ZORO hi eng nge ni?

24/08/2010 17:26

-C.Laitanga

Mizoram Governor chuan ni 9.8.2010 khan Vanapa Hall-ah ZO INPUI, a hawng hluai mai a, mi tam tak chuan hei hi eng nge ni a, engtihna tur nge tih pawh an hriat hmel lohva an ngaihven tehchiam lo bawk. Hriat chian tum lem lo an tam ber awmin ka hria. Hei hi a chhan niawma lang thei pakhat chu, May ni 19-21, 1988 khan ZORO chu People Conference Party khan a tan hluai mai a. An tum leh ngaihtuahna pawh a that viau hmel. |halai hipna atan an ti nge Uniform siamin, thenkhat chuan bel tam fe fe an bel a, a danglam khawp mai.

Mahse Zoram buai kha mipuiin kan lo ning/ kham tawh em em a, chubakah rorelna chang lo thiltih a nih vang pawh a ni ang, mitten an uksak lo hle. Chuvang chu nge a chhan dang a awm, a reh leh ta mai a. Mite thinlung a luah lo hle ni tain ka hria.

Mahse, a thlarau chang tlat leh a tangĀ­kaina tur hmu tlat eng emaw zat an awm a. Chung mite chuan, Political Party rawng kai lova NGO pangngaia kalpui tha zawka hriain NGO-in 1990 khan tha tharin an tan leh a. Chu pawh chuan mimir ngaihven a hlawh har hle. Mahse, hmuchiangtute chuan an tuipui reng a, an zir zel bawk a. Kum 1992 daih tawh khan British sorkar min thendarhtu hnenah, min dahkhawm lehna turin Memorandum thui fe an lo thehlut tawh a ni. An President Pu R.Thangmawia chuan Zo Reunification kalkawng hi a zir nasa a, Mizo tawng leh Sap tawng pawhin thui fe a sawi thei a. Kawng laka thiantha a hmuhte chu chelh dingin an tui leh tui loh ngaihtuah miah lovin tam tham tak a hrilh hman zel. Political Party Office-ahte leh remchang apiangah ngaihthlak peih loh khawpin a sawi thin.

Engtinnge Zo Reunification chu a lo awm theih ang? tih an chhanna ber chu, Atlantic Charter 1941-ah khan Indonaa puitu Colony zawng zawng chuan a chak lam an nih chuan mahni ro in relna pek an ni ang, tih kha a ni a. Mizo pawh kha British India a awm kan ni lova, a hran ngatin kan dopui tur kan puang a. Rights kan nei ve a ni tih te, Chin-Lushai Conference January 27-29, 1892, Fort William, Calcutta te kha an ni. Kha tah khan Chin-Lushai Hills pumpui chu a theih anga hmaah rorelna pakhat hnuaia dah tura rel a ni. Chumi tihpuitlin loha awm reng chu tihpuitling tura beih zelte leh a dang dang an ni.

Chutih chhungin UNO pawhin Decolonisationte puangin ram tam takin zalenna hmu mahse, hnam tenau zawk neksawr leh rahbeha awm tam tak an la awm a ni tih a hmuchhuak zel bawk a. UN Comission on Human Rights hnuaiah UN Working Group on Indigenous Population a siam a. Chutah chuan UNO a aiawh tir ve lote ram zawng zawng kalkhawm theihna karkhat awh zet khawmpui a lo siam ta a. He inkhawmpui-ah hian ZORO pawh 1999 atang chuan a lo tel ve ta thin a ni. Tichuan ZORO hmalaknain Zohnahthlak pawh chu World Indigenous Group-ah telh ve a lo ni ta a, inkhawmpui palai atan koh an lo ni ta zel a ni. President ber pawh chu ka Vakul chang min chhuhsakin UN lamtualah chuan a zukin thiatbuk ve thin a nih awm chu. Tunah hian UN palai-ah hian vawi 17 zet an kal tawh a, nula 3 tiamin mi 16 lai an kal tawh a ni. Pu K.Hawla Sailo phei chu a tlangnel bawk a, amahin Mizo puan Exhibitionte a zuk siam vel a nih kha.

Tichuan, UN Declaration on the Rights of Indigenous People, 13th Sept., 2007-ah pawh khan Zofate chu telh kan lo ni ve ta. |henkhat nupuite bula tapchhak lum kan belh mai mai lai hian Pasalthate chu thui fe fe-ah an lo ramchhuak a nih awm hi. Hetiang a lo nih chuan kan duh dan ni lova awpdarh kan nihna hi siam rem hun pawh la awm thei turah ngaiin Political Party zawng zawng pawhin aiawh ZORO-ah hian an tir ve ta. Zo INPUI hawn ni kha World Indigenous Day a ni a, UN Secretary General pawhin ZORO chu message a rawn thawn ve vang vang mai.

ZO INPUI hi in tak tak ni lovin Zo hnahthlak zawng zawng Head Quarters, tihna a ni hrih a, In tak tak sak theih hun pawh a la awm beisei a ni. ZO INPUI hawn nia Governor thusawi pawh a ropui hle mai, a chhiar duh tan ZORO Office-ah a copy lam theihin a awm. Tichuan ZORO hi tuman hmu Sakhi lovin tawiawm theuh zawk ila, INPUI hawnna senso atan sum leh pai thawhtu zawng zawng chungah lawmthu tam tak sawi a ni a, a bul tantu zinga mi pawimawhah ngaih vek an ni. Chuan, ZORO chu Zo Reunification Organisation, tihna a ni a, Political Party ni lovin NGO pakhat a ni.

 

Thulakna: Vanglaini

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E