ZOTAWNG ZIAH LEH THU LEH HLAA CHHIM MITE

13/09/2010 01:19

 

- Henry Lalngurauva

Mizote hian kan tawng hi kan ziak thiam lo hle mai a, a chhan ni bera lang chu kan tawng kan uluk loh vang a ni. Kan tawng hi kan zirlaibu-ah a tel ve tak na a, kan tawng a nih vangin kan chhiar liam puat a. Primary atang tawhin Zotawng hi a ziah dan tur emaw tawng dik leh dik lo zir lo va, Mizo hla emaw mi chanchin emaw essay emaw tein kan zir chho va. Kan tawng ziah zawm tur leh tur loh pawh hre lovin kan ziak ve pawp pawp thin a. Hei hi kan tawng kan thiam theih lohna bul pawh niin a lang.

Chanchinbu leh zirlaibu-ah hian Mizo tawng ziah dik loh a tam thei hle a, chhiar hrehawm khawpa ziah dik loh hmuh tur a tam thei khawp mai. Ziah zawm tur ziah zawm loh te, ziak zawm loh tur lo ziah zawmte a awm thin a. Kawngkama thu ziak tar tam takah te, khawii hmunah emaw hriattirna tarah te hian ziah dik lo hmuh tur a tam  hle mai. Ziah zawm tur lo ziah zawm loh te, ziah zawm loh tur lo ziah zawm te hian, a thu chhiar a tihbuai chang a awm fo thin.

 College kal chinah pawh hian Zotawng thiam lo an tam viauin a rinawm a, a chhan ni bera lang chu a bika Zotawng kan zir loh vang a ni. Chanchinbu leh T.V-a thu ziak tam tak hi han en vang vang ila, ziah dik loh tih hriat ngawih ngawih hi a tam thei hle a. Hei hi a pawi hle mai a, a thawktute hi tlemin an inthlahdah emaw chu aw tih mai tura dik lo, mipuite chhiar tura an lo tarlang thin hi chu a tha teh chiam lo a ni.

 Mipuite chhiar tura tawng thehdarhtute an nih avang hian, tawng chungchangah chuan anni tluka pawimawh an awm lo va, Zotawng tidala tihausa theitute an ni bawk a. An pawimawhna hriain anni pawh hian Zotawng hi zir nasa sela, a dik thei ang bera an hriatin thu ziak chu mipuite hmaah pho lang thin sela a duhawm hle ang. Anni hian tawng uluk lovin, khawlai tawng/ tawng dik lo (corrupt language) ang chi emaw tawng ler (slang) emaw ang chi te hian thu chhuah thin ta ang sela; hriat loh karin kan hmang fur tawh mai ang.

 Ziah lamah mawlh hian tan lak a ngai nasa a, kan thu ziah tam tak zinga a dik lo langsar ber mai chu, ziah zawm tur leh tur loh kan hre ngai lo hi a ni. Zotawng hi khawvel tawng zawng zawng zinga tawng harsa pawl leh hriatthiam har em em mai a ni a, zir chian poh leh kan tawng ropuina hi hmuhchhuah tur a tam ting mai a. Tawngpawng ngama lo ngam ve ringawt chi a ni lo va, thu-mal(word) tam tak hi a inluhkhalh fo thin a, kan tawng liam puata dika kan hriat si, han ziah dawna a eng zawk nge ziah hmasak tur tih hriat loh khawpa dik thei ve ve si, mahse dik miah lo te hi a awm teuh thin.

Kan hriat tur leh kan thu ziaha a zawm tur ni thin chu, thu-mal(word) khat hi zawm a ni tlangpui thin a. Exam-naah kan tawng a nih avangin kan ngai awlsam chawk thin a, mahse kan ziah hian kan tawng liam ang hian kan ziak lem lo tih hriat a tha. Kan zirlaibua tawng hman hi kan zu zir chian a tha khawp mai a, a thawnthu emaw a tum zu hriat ringawt kha a tawk lo tih kan hriat a tha khawp mai.

Chhim lam mipuite kan inchhuan fona ni thin chu, kan tawng hman a dik ber kan tih thin hi a ni awm pakhat e. Mahse, tunah chuan kan nih tawh loh hmel riau mai a, a ziah dik lamah phei chuan kan hniam hle maithei a ni. Aizawl lam saw tawng dik hman tumin tan an la nasa hle mai a, thiam pawh an thiam tawh hle mai. Media lamah te pawh Zotawng dik hman an tum hram hram thin a, chanchinbua an thu ziah pawh chhiar a nuam bik zaih tawh mai.

Pu Thuamluaia’n, “Leitlangpui” a lo tih lamah hian, tan kan lak ve a ngai ta khawp mai. Kan chanchinbu(news paper) leh demand channel-a thu ziak tam tak hi chuan, mit a tikham thin hle mai. Tlemin hei ai hian tan han la sela, a dik thei ang bera tih tum hram hram sela a lawmawm viau ang. Kan inzir duh a nih chuan, M.A.L, Aizawl leh M.B.S.E te hian tawng lama kan hmasawnna tur leh, tawng dik  leh ziah zawm leh zawm loh tur  mai bakah, punctuation thlenga ziah dan tur tia lehkhabu an siam, Mizo tawng ziah dan tur dik bera an siam hi chhiarin zawm ila a tha khawp ang.

Tin, Lunglei lama kan M.A.L Joint Hqt hruaitute hian, hetiang lam hawi hian seminar emaw symposium emaw a tam thei ang ber buatsaih sela a tha khawp ang. Aizawl, Lawngtlai-ah te hian M.A.L chanchinbu chhuah a ni a, keini Lunglei lam hian kan tithei tlat lo mai hi a pawi hle mai a. Kan hmasawnna tur kawng khat leh tan kan lakna tur pakhat ni pawhin a lang a, Aizawl lam emaw atanga chhuak chanchinbu chauh hi a tha ber chuang lo va, he lama chhuak chanchinbute pawh hi a tha tih hriain, kan inngaihhlutsak thiam hi a ngai a ni.

He thu ka han sawina chhan chu, M.A.L Joint Hqrs. President ka hmuh tumin, chanchinbu an chhuah ve leh ve loh ka zawt a. An lo chhuah thin thu leh latu an awm loh avanga an chhunzawm theih loh thu min lo hrilh a, chuvang chuan ka han sawi kai ta duah a ni e. Leitlangpui mawitute: Lalzova, Thuamluaia, Liandala, Nuchhungi, Lalmama, J.Buana, Roliana Ralte, Ellis Saidenga ldt, hmun hlui hi chhawm nungin, kan mi hmasate’n kawng an lo sah en tawhsaah hian kalin, thu leh hla lamah hian tan i la thar leh teh ang u.

Mizo folk ballad-ah pawh hian kan theuneu lo hle mai a, folk ballad hmasa pawl hi chhim lam atanga chhuak a awm fur mai. Serkawn Concert hunlai (1932) bawr velah khan, kan chhim hla phuahtute’n Concert hla atan tiin ballad an lo phuah a. Chhuana’n thiam takin ‘Chhura leh Naa’  Lo inven thleng thawnthu kha hlain a phuah chhuak a; Serkawn Concert hunlai hian, Liandala, Lalmama, Chhuana ldt, hian hla tha tak tak an phuah thin a ni. Chhim chhul chhuak Hrawva, ‘Mizo Poet’  dik tak mai kan nei bawk a. Hrawva hi Siamkima Khawlhring phei chuan, “Father of Mizo poetry” a ti hial a nih kha.

Hruaitu hmasate’n ‘Leitlangpui’ an lo timawi tawh thin a, he an thil tih hi hlamchhiahin a awm mai ang tih a hlauhawm hle mai. Thu leh hlaa ropuina nasa tak kan lo neih tawh leh, mi thiam leh mi bik Zoram-in a theihnghilh leh tawh ngai reng reng loh tur kan lo neih tawhah hian duh tawk mai lovin, an thachhang dawlin an hniakhnung zui tumin tan i la thar leh teh ang u. 

Thulakna: Ralvengtu

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E