ZIRLAI TLANGAU TOBUL

13/07/2010 22:53

- Dr.Sangkhama

Zirlai Tlangau magazine hi kum 35-a upa a lo ni ta reng mai a.A tichhuaktute zinga mi kan nih ve avangin a lo chhuah dan bulbal deuha han sawi thain ka ring a.Atir atang rengin High School levela chhuah a ni lo hrim hrim a.Kum 1965 hma lam khan Burma Mizo zingah University zirna skul sanga lut an awm nual a.Mahse a huho deuha kan luh ve tak tak chin chu he mi kum hnu lam hi a ni.Matric exam chhanna hmuna zir leh kan line hmun dana thuin Rangoon (Yangon) University leh Mandalay University-ah kan lut tam ber a.

Revolving Fun Committee : Rangoon University-ah Mizo tih tham deuh kan kai ve tak avangin zirlaite zingah chhiat ni that nia intanpui dan tur kan ngaihtuah a.Committee din thain kan hria a.Kum 1972 November ni 18 khan ka din a.A hmingah “ Rangoon University Lushai Students Revolving Fund Committee” kan vuah a.A hnuaia mi ang hian a tawlreltute kan inthlang a.

Office Bearers:

1.      Chairman ............ Sangkhama B.D.S. (final)

2.     Vice Chairman ... Lalbiakliana B.Ed. (3rd year)

3.     Secretary .............Chalhauvela B.A. (Phil. Final)

4.     Assistant Secry.... V.L.Siama B.A. (Grog. 3rd year)

5.     Treasurer ............ Rualchhingi (Chem. 3rd year)

6.     Financial Secetary... Sgt/clerk Khawdina B.A. (1st year)

7.     Auditor .................. Andrew Chhuanga (B.E. 1st year)

Committee members:

1.      Rev.Chhunvela B.Th (3rd year)

2.    Lalthula B.Th (1st year)

3.    Sangvunga B.T.S. (2nd year)

4.    Singliani B.V.S. (1st year)

Revolving Fun dan siamtute atan

1.      Sangkhama

2.    Chalhauvela

3.    V.L.Siama

He Committee hian Fund a zawng a.Kan la thalaiin tumna sang nei vek kan nih avangin kan thil tih apiang kan phur tlang hle a ni.Sum pawh chutih lai dinhmunah chuan tha hnem tawk tak kan hmu a.Kan din chhan tak chhiat ni leh that nia intanpuina pawh kan nei thei zel a.Zirlaite inpumkhatna leh thawhho duhna rilru chak tak kan nei lian deuh deuh bawk a ni.

Kum 1973 khan Insein, Karen veng maurap in luah hawhin kan awm a.Rev.Chhunvela te nen in innghel rialin kan awm a.Tuk khat chu University Mizo zirlai hmingin ‘Zirlai Puitu’ magazine chhuah a tha ang tih hi ka rilruah a lo chhuak hlawl mai a.Literature mi ka kawmthlangpa Pu Vela chu ka rawn a.Zirlaite leh literature lama kan mi thiamte chu kan inko khawm a.Magazine chhuah chu tha kan titlang a.Chutih laia kan mi lian kan ngam tlak leh min tuipuitu ber pakhat Captain Zaithuama in (AFPEL Quarter) chu kan innghahna ber a ni thin.

Magazine chungchang ngaihtuaha kan thut hmasak ber tum hian kan chanchin bu hming atan eng nge ni ang tih kan ngiahtuah a.Kei chuan “Zirlai Puitu” ka rawt a.Mi dang pawhin an rawn rawt a.Rev.Lalsawithanga’n “Zirlai Tlangau” tih a rawt bawk a.Vote kan la ta a. “Zirlai Tlangau” chuan vote a hmuh tam ber avangin chu chu a hming atan kan nemnghet ta a ni.Chanchin bu viltu bik atan hetiang hian kan inthlang a.

Editor ....................... Sangkhama

Asst. Editor .............. Biakliana

Business manager ... Chalhauvela

ZIRLAI TLANGAU ” chhuah tan kum 1973 First Issue-ah chuan thu ziak (Articles) tha tak tak lawr khawmin bul kan tan a.Chuta kan thu ziak lar deuh te chu : Zirna A Pawimawh – Rev.Chhunvela ziak te, Burma Mizo Zirlaite Chanchin – Rev.Lalsawithanga ziak te, Universe – Lalchhuanga ziak te, Rangoon University Lo Pian Dan – Sangkhama ziak te, Mi Fing – Pu Lianthuama ziak te, Leilung leh Mihring – V.L.siama ziak te leh Insein Bible School (tuna MIT) Chanchin – Rev.K.T.Vuta ziak te an ni a.Ka magazine thu ziak zawng zawng chhutu ber chu Rev.Chhunvela hi a ni.Rangoon University Mizo zirlaite chu kan zir lai kan zawh chuan kum 2-3 bak awm lovin a tam zawk chuan mahni hmun kan pan zo leh a.Kan magazine erawh chu vanneihthlak takin Mandalay University Mizo zirlaiten an chhuah chhunzawm ta zel a.Magazine bu hmelhmang pawh a tha sawtin literature lamah kan mite intuai hriamna tha tak a lo ni ta zel a.Hun a lo inhel zela Mandalay-ah chanchinbu vil zel tur mi an tlem telh telh a.A buaipuitu berte an awm tak loh avangin magazine pawh vui liam ve mai hlauhawm tak a nih laiin Kalay University-ah Mizo zirlai zingah chanchin bu chu tinung thei tur an lo awm leh ta a.A bu pian hmang pawh Computer hun a nih angin a changkangin a dak ta zaih mai! Mizo tawng magazine dam rei pawl tak a ni ta hial a.Thangthar Mizo zirlai mi thiamte kut-ah lo vul zel se tiin duhsakna sang ber kan hlan a.Pearl emaw Golden Jubilee hial pawh dam thleng teh se.

( He thu kum 2008-a ziak, Zotui Thiang’s File – Unpublished atanga lak chhuah a ni. Zirlaite chanchin / Zirlai Tlangau chanchin / Chanchin hrim hrim chhui duhte an rawn chhuah huna puitu tur atan kan rawn tarchhuak a ni e. A ziaktu Dr.Sangkhama hi Kabaw phaikuam lam Tamu khuaa khawsa mek niin, Mizo zinga B.D.S. hmasa ber a ni. – Ed.)

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E