Ni 24 February 2011, Ningani : Australian journalist, publisher, Internet activist, US sipai lehkha pawimawh pho chhuaktu, Wikileak website neitu - Julian Assange-a chu August 2010 Stockholm-Sweden hmeichhe khuaikhem thubuai zawhfiahna hmachhawn turin, a mamawhtu Sweden sorkar kuta hlan turin Belmarsh Magistrates' Court-south London chuan thu a titlu.
Sweden sorkar kuta hlan tura London Court thuchhuak hi Julian Assange-a chuan ni 7 chhungin rorelna sang zawka thubuai chhawm (appeal) turin a ngen thei a, Julian Assange-a ukil chuan he hun chhung hian rorelna sang zawkah chhawm luh ngei a nih tur thu a sawi.
Kum 39-a upa Julian Assange-a hi Sweden-a hmeichhe khuaikhem thubuai vangin Sweden chuan manna thu tichhuakin, Interpol-in a awmna apiangah manna thupek a tichhuak a. Ni 7 December 2010 khan US lehkha pawimawh a pho chhuah avanga inven thu-hlaa a bik bona hmun atang chhuakin London Police te kutah a inpe a. Ni 14 December 2010, Thawhlehni-ah London court chuan bail a phalsak a, nimahsela, Sweden lam atanga duhlotuten rorelna sang zawka chhawm (appeal ) an ngen nghal vat avangin rorelna sang zawkah ngaihtuah that leh a niin, ni 16 December 2010, Ningani-ah Julian Assange-a chu £240,000 a bail chhuah a ni.
Wikileak hian April 2010 khan Iraq rama US sipaiten chanchinbu mi leh pawisawi lo mipuite an thah lai video a tichhuak a, July-ah US leh a hruihhruaiten Afghanistan-a an raldo thuhla lehkha pawimawh 76,900 lai a tichhuak bawk a ni. October-ah Iraq rama ralbeih chungchang lehkha pawimawh 400,000 zet a tichhuak leh a, November atang khan US leh ram dang inkar boruak, US-in ram dang a dawr dan boruak, US thuruk lehkha pawimawh a tichhuak leh tan a, hetiang hian Julian Assange-a hian buaina a tawk ta a ni.
US sorkar chuan Julian Assange-a hi vawi tam a hau-in a vau tawh a, US lehkha pawimawh a pho chhuah avang hian mi firfiak ang hiala ngaitu leh thubuai siamsak duhtu pawh US sorkar hotute zingah an awm nual bawk. Chutiang a nih avang chuan, mi tam tak chuan tun tuma Julian Assange-a’n thubuai a neih dan leh man a nih chungchangah hian US sorkar hi a inrawlh ruk ngei an ring. Khawvel sorkar thenkhat chuan hetianga Wikileak-in US lehkha thuruk pawimawh a tihchhuah avang hian, US sorkar chu an dem hle. Wikileak hian engtin nge he’ng zozaia tam US sorkar lehkha pawimawh hi a neih theih? tih hi CIA leh mi thiam dangte ngaihtuah titamtu a ni.
Wikileak-in thuthup a tihchhuah hnuhnun ber atangin thla tam a ral ta. A neitu Julian Assange-a hi Sweden sorkar kuta hlan ngei a nih rin a ni. Sweden-ah a thubuai chinfel a nih hnu-in, U.S. sorkar chuan a lak leh mi tam takin an ring. Tichuan, U.S. chuan thihna khawp hial Julian Assange-a chungah kut a thlak mi tam tak chuan an ring a. Chu chu Julian Assange-a ukil hlauhthawn ber pawh a ni bawk. Nimahsela, khawvel mi thiam leh mihring zalenna humhalh pawl leh zirtu tam tak chuan chutiangin U.S. sorkarin tihtheihna a neih loh thu an sawi.
Sum inhlanchhawnna leh vawn thatna bank pawimawh ber berte kal tlanga inpuihbawmna leh sum-pai veivir velna Wikileak tan kharsak a nih avangin Wikileak-in a duh ang sum a nei ta lo. Kar kalta khan Julian Assange-a’n Wikileak hian kar tin $600,000 vel a hloh thu, Swiss newspaper Tribune de Geneve a hrilh. Sum putchhuah dan erawh tarlan a ni lo.
Wikileak/Julian Assange-a hun tawn mek leh dinhmun hrang hrangte thlirin, Wikileak hi Internet thlanmuala zal mai tur leh thawnthu ngaihnawma chang mai tur niin a lang.
Thu putchhuak ngainatu mi tam tak chuan Wikileak boral hnua a ber rawn hautu tur tunge ni ang? tiin a inrinsiak neuh neuh tan ta. Greenleaks.org hi nge, Open Leak zawk hi Wikileak aiawhtu tur ni ang?
Thulakna: