dan chu miretheiin an tuar a, mi hausa te erawh chuan an tuar ve silo tih sawiin, thil tih tak tak a harsa a, Mizoramah zu a lut tho bawk a, hmun thenkhatah zu chhia a tam phah bawk a, thihna hial te pawh a thlen thin avangin Zoram mipuite tana a tha ber tur ngaihtuaha Zu khap burna dan hman lai chu enthat an rawt a ni.
Hemi chungchang hi zu a taka sawiho a nih hnu-ah inkhawmpui palaite chuan sawrkar khawih thil a nih avangin sawihona chu tawk rihse tiin thutlukna an siam a ni.
Hetihlai hian New Serchhip Pastor Bial Inkhawmpui-ah pawh New Serchhip Kohhran atanga thulut, Grape Wine/Juice chungchanga Synod ngaihdan/pawmdan tihchian ni rawh se, tih chu Presbytery-a ngaihtah turin an pass a ni.
Thulakna: Zothlifim
