Zimbabwe leh A Ram Pawisa
Africa khawmual chhim lam ram Zimbabwe hian kum 1980 atang khan Zimbabwean dollar (Z$) an hmang tan a, an hman tirh chuan khawvel pawisa zingah a sang ber pawl a ni. Hun a liam hreta Zimbabwe chu harsatna hrang hrangin a tlak buak a, ram chhung thil siamchhuah leh lakluh inmil loh vang te, inawp dan mumal tawk loh vang te, mi thiam tlakchham vangte-in a tlachhe deuh deuh a. Sum hlutna a hniam tial tial a, pawisa tlang a chhuak thar zel a, a hnu lamah phei chuan one hundred trillion Zimbabwe dollar (100 hnungah bial 12-in a zui = 100 000 000 000 000) hial a lo chhuak ta a ni. Z$ 100 000 000 000 000 chu US dollar 4 vel nen a hlut dan a inang!
Sum hlutna tla hniam lutuk avanga mipui harsatna chu an tuar zo ta ngang lo, April ni 12,2009 a lo herchhuah meuh chuan Zimbabwe chuan a ram pawisa Zimbabwean dollar (Z$) chu bansanin, South African Rand, Botswana Pula, Pound Sterling, Euro leh United States Dollar te an hman pawlh kual vel ta a ni. A hnu deuhah, US dollar chu tha ber leh tlo ber nia hriain, US dollar chu an ram pawisa angin an hmang a, vawiin thlengin Zimbabwe-ah US dollar hman chhunzawm a la ni.
Zimbabwe-ah hian cheng khat ($1) aia nawi pawisa a awm lo. Siki/duli(cent/ coin) a awm ve lo. Chuvangin, 50 cent man chanchinbu i leiin cheng khat i pek ngei a ngai a, 50 cent dawn kir erawh beisei duh suh. Chhinchhiahna nei lehkha phek an pe ang che a, ni dangah chu lehkha phek chuan chanchinbu i lei leh mai dawn nia.
Dawr changkang deuhah thil $5.21 man i lei chuan, pawisa pekna hmunah $6 tling turin 79 cents man chithlum an pe mai ang che.
Eiin dawrah pizza emaw, burger emaw, eiin dang emaw i leiin, rawng chei lehkha phek an kir ang che. Chu lehkha phek chu ni tam ral hma-in i hmang ral leh vat dawn nia. Chuti a nih loh chuan, chu lehkha pheka rawng chu a reh thuai ang a, i pawisa ipah lehkha phek pangngai mai zep i ni ang.
Khawi lo kalnaah bus i chuanin, fimkhur hle la, pawisa nawi dawn tur i neih chuan, lehkha phek emaw tal dawn tum ang che. Bus driver-ten mi tin hnenah cheng nawi kir lovin, mi pahnih/pathum hnenah cheng khat chu insem turin an pe mai thin a, an buai fo!
Hetianga Zimbabwe-a siki leh duli a awm loh avang hian thil zuartuten an thil man chu cheng bi kim turin an tisang mai zel a, thil man a to hle. Dawr lian leh changkangah phei chuan arsa pum khat (ar puah-sa) hi $10 a ni teu mai!
Thulakna: CNN, Wikipedia, Money Zoo, Yay Feeds
