AIDS Hrik Kai Pung Tual Tual

Mizoram State AIDS Control Society chuan AIDS dona kawnga hna an lo thawh tawhnaah lawmawm an ti a, hma lak chhoh zel tura ruahmanna duante an pawm. Nimin khan Secretariat Conference Hall-ah MSACS Governing Board an inkhawm a, Chairman Pu Lalrinliana Sailo, Health Minister chuan a ho.

He MSACS Goberning Board inkhawmah hian Project Director Dr. Eric Zomawian nikum chhunga hnathawh dan hrang hrangte chipchiar takin report a pe a; kumin 2010-2011 chhunga hna thawh dan dan tur hmachhawp leh sum ruahmante a pharh a. Member ten uluk taka thlirin lawmawm an ti tlang a; hmachhawp atana ruahmanna lo duan tawhte sawihoin an pawm nghal bawk.

Kumin hian National AIDS Control Organisation atangin cheng vaibelchhe 16.38 hmuh a ni a, heta tang hian chak zawka hma lak chhunzawm zel a ni dawn a ni.

Pu Lalrinliana Sailo chuan khawvel leh Mizoram pawhin manganna tawh mek leh run mektu AIDS hi hun kal tawh atang khan nasa taka beihlet a lo ni tawh a. Chutichung chuan min run nasa tulh tulh mai si a, sawrkar leh MSACS te chauhin do rem chi pawh a ni lova, mi zawng zawngin tangruala nasa taka do let hneh loh chuan hnam tan ralna a tling dawn a ni tiin mi zawng zawng tanrual puiah a sawm.

Kumin March thla thleng khan Mizoramah thisen test mi 1,02,974-ah mi 4,381-in HIV hrik an kaia hmuhchhuah a ni a. AIDS natnaa damlo mi 414 awmin mi 168 AIDS vangin an thi tawh a ni. Kumin March thla chhung ringawt khan mipa 78 leh hmeichhia 43 in HIV hrik hmuhchhuah a ni a; heng zinga a tam ber chu mipat hmeichhiatna hman avanga kai an ni.

He inkhawmah hian Mizoram dinhmun uluk takin an thlira, tlakhniam lam aiin HIV kai an pun zel avangin mitin Kohhran leh NGO zawng zawngte a do tura tan la tlang turin an sawm a ni. He Meeting-ah hian Parliamentary Secretary Pu S. Laldingliana pawhin a tel a ni.

Thulakna: Mizo Aw