Zofate leh Zirna Khawvel

16/11/2010 03:18
- Dr.Than Bil Luai

Zirna chuan hriatna a pe a, hriatna chuan finna a thlen thin. Chu finna chuan hriat lehzualna a thlen a, chu hriat belhchhahna chuan finna a belhchhah zel thin. Zirna chuan finna a pawh phak loh chuan a tangkai lo chauh nilovin a lo hnawksak thei hial a ni. Zirna atanga lo rah chhuak finna chuan kan ni tin nunah kawngro a neiin a tangkai thei tur a ni a. Chuti a nih loh chuan kan chhar chhuah finna kha a thlawn mai a lo ni thei ang. Chuti a nih si chuan, kan zir hma hauh atangin, eng lam hawia finna nge ka duh? tih thlan hmasak a ngai ang a, chuti chuan mahni zir tur a lo lang mai ang.

Enge ka zir ang?

Enge ka zir ang?” tih zawhna chhang thei tur hian school naupangte kaihhruai an ngai a. In lamah, nu leh pate pawhin duh thlan theihna pek a ngai bawk. Nu le pa leh fate chu inhmuh khawm thin a, mahni vei zawng leh duh zawngte sawiho thin a tha. Chuti chuan naupangte rilru chu a lo lang chhuak a, an duh thilte hriat a ni thin. An zir tur an hriat nan, nu leh paten tanpui an ngai fo thin a. Nu leh paten, mahni puala a nachang kan hriat loh pawhin kan pastor te emaw, kan kohhrana zirna lam ngaihsak mi emaw, rawna anmahni ngei sawma mahni fate nen inhmuhtir emaw a tangkai hle ang.

Khawih danglamtu a tul:

Kristianna atanga kan sawi chuan piantharna nen angkhat a ni. Mahni zir duh zawng thlang ngawt mah ila, rilru khawih danglamtu a la awm tak tak hma chu taimak chhuah a harsa hle thin.

James Watt-a chuan ketli-a tui chhuan so chu a hmu fo thin a. Mahse, ni khat chu ketli chhin che che mai chuan a rilru a tidanglam thut a. Tui tha hmanga thil siam chhuah theih chi awmin a ring tlat a. Chu mi hawi zawnga a zir avangin tui khu hmangin engine (steam engine) ropui tak tak a lo siam chhuah theih phah ta a ni. Isaac Newton-a pawh hian a huan chhunga apple rah chu a ei fo thin a, a kung atanga tla pawh a hmu fo thin ngei ang. Mahse, ni khat chu, apple daih hlima a thut laiin apple rah pakhat a lo tla nawlh mai a. Chu chuan a rilru a khawih danglam a, zawhna a siam a, “Engvangnge van boruaka tla lova, leia a lo tlak tlat? ” tiin. Chu zawhna chu chhan tumin a zir ngat ngat mai a, “The law of gravity ” a lo hmu chhuak ta a ni.

Zir dan chi hnih:

Chi khat chu zirtirtu neia zir a ni. Zirtirtu tha an pawimawhzia chu sawi tam a ngai awm love. Zirtir dan thiam lo chuan a irawma khat a hriatna chu a pe chhuak thiam lova, zirtir dan thiam erawh chuan ama hriat bak pawh zir chhunzawm thei zel turin kawng a kawhhmuh thei a ni. Zirtirtu neia zir hian hriatna a tipung chakin hriatthiamna mi a neihtir thuai thin.

A chi hnihna chu mahnia inzir a ni. Zir duhna leh hriat chaknain hma a hruai a, zirtu chuan a zir theihna hmun azawngin a bei nasa thin. Ama tawnhriat atangin nasa takin a zir chho va, chu chuan thiamna leh finna nasa tak a hring chhuak thin.

Zirtirtu thiam ber pawh hian “Zir duhna ” nei lo thinlungah engmah a tuh nung thei lova, thiam turin a zirtir thei bawk hek lo. Chuvangin, zirnaah chuan a zirtu hi a pawimawh ber chu a ni.

Thlarau leh tih tak zetin:

Finna khawp hial hmu thei tur chuan thlarau leh titak zeta zir a tul. Tih tak zeta zirtu chuan finna a dawng ang a, run dala zir chuan famkim lo taka hriatna chauh leh degree certificate chauh a chang ang. Thlarau leh tih tak zet tih hian rilru sakhat tak leh mahni tum ram thleng ngei tura zir hi a phut a ni. Isaac Newton-a chuan a thil zirlai tak tak  chuan, artui chhum aiah a sana a chhum hmiah mai a, Edison-a pawhin a nupui neih zan a hai hial e, an ti.

Zirlai hun chhung reng rengah hian mahni dinhmun thlir let fo a tul a. A enga pawh lo zir ta ila, thiam tak tak tur chuan tih tak meuh a ngai a ni. Lehkha bu pakhat chhiar chhuak lova B.A., B.Sc. degree nei thei nih kan inlawmpui chhung chuan “Zirna ” chu finna neih nana hman kan tum lohzia a tilang zel ang. B.A. val chuan B.A. valte hriat tur chin a hre ve ngei tur a ni. Mi tam takin zirtirtu leh zirna school tlin lohna an mawhpuh thin. Mahse, anmahni an pawimawh ber a ni tih an theihnghilh fo.

Zirtu chuan “class ” a pelh tur a ni lova, a lehkha bu duh zawng chu a zawng fat fat tur a ni. Library ami hawh a tum ang a, a awm loh chuan a zirtirtu hnen ami hawh a dil ngam tur a ni. A nih loh vek leh library dang ami emaw, hmun dang atangin emaw hmuh a tum tur a ni. An zirlai bu emaw, an zirlai nena inkungkaih lehkha bu (reference) chu a hun neih apiangin a chhiar ang a, note a la ang a, a chhiar nawn leh fo tur a ni. A hriat thiam loh lai chu a zirtirtu a zawt ang a, a thiam te nen an sawiho ang a, a hriatna kha a tipungin a tinghet sauh sauh tur a ni.

Thangchhuah puan ang ni lovin:

Zirna rah chu thangchhuah puan anga hmang lovin hnathawh kawrah kan hmang zawk tur a ni. Zirlai tam tak leh nu leh pa tak tak chuan hming zawna B.A., M.A., B.Sc., M.Sc., M.B.B.S., B.D.S..etc.. tih awm hi an duh tawk hle thin. He rilru hian thatchhiatna nasa takin a hring a. Hriat leh thiam tumna aiin exam pass tumna a tilian a. Chu chuan exam dan nena inkalh tak mai, exam-na room chhunga copy leh entawn tumna a hring thin. Enthla chung leh copy chunga exam pass-te chuan an dam chhungin an theihnghilh tawh ngai lova. An degree kha an sual chhuah ni lovin, dan lo anga an hmuh tih an hre reng a. An thiam lohzia leh an tlin lohzia pawh an hre reng thin. Chu rilru chuan a dam chhungin hremhmunah a tantir ang a, a hnathawhah hmuingilna neih a tiharsa thei thin ang.

Zirna rah chu hnathawh kawra hmangtu erawh chuan a degree aiin a hriatna leh finna chu a ngaisang a, a ni tin hnathawh puibawmtu atan a hmang a. A rilru-ah thiam loh inchantirna reng awm lovin, a hmuingil thei ang.

Chuvangin, zirlaite chuan an inngaihtuah chian a ngai hle. Zirna rah chu thangchhuah puana hmangtu ni lovin, hnathawh kawra hmangtu nih tum theih a tha ang.

Zofate kawtchhuah chu zirna:

Tun leh tunah mai chuan sum leh pai tak tak te, company lian pui pui te, thu neihna sang tak takte chu kan ta a ni thei dawn lo. Beiseiin ti vak mah ila beidawnna-in mi a nangching mai ang. Kan kawtchhuah pawimawh ber chu zirna hi a ni.

Mahni zir theuhvah “a ber ” hauh tum tlat ila. Mahni hnathawh theuhvah “a ber ” nih tum theuh ila. Physics kan zir chuan Physicist nih tum ran ila, English kan zir chuan, English language expert nih tum ranin zir ila, puan thui zir kan nih chuan  a thui that bakah puanthui thiam entawn tlak nih tum tlat ila, zirtirtu kan nih chuan school naupang ngainatzawng leh an rilru ngaihtuahna hruai ding theitu nih tum ila.

Chutianga kan zir tak tak chuan sum leh pai te, company lian pui puite leh thu neihna hial pawh kan ta a la ni ngei dawn si a.

(He thu hi 2002 Zawlkin Huiva Magazine-a Dr.Than Bil Luai ziak "Zofate leh Zirna Khawvel" tih chu tlem paih then a, tarlan a ni. Editor of Zotui Thiang )

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E