YMA leh Hnam Inpumkhatna

24/08/2010 02:01

- Lianzuala

Mizote hi khawi atanga lo kal nge, tute nge an nih, an thlahtu bul chhui a sawi fiah vek hi thil harsa tak niin a lang a. Amaherawhchu, sawi loh thei loh chin kan thupui atang hian a awm dawn a, tlem azawng lo tarlang ila. Kum 1700 bawr vêl khan Mizo thlang tla hmasate chuan tuna Bangladesh-ah hian Bengali te nen lo intawngin hnam mäwl,  ruak keng kung ‘KUKI’ tiin hming an lo vuah a, chu chu chhawmin Saphovin Kuki an ni e an lo ti ve bawk a. Saphovin min han hriat chian deuh chuan, anni chuan LUSHAI an inti tiin an lo ziak a. Mizote hi tawng thüah chuan khawvel tawng an thliar danah Tibeto-Burman tawng hmang tih kan ni a, hei hi a dik ngei pawhin a lang. A chhan chu Tibet tlangval pahnih nen kan inkawmnaah an number chhiar dan ka zâwt a, a inang nual tlat a ni. Heng hnam BODO, TANGKHUL (NAGA), MEITEI te nen pawh hian kan number chhiar dan leh thu mal tam tak a inang a ni.

Mizotena Mizo hnahthlâk kan tih kan unaute erawh hi chu Mizo hnamah kan rin lût tlangpui a, anmahni lam inngaih dan erawh thu hran ni se. Tun hmaa kan hman thin tawngkam MIZO HNAHTHLAK tih hi tunlai hian kan hnam unauten an ngaihdan leh hrilhfiah dan a dang ta deuh va. Hnahthlak tih hi hnuaichhiahna tawngkam leh Mizo ni ve chiah lo sawina lam hawi zawngin ngaihdan an nei a, hei hi hriat sual palh ni theiin ka hria. Mizo hnahthlak kan tih hian Mizo kungpuia bet ve lo, a sira lo bet ve anga ngaihna hi thil ni thei niin a lang lo. Thingkungah hian a hnah chawr thar leh a hnah hluite hi thingkung pakhata bet tlang vek an ni, tha bik leh tha lo bik a awm hek lo va, thingkung pakhata hnah awmte chu an that dan leh hlut dan a inang vek a ni. Mizo hnahthlak kan tih hian Mizo hnama chi peng hrang hrangte a huam mai zâwk a ni.

Mizoram chhunga Mizo kan tihte zingah hian chi peng tinreng kan awm a, chung zingah chuan chi tha bik leh ropui bik a awm chuang hek lo. Mizo tihah hian lungawi takin kan awm tlang mai zâwk a ni. Mizo tawng kan hman mek hi a tir lamah chuan Duhlian tawng tih thin a ni a, chumi hnuah Lusei tawng tih a ni leh a, Lushei tih hian min huam zo tâwk lo ve tiin Mizo tawng tia thlâk leh a ni. Chuvang chuan  June ni 15, 1935-a dinYoung Lushai Association  pawh kha  October ni 7, 1947-ah Young Mizo Association tia thlâk a lo ni ta a ni. Hemi chungchang hi YMA History bung 5-naah chiang takin tarlan a ni. Tun hma chuan Mizoram chu Lushai Hills tih a ni a, a chhunga chengte pawh mahni chi bik sawi lovin Lushei/Lushai kan inti mai a, sipaia tangte pawh an hming tawpah Lushai an ti mai thin. Ngaihdan hrang hrang rawn piang chhuak lehin a huap zau thei ang ber tura ngaiin Chhinlung chhuak zawng zawng huap hnam hming ni ngeia hriat ‘MIZO’ tih hi Mizo mipuite chuan an lo invuah ta a ni. Mizo chi peng tam takin mahni pual tawng kan nei nual a, kan tawng (dialect) te chu ngun taka inngaihthlâk tawn chuan kan inhre pawh thei vek a ni. Mizo Upa Tawng kan tih leh hla thua kan hman tam tak, ni tin tawnga kan hman lem lohte hi kan hnam unau thenkhat chuan tuna an la hman mekah hian a tel bawk a ni. Tawng hian hnam a hril tel a, chuvang chuan kan hnam unauten Mizo hnam-a tel ve lova inhriatna an neihna chhan a ni thei bawk. Hnam inunauna chungchang hi Central YMA-ah ngun taka  ngaihtuah a ni tawh a, tawng chungchang thupuia hmangin Champhai General Conference-ah paper te buatsaiha ngaihthlâk a ni tawh bawk. Kan hnam unaute Chapchar Kûta lo kal thinte nen sawi hovin an ngaihdante hriat a nih hnûah Mizo hnahthlâk/hnam peng hrang hrangte tawngte chu Mizo tawng vek a ni tih Central YMA chuan a pawm a. Hei hian awmna hrang leh kar hla unaute nen nasa takin min pawt hnai ta a ni. Kan inkar zau tak thin kha tunah chuan thinlung inpawh leh unauna inpawm tawnin inhriatthiamna thûk zâwk kan lo nei thei ta hi kan zavai a thawh rah a ni.

YMA Dan Bu bung 3-naah chuan member nih dan tarlan a ni a. Chang sawm pasariha kan hmuh angin  member ni theite chu Mizo tu pawh, tleirawl/rawlthar chin chung lam chu, YMA thil tum leh din chhan te, a thuvawn te, a thuthlung leh a kaihruainate anga awm inhuam apiangte tih a ni a. Tin YMA Dan Bu vek bung 1-na chang 7-ah YMA rawng leh flag chungchang kan hmu leh a, YMA flag-a a var hian Pawl thianghlim leh mi tin huap zo a ni tih a entir a ti bawk a. YMA History 1935-1995 kan thlir chuan YMA chu Mizo hnam tana din a ni tih chiang takin kan hmu a. Mizo hnam inpumkhat-na chungchang pawh hi thui taka kalpuiin hna pawh a thawk nasa ngiang a ni. Kum 1935-a YLA din a nih khan chanchinbu atangin miten an lo hria a, lo din ve rawh u tih ngai lovin hlim leh lawm takin an lo din ve zel a, thingtlang khua hla fe feah pawh Jubilee leh Conference hmanga  kan kal changte hian a din tirh kum hnaivai taka an lo din ve a ni tih kan lo hriatin mak tih chang pawh kan ngah hle a ni.

Tunah chuan Nagaland, Assam, Meghalaya, Manipur, Cachar, Tripura-ah te Branch a awm vek tawh a, Bangladesh (Foreign)-ah pawh YMA a ding tawh a ni. Myanmmar-ah chuan YMA hi din theih ni lo mah se, a tlukpui pawl siam tho a ni a, chung hote nen pawh chuan inpawhna tha tak kan nei a ni. Tun hnai maiah khan Lumding, Assam state-ah chuan kan hruaituten branch thar an hawng nghe nghe a ni. YMA hian Mizo hnam inpumkhatna atan hian eng vanga thawk thin nge a ni tih zawhna lianpui a awm thei. A chhan chu YMA History phek 29-naah Hnam Rilru tih thupui kan hmu a, he hnam rilru hi Indopui II-na khan a tizual niin a lang a, indo hma pawha an neih sa a ni tih kan hmu bawk a ni. Tichuan hnam rilru chawk chhuaka khalh dik thei tur hla chu kum 1947 khan an inphuahsiak a, tah chuan Pu Rokunga Hla, Ro min relsak ang che tih chu Hnam Hlaah pawm a lo ni ta a ni. Tin, kum 1997 East Lungdar General Conference-ah Ram leh hnam humhalh tih thupui atan thlan a ni bawk a, hei hian nasa takin hnam rilru min puttirin hnam inpumkhatna thinlung min pe nasa hle a ni. Mizoram chhunga Mizote mai ni lovin ram pawna kan unaute thinlung nasa takin a chawk tho bawk. Mizo hnam inpumkhatna tura YMA-in a hma lakna thenkhat tarlang ila:

1)    MANIPUR
GANGTE
Hun rei tawh tak atang khan Gangte National Organisation (GNO) te chuan khawi atanga lo kal nge an nih a, tute nge an nih a, tute nge an thlahtute tih an lo chhui tawh thin a. Kuki hminga phuar khâwm zinga tel thin kha tal chhuakin GNO pawh dina anmahni chungchang nasa taka lo ngaihtuah thin an ni a, tuilairapa mahni nihna dik tak hre lova awm kha hrehawm an ti a. An theih ang tâwka an inchhui hnûah Mizoram leh Mizo hnam chu an bul ni ta berin an hria. An thalai Gangte Youth Association (GYA) hruaitute leh an Lalte chu anmahni buaipuitu leh kawng kawhhmuhtu ber Evan Zonunsanga hruainain Mizoramah an rawn kal ta a. Mizoram sorkar hruaitu leh NGO hrang hrangte an rawn kawm kual a, ngun taka an ngaihtuah hnûin YMA chu Ram leh Hnam Humhalh kumpuan neitu an lo ni bawk nen, Central YMA hruaitute hnenah Mizo hnama inhre chiang tharin rawn luh an ngen ta a. CEC-in thil danglam tak a nih avangin ngun taka a ngaihtuah hnûah a thuphunga pawm chungin zir chian ni se a ti a. Manipur-ah palai 2 a tir ta a. Imphal-a Mizo officer liante leh YMA rawn chung zelin Churachandpur an han thleng a. Imphal-a thurawn an hmuh angin dawr leh kil hrang hrang atanga Gangte mipuite ngaihdan lâk a ni a. Manipur Group YMA Executive Committee Member te nen fimkhur tak chungin ngaihtuah ho a ni bawk a. Palai 2 te chuan an thil han hmuh dante ziakin Central YMA-ah an thlen hnuin CEC chuan Gangte unaute chu lawmluh a lo remti ta a ni.

Lawmluhna inkhâwm hi kum 1998 khan Churachandpur-ah hman a ni a, Pu Tawnluia,  Hon’ble Home Minister-in a lawm lut a. Gangte thalai rualin zir chawp leh thiam vak lo chunga Mizo kan ni, kan lawm e tih hla Pu Rokunga Vaiphei phuah an han sa mai chu kan hnuk a ulhin kan mittui a tla nasa kher mai. Lawm avanga mittui tla chu dangdai tak a ni. An sak thiam loh dan kha thiam kan ti kher mai. YMA-ah hian khatiang tluka hlimna nasa kha tawng leh tak ang i maw(?). Manipur Media te erawh chuan an helh hle mai, hlauh rûk an nei ni pawhin a lang. Manipur ram sah hêk an hlau niin kan ring a; mahse, chutiang lam chu YMA-in a tum a ni lo. YMA chuan inunauna leh rilru lama inpumkhat hi a tum a ni zâwk. Imphal-a zawhna kan dawn chu, “YMA hian Politics a khawih ta em ni?,” tiin min zâwt a, “YMA chuan Party Politics a khawih ve lo va, hnam politics erawh chu a khawih tel cháng a awm thin,” tiin kan chhang. Central YMA-a kan hruaituten cham fual turin CEC 3 an ruat a, chungte chu Pu Lianzuala, Pu P.C. Lalzuiliana leh Pu Kapzauva te an ni. Chiengkawn Branch YMA chu Pu Lianzuala, CEC-in a hawng ta a ni. Kan unaute hi YMA-a an rawn luh hnû hian an fel ta duak bik hauh lo va, YMA vangin tihduhdah te pawh an tuar a ni. Kutthlâk leh YMA Name Plate tarte an vuak thlâksak a. Helho atangin chhiah rit tak an rawn tuk bawk a ni. An harsatnaah Central YMA-in a thlahthlam ngai lo va, Manipur Group YMA-in theihtawp-in an thlavang an hauh bawk thin. Mizo tawng thiam an châk êm êm a, tawng an thiam theihna turin hma kan lâkpui zel a la ngai hle a ni.


HMAR
Hmar unaute hi Manipur,  Cachar leh North Cachar Hills-ah te an awm a. Ram leh hnam humhalh kumpuana kan neih atang khan Chapchar Kût hmang tura kan sawm thinte zingah an tel a, an lo kalna senso sorkarin tumin lo buaipui leh enkawl hna YMA ten kan tum thin a ni. Chapchar Kût hmanga an rawn kal thin lai hian kan inkar chung-chang te khunkhan takin sawi ho a ni thin a, an vuivaina te pawh thinlung taka dawngsawngin inunauna chungchangte sawi ho a ni thin a, chung atang chuan mi hrang kan nih lohzia te leh thinglung taka inpawhna atangin Joint Conference neih ni se tih kan remti a. Rengkai, Churachandpur Hmar Khawpuiah Joint Conference chu kum 2003-ah ropui taka hman ho a ni a, Lunglei Sub-Headquarters Zaipawl/Central YMA Zaipawl leh Mizo Artist Lalrindiki Khiangte (Daduhi)  leh Elizabeth Zodinpuii te nen hman a ni a. Hla hrang hrang bâkah Insuihkhawm leh zai i rel ang tih hla chu an lawm bik hle a ni. Zanah mipui sang rualten hlim taka Joint Conference kan hman lain van lam hawi zawnga puakrang rawn hmet puakte pawh an awm a, thikthu avang emaw, Hmar unaute nena kan inzawm khâwm hlau-thawng  emawte pawh an ni mai thei. Pu Vanlalzawma MP (Lok Sabha) leh Pu Lianzuala, President CYMA te Chief Guest an ni a. Kan artist ten Inzawmkhawm in duh em? tia thalai pung khâwm an zawh chuan, ring leh rual taka auvin Duh e tiin an chhang a ni. Joint Conference hman hnûin Hmar Inpui leh HYA tangkawpin Hnam Rorel an ko va, chutah chuan Kohhran, Pawl hrang hrang,  NGO hruaitute leh Hmar Intellectual Person zawng zawngte nen rorel a ni a. Tel ve tura sawm kan nih angin kan tel ve a, anmahni lam Chairman turah kan ngaih laiin, CYMA President Chairman tura tih a ni ta tlat mai a, a chhan leh vang pawh hrethiam chuang lovin Chairman hna chu a kengkawh ve ta tawp mai a ni. Chu chuan thil dang engmah entirin a lang thei lo, inpumkhat an duhzia an lantir theihna ber niah kan ngai ta mai a, chu rorelna hriat reng tlâk tak mai chuan kan inpumkhatna tur thu a thlung ta ut mai a ni. A bik takin Mizoram chhunga Mizo te leh kan ram hruaitu zawng zawngte bâkah Central YMA hruaitu te hian Hmar unaute nena inpumkhatna hi kan tihpuitlin mâkmawh a ni. Hetianga thu pawimawh tawp kan kalsan tawh si, Mizo mipuite hmaa tarlang leh thei tura hun remchang ka nei hi ka lawm tak meuh a ni. Kan inpumkhatna tur hi tihpuitlin a nih loh chuan YMA te hian mawh kan phur thui khawp ang. Kan chalah phung a tawp dawn a ni.

Hun a lo kal zel a, Hmar unaute leh Cachari te North Cachar Hills-ah an indo ta thut mai a. Kan unaute nunna humhim tur leh an zahawmna humhalh turin Mizoram sorkar leh YMA te khan theitawp kan chhuah ta a. Hmar unaute an him theih nan kan sorkarin North Cachar Hills DC leh SP be pawp rengin Assam sorkar thuneitu sang te hnenah a zualko reng a, nunna tam tak chhanin a awm phah ta a ni. Hmar unau Mizorama rawn tlan lût te chu thei tâwkin kan tanpui a, an mamawh tinreng phuhrûk turin Town Branch ten thil tul tam tak, sum pai bâkah mutbu leh mamawh dang tinreng te thawn an ni. An inkar buaina a reh hnûah pawh him taka an kir dan tur thlengin sorkar leh YMA-in hma kan la a, eng emaw zât chu an chambang hlen ta a ni. HYA hruaitute Manipur atanga lo kalten kan hmalak dan an hriat leh an hmuhin an lung a awi hle a ni. Thih leh ruam khatah, dam leh tlang khatah tih chu kan thupui a ni. Nula zaithiam Lalroutmawi, khati taka kan lawm dan atang leh Mizorama Mizo Nu ni tura kan seng luh dan hian Mizoram chhunga Mizote rilru puthmang a tichiang hlein ka hria.


KUKI/THADO
Manipur lama kan unaute Kuki leh Thado te chanchin hi hre thang lo tan chuan bangbo theih tak a ni. Kuki tih hi chi hrang hrang intel khâwm khai khâwmna hnam hming a ni a, tah chuan peng hrang hrang la awm lehchhawngin an chi hming chu hmingah telh zelin an chi hming hi an dah pawimawh ber emaw tih mai tur a ni. Chu chuan an helho zingah pawh inthenna (faction) a siam nasa hle a ni. Anni ngaihdanah chuan Mizoramah chuan Mizo angin awm ila, Manipur-ah chuan Kuki ni ila an ti thin. Manipur-a kan unau Kuki te nen khian kan awm hranna a rei tawh êm avangin leh communication gap avangin inkar kan lo nei thui hman hle a. Amaherawhchu, unau na na na chu inhai thu awm suh, an hruaitu hrang hrangte Mizoramah an rawn chuang chhuak ve ta fo va, chu chuan min inhnaihtir hle a ni. Mizo hnahthlak kan unaute zawng zawng (Naga-a lut tawhte tih loh khian) hnam kût kum tinin an hmang ho thin.

Kum 2005-ah Hnam Kût chu Kangpokpi, Sadar Hills-ah nghah a ni a,Central YMA min rawn sawm ve avangin kal tura ruat ka ni a, chhunah Shri Ibobi Singh Chief Minister, Manipur chu Chief Guest a ni a, zan programme-ah Pu Tawnluia, Home Minister, Mizoram Chief Guest tura ruat a ni bawk a.

Flight cancel a nih avangin kan Minister chu a kal thei ta lo va, hotu kal khâwmte chuan zanah tu nge Chief Guest ang tih an rel ta a. Pu T.N. Haokip Speaker, Manipur chu kan rawt thuai a, pawm a ni nghâl bawk. Pu T.N. Haokip, Speaker chu a rawn thlen ve chuan a remti ta reng reng lo mai a, kan zingah kan hnam hotu Central YMA President a awm avangin amah hi Chief Guest a ni tur a ni, a ti ta bur mai a. State Level function lian tak mai Hnam Kut-a Chief Guest nih hi ka rilru tak chuan ka zuam lo a ni. Min nangching a ni ber mai a, he kûtah hian Mizo hnam unaute zawng zawng Manipur-a mi chu an tel kim a, Minister chin pali (4) lai bâkah MLA te an la awm bawk si a, man chawia Chief Guest nih loh theih dan awm se ka thlang zâwk hial àwm e. He thil ka han tarlan chhan chu keimah lam ni lovin Manipur-a kan unau zawng zawngte khian unau thisen zawmpuiah min pawm chiang a ni tih han tarlan ka duh vang a ni. Kan hnam unaute nena  inpumkhatna hi Mizoram pawnah chuan YMA te hian kan thawk thei berin ka rin phah a ni. Keini lam hian kan ngaihsaka hma kan lâk loh chuan tumahin hma min lâksak ka ring lo. Kan unaute nen kan inpumkhatna thu hi kan kovah i dah ang u.

Thawk khat lai khan kan unau Thado te hian kan rawn zawm ve mai ang che u tiin rawtna an rawn siam nghe nghe a. Mahse, keimahni lam chauh inen lova zau zâwk kan thlir a ngaih avangin anmahni lam inkarah inhriathiam lohnate a thlen theih avang leh boruak tha lo zâwk awm thei thil a nih avangin ngun lehzuala ngaihtuah leh atan kan dah ta zâwk a ni.
 

ANAL/M ARING/KAWM/CHI-RU/AIMAWL/MA YON/LAM-KANG/CHOTHE, etc.
A chunga tarlan kan unau thisen zawmpuite hi tunah chuan Mizo chi peng ni tawh lovin Naga helten silai hmawra thusawiin Naga-ah an la lût der tawh a. Mizo hnam tan chuan a lungchhiatthlâkin a runthlâk hle a ni. Heng hnam zinga Aimawl leh Chothe hnam hi kum 1998 YMA General Conference kan hman tum khan, chutih laia kan hruaitu Pu T. Sangkunga hmalâknain, UN tanpuina kan dawn atangin Manipur leh Tripura-a kan unauten min rawn hmanpui a. Serhmun khaw thlen hmaa Taitesena Khiangte hriat rengna lungphun an han chhiar chu, keini pawh Khiangte kan ni ve tho alawm an ti chhuak ta phawng mai a, mak kan ti hle mai. Chothe kan tihte hi Mizorama Chawhte kan tihte nen hian thuhmun an ni. Kum 1910 atanga 1928 chho vela Mizoram Presbyterian Kohhran hmalâknain heng kan unaute zingah hian rawngbawlna neih a ni a, chu rawngbawlna atang chuan heng kan unaute hian kan Bible leh Hla Bu te hmangin Pathian an fak thin a. Hun lo kal zelah chu rawngbawlna chu a lo tàwp tâk avangin kan unaute chu an lo hla tial tial a. An zinga Upa rual ho chuan Pathian fakna an sak tui viau chuan Mizo hla an sa thin an ti. Keinin kan ngaihsak si loh avangin Naga Nationalism Movement chuan an huangah an khung ta daih mai a ni. Kum 1998 kuma Pu Lalruatkima CEC nen kan han zin tumin Chandel District-a Maring Naga Thingtlang khua kan va fang a, kan va tlawh theihna chhan hi Rev.Chawnghranga, Executive Secretary, Mizoram Synod thahnemngaihna vang a ni. Tin, hetih hun laia an hnam Minister awmchhun lehkha kenga kal kan ni bawk. Maring thalaiten min hruai a, Naga hel an vengthawng hle. Khaw pakhat kan tlawhah chuan an khaw thlen hmain Mizorama kan neih thin ang  kawtchhuahah Lungdawh an nei a, an putar lo awm chuanin hmanlaia Pawiho sam zial angin a zial a, an inah chuan Mizo Zu bel ang chiah hi an nei a, ZUPUI min khawn nghe nghe a ni. An fei leh thutthleng leh thil dang tam takah kan inang vek a ni. Khaw tawp ber kan va tlawhah chuan an in chhunga thil hrang hrang an lam rik dan kan zâwt a, kan ziak zel bawk a, inang a lo tam mai a, an hmeichhe pahnih phei chuan mak an ti lutuk a, an nui hawm hawm a, kal leh ngei ngei turin min sawm nghâl a ni. An thil hmingah chuan Sum, Tuihâwk, Em leh thil dang tam tak a inang a ni. Naga hnamah hian an pil bo hlen a nih chuan tumah kan mawhchhiat theiin ka ring lo, India rama state pakhat nei ve pha hial Mizote hian mawh kan phur thui hlein ka ring.


VAIPHEI
Vaiphei chi peng zinga pakhat chu Duhlian a ni. Duhlian tawng kan hmang a, Duhlian chi peng a awm ka lo la hre ngai hauh lo mai a. Duhlian zinga mi mihring ni ve bawk Manipur-a kan hmu ta mai chu âwih har ka tiin mumang emaw ka ti rum rum a. Manipur atanga lo kal Vaiphei unaute, Vaiphei National Organistion (VNO) Chapchar Kûta lo kalte hnena kan hrilh thin chu, Mizo zinga hla phuah thiam ber chu Rokunga Vaiphei a ni a, a hausa ber chu Hrangbana Vaiphei kan ti thin a ni. Chu thu ho të chuan an thinlung a pawt hnai hle a ni. Pu Soithinkhum Vaiphei IPS (Retd.) VNO-a hruaitu zinga mi a ni a, an VNO meeting-ah Vaiphei tawng grammar tihhma-sawn dan tur agenda an nei a. Mahse, Pu S.T.Vaiphei hian Vaipheiin tawng kan nei lo tih a sawi ta tlat mai a, a thiante chu an thinur hle a ni àwm e. Ani chuan, “Pu Buanga Dictionary thu mal tin ka en chhuak vek a, Vaiphei tawnga 5% vel hi mi tawng kan hawh a ni a, a dang zawng hi chu Mizo tawng a ni,” a ti ta daih mai a. Duhlian/Lushei tawng tun hmaa hmang thin khan, Manipur an phei hnûah chuan mi dang tawng an hman pawlh tâk avangin an tawng original zâwk (Mizo/Lushei/Duhlian) an theihng-hilh then ta ni theiin a lang. Duhlian tawng hi a tir takah chuan anmahni tawng a ni zâwk mai thei, a chhan chu Vaiphei chi peng pakhat chu Duhlian a nih tlat avangin. Tun thleng hian Chin Hills-ah Vaiphei chambang an la awm a, an pem kualna kawng (migration route) nia lang chu Khuangleng tlangdung, Champhai, Hnahlan leh Ngopa Area thenkhat niin a lang. Vaiphei Refugee Camp, Churachandpur kan tlawh tuma pitar pakhat upa  tawh zet thusawi, ka thianpa Pu S.T. Liana’n (Duhlian) tawng min lehsak atangin a hriat theih nual a ni. Vaiphei unau zingah inzawm khâwm duhna lo lian chho zel chuan YMA-a luh mai a remchan loh avangin kawng dang an dap ta a. An zinga rawngbawl reng thin Evan Zonunsanga chuan Synod Puipate dawrin Durtlanga Synod hman tum khan Presbyterian kohhranah lawm luh an ni ta a ni. Manipur-ah hian an thiltih thin tha lo deuh chu chi inlâk bingna hi a ni. Kan unaute khi kan ram kohhran an rawn zawm a nih pawhin a bîka khung emaw, a bika thil siamsak ang chîah hian kan fimkhurpui an ngai khawp mai. Chi bîk hnamin min rawn zawmin rawn lût vek mah se, an puala Synod hran emaw, Presbytery hran emaw siamsak chi a ni lo vang. Chi bing bawka kan khurkhung leh chuan an tan dam khawchhuahna tur a váng mai thei. Hmunin min daih dawn loh avangin thil tenau deuh dang chu zep tawh lo mai ila a tha ang e.

2)    ASSAM
BIATE
Haflong, North Cachar Hills-ah khuan chi hrang hrang an cheng a, tunah chuan Cachari an tam ber tawh ang a, district council-a thuneihna pawh an pumhmawm a ni ta ber mai. Kum 1800 tawp lamah khan British-in census an siamah chuan Cachari ho aiin Mizo hnahthlâk an tam hret a, kum 1952 bawr vela District Council inthlan vawi hnih an neihah chuan kan unauten sorkarna an la a ni. Kan unaute an han inthen darh chiah chu Cachari ten sorkarna an la nghâl a, hmun hrang hrang atanga rawn pem lûtin tunah chuan North Cachar Hills-ah ro an rel ta a ni. Hei hian inunau loh a pawizia a tilang a, Haflong Hmar unaute hnênah chuan inunau thatzia sawi fiah nan kan hmang a ni. Haflong khawpui tlang sang ber laiah khuan Fiangpui Veng a awm a, chu chu Biate ho chenna bik veng a ni. Vanneihthlâk takin “Nulding Kût” (Biate Kutpui) hmang turin Central YMA-a kan hruaituten kum 2003 khan, Pu K. Lalhmachhuana CEC nen min tir a. Biate hian an hnam chanchin lehkhabuin an lo nei hlauh mai a, a hmingah chuan “BLA.TE PIPTJ TOISONG {Culture & Historical Background of the Biate)” Pu Ramdina Lalsim ziak a ni a. Biate unaute hian sakhuana lamah chuan Presbyterian niin Synod hranga awm an ni a. Tun thleng hian Synod Khawmpui Minute chu Mizo tawngin an la ziak an ti. Anni hi an hming tawpa “A” leh “I” dah an ni a, inunauna chungchang kan sawi hovah chuan engmah harsatna a awm lo. Mizorama an pi pute sulhnute hian an lung a tileng êm ‑êm a ni. An tam lam hi North Cachar Hills-ah sing khat (10000) dawn an awm a, Jowai District,  Meghalaya-ah chutiang vel bawk chu an awm. YMA rawn zawm ve mai hi a tha ang em tih te pawh sawi ho a ni a, mi hnam kara awm an nih avangin an chungah tawrhna leh harsatna thleng mai theia an hriat avangin a tam zâwk chu an la tim deuh a ni. Mahse Umrangso leh Sangbar vela khaw ruk(6) vel chuan YMA an din a. Pu R.L. Mawia Umrangso-a mi hmalakna a ni ber mai. Haflong Branch-in an ngaihsak thei bik si lo va, Shillong Group tan a hla deuh bawk si nen tun hnu hian kan tlawh chhuak thei ta si lo va, nau piang hlim ang deuh an ni a, tlawh chhuaha ngaihsak theih chu ni se a va tha dawn êm.


SAKECHEP
Sakechep chi te hi an awm darh ve hle a, Hailakandi District leh Karimganj District-ah te khuan an khawsa deuh ber. Hailakandi District chhungah hian Mizo khaw 5 a awm thin a, Telkata khua chu an rauhsan a ni tawh mai a. He khua atanga 5km velah Karopunji  (Kahrawt khua) a awm a, Mizo hlang khua a ni. He hmun hi Winchester Zoluti an zuk manna hmun kha a ni. Kahrawt khaw bul setah hian Tlangpui khua Sakechep hlang an awm a. Tun hma chuan thalai pawl tiin an lo ding thin a, YMA a rawn luh an duh tlat avangin lawm luh an ni ta a ni. Zing karah vawk talh a ni  a, an Sakechep Puithiam Lalber, thih thlenga thuneihna an hnamah chuan nei thei a ni nghe nghe.

3)    TRIPURA
Kum 1998-a Kawrthah hmuna YMA General Conference kan neih khan Tripura-a kan unauteah a tha zawngin nghawng a nei a. Kan hnam unaute, a bik takin Darlawng hnamte zingah thu a lo sawi thui hle mai a. YMA rawn zawma  inchhun luh an duh thu kan hre ta a. Tripura Group ten nasa takin hma an lo la zel bawk a. Central YMA-in ngun taka ngaihtuahin lawmluh zai a rel ta a. Pu P.L. Liandinga, Vice President leh Pu C. Remtluanga, Treasurer CYMA bâkah CEC thahnem tâwk tak leh zaipawl thiam tak takte nen pui takin kan kal a, Darchawi hmunah inlawm luhna tur chu nghah a ni a.

Darlawng unaute hian an chanchin ziahna bu Pu Letthuama Darlawng ziah THE DARLAWNGS OF TRIPURA an nei a, heng atang hian an chanchin eng emaw zât chu hriat theihin a awm a ni. Mizoram a an lo chenna thin chu Tlungvel bula Darlawng khua hi a ni.  Pu C. Chawngkunga, Ex-Minister chuan kum 500 lai Tripura-ah hian an lo awm tawh angin a sawi. Darlawng unaute hi Lai Sibuta hruai thlâk niin an ring a, tam tak Tripura-ah hian a chhukpui niin hriat a ni. Tui hri leh natna chi dang dang avangin an thi nasa a, kum 1994 khan in 1000 vel niin mihring 5890 vel an awm a ni. Darlawng hnam chi peng 54 lai an ni a, Mizorama chi peng kan neih hrang hrang ang te hi an kim deuh vek a ni. An eizawnna pui ber chu leilet siam leh lakhuihthei huan siam a ni. Khaw 22 atangin thalai rual an lo kal khâwm a, chung khaw tin aiawhte chuan Darlawng thalai flag dah sawnin YMA flag chu vuanin Pu P.L. Liandinga, Vice President, Central YMA in a lawm lût ta a ni.


Mizo hnam siam tha tur leh Mizo hnam chi peng tam tak inchhung khâwma lungrual taka kan khawsak tlan theihna hi keimahni theuh tan thil pawimawh tak a ni. Khawvela tawng tam tak hi a thi mek a, a la thi zel dawn bawk a, kan kawih din theih loh chin pawh a awm dawn a ni. Chung karah chuan Mizo hnam a rawn insiam chhuak a. Chumi siam puitling tur chuan Mizoram sorkar, Mizoram Kohhran te leh YMA te hian a bik takin mawhphurhna kan nei a ni. Kan hnam hi a dam loh chuan Mizoram sorkar a dam thei lo va, kohhran pawh a ding thei bawk hek lo a ni. YMA-a hruaitu leh member zawng zawngte hian Mizo hnam din chhuahtira par vultir a, mawi taka a than zel theihna turin kan hnam unaute hmangaih leh duat taka kuangkuah chungin an kal bona tur laka veng zelin leh an hmasâwnna turte kawhhmuh zela kan thawh hi kan kova innghat tlat chu a ni e. Tuna kan dinna hi duh tâwk mai lovin hnam siamna kawngah leh Mizo hnam inpumkhatna turin tan i la zel ang u.

YMA dam reng rawh se.

Thulakna: Platinum Souvenir Magazine (Zawlbuk) @ www.centralyma.org.in

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E