Vaihlo Zun

21/10/2010 02:32

 

- Valmama

Tunlai khawvelah hian United Nation chuan Global Warming an buaipui a, chu mi rualin remna leng turin hma an la bawk a, tram a thi mai turte tan tranpuina sum an khawn reng mai bawk. Hriselna lam hawi zawngin kan ngawihpui mai mai theih loh leh kan buaipui em em khawvel dengchhuaktu natna khirhkhan pui pui A/H1N1 leh HIV te a awm nual bawk. A enkawl damna damdawi awm map lo cancer natna tichhuak nasa tu, a ruka an buaipui em em chu Vaihlo hi a ni a... A Zun ngaite hi ni tin mai hian an dam chhung hun a pawhtawisak mek zel a ni... Vaihlo a siam zukhmuam zingah chuan Meizial hi a lar berin a zu pawh khawvel khawpin kan tam ber awm e... vaihlo hian natna khirhkhan Cancer chi hrang hrang a siam a, chu mai bakah Cigarette pakhat zuk zawh ringawt pawhin hringhnun sec 15 zel a ti tawi an ti a ni. He meizial hi ruihhlo ngaite tan ruihhlo puitu thra tak a lo ni ve leh bawk a, No.4 ngai tam tak paw'n meizial kher hi chu an ban hmak thei mai thrin lo... He ti fa kova thil trangkai lo hian zun erawh a nei na phian bawk si a, keima mimal nunah pawh hian thuk takin kua a lo hreuhva bu a lo khuar hman a ni.

Ka pianpui a ni lo...
matriculation exam ka han chhang zo ve a, kum 16 mi chauh ni mah ila kan in chhungkhurah thawktu kut indaihlona vangin ThrawLarGyi(trek trek motor) Driver nih a trul a. Meizial ngaina tak tak hlawhfate nen hna kan han thawkho a, kan chawlh deuh a piangin meizial hi an pak khu tung tung fo mai a. Ahlimchhawng chuan ka first love Kuva hian ka hrawk a fah ve em a vangin ka lo ngai pawimawh lem lo. Mahse Kuva hian ka chaw ei a tih tui loh thrin a vangin nghei ka tum ta a. Kuva ka nghei a, kam awlthawng awmngaihna hre lo tih reh nan meizial chu ka'n pak khu ve tran ta a. Kar lovah meizial chu ka ngaina hle ta mai a. Ka duh ta a ni tih ka inhriat meuh chuan khua a lo tlai zo tawh a. A zun hian thlah tum hmiah lovin min zemin min vial nget nget tran ta mai a. ka first love nen  banlet leh kan tum paw'n ka thlah thei ta si lo. Pahnih tih khawp aichuan tiin meizial chu ka thlang ta a ni.

Ka hmangaih ber...
Chutichuan Meizial chu ka ngaina ve ta khawp a, ka  sam, ka mit hmul leh hmuite a colour a intluktlan vek paw'n a pawi ti lo fahran hian ka pak khu telh telh tho mai a. No Smoking sign-te hian meizial zu tur hian min remind zaw mah zawk a, ka chakna hian chhungrilah min rawn tur et et thrin a. Zukmuam khawih ngai lo te hlim taka leng ka hmuh hian ui ang maia a nachang rei lova mawlah ngaiin ka nuih ru ve vel tran a, a chang phei chuan bawng hringnun trawmpui ve ang hiala, rannung te nen ka hmu inang put ve ta mai mai thrin a. "Meizial hi e nge a tuina?" tia min han zawh te hian ka rilru te te hian ka nuihzat a "i va han mawl bil tet tut roh" ka ti rilru thrin. A khu ka'n hip lut a, ka chuap ka han fan kual tir vel a, hmanhmawh vak lova ka han thawkchhuak vel hunlai tak phei hi chuan "Van ram thlafualah pawh em em a che, chintawk nei ve teh." tia a meizial hi hauh ka chak mah mah thrin. Chutiang chuan meizial chu ka hmangaihin ka duh ngawih ngawih ta chu a ni ber tawh a. Chutia ka hmangaihna avang chuan meizial chu a mawng atrang zawi te te-in ka fawh dek dek ta thrin a ni.

Thiam thu...
Chu tiang taka ka hmangaih Meizial hi Doctor-te, Chanchin bu, TV leh Radio-te'n min han sawiselsak chang hian a na ka ti ngawih ngawih thrin. Angel tenawm pawh lo ni teh reng se threnna biakthu hlan zai rel ka tum mawlh si lo. Tranchhan tur leh inhnemna pawh ka nei ve a, China mithiamte'n zukhmum khawih miah lo Physical Training nei ngai lo aiin zuakhmuam khawih infiamna tipeih mi chu an dam rei zawk an tih hi a ni. Rinna thu nen sehhmeh a min han sawichhiatsak chan te pawh hian "Kan Bible hman a inang lo anih chu, Tobaco lam hawi khapna inziak ka hmu lo" ka tih san mei thrin. "Tiam tlat e" tia inchhal a, khawppui a tan ka neihngheh ni awm tak hian engamah hma hauh hian a lamah ka trangsa bur thrin.  Albert Eistein-a kha ama room chhungah kuaite(vaibel) pet pahin Sceince Theory thrapui pui a ngaihtuah chhuak thrin a. Tobaco hi thluak bawm khalh dingtu, Relativity Theory khawvel mite hmelhriattirtu thrian thra ber a ni tih kan ngaihtuah hmaih lui thrin. Politician mi lar tak US President naupang ber ni bawk John F.Kennedy-a pawh khan Cuba nen insumdawnna tih tawp thu a puan hma khan Cuba meizial a lei chhekkhawlsa a... Abraham Lincon-a pawh a pet kawh lai thlalak a awm ve bawk kha maw... Barrack Obama phei chu sawi ngai lo...

"Mahse a zun zam chuan e... min phuar si..."
Kum 10 vel a lo vei meuh chuan ngaina vak tawh lo mah ila, ka tlah thei tawh lova. Tunhmaa zuk leh hmuam khawih lo ui leh bawng ang mai a ka lo hmuhte kha ka awt lehlingin anni chuan mi-ang-lo enin min zo tawh a. Mianglo zawng ka lo ni ta ngei mai, meizial bawih rinawm takah ka intu lut tawh miau si a. keimah ka inthunun thei tawh lo va Meizial zawk chuan min thunun tlat tawh a. ka chuap chu Necotin-in hmun tinah a luahkhat zo ta a. Nghei tumin ka taksa chu Tobacco Free Zone-ah te han puang ve eng ang mah ila amah hlat ka tum poh leh a zunin min phuar na ting a ni mai si a. Meizial kan ban theih lohna chhan hi a awm nual ta ve ang... a biktakin hmeizial zu te hian kan nghei kan tih hian kum tluang a tana han bansan erawh kan ngaingam thrin lo a ni. Kum tluanga tan mang thra han tih hi chu hmeizial paw'n a ngainat loh kan ring a ni chek ang. Pa ni a ka in ngaihna zawng zawng te chu tenawm a lo ni a... Tau nungchang trawmpui emaw ka lo tih te chu pa taka zukhmuam lo khawih chhin duh lo te an lo ni ta zawk a...

Ka chan tawk ve reng...
Chu tia Meizial zunin min phuar lai mek chuan, tlai khat chu Angel hem thlak nge ni a, khuavang note zawk tliarhran tihar khawp nalh D hermawii chuan ka thinlai thir anga khauhkah kheng khawng chu tui ang a rawn tinem ta niak mai a. A zuzam chuan talchhuah sawi loh talche aih thei lo khawp hian min phuar chingchivet bur ta mai a. A taksa vun var ngo no tak te chu thimin a hliahkhuh zawh loh khawpa var no leh eng pechhuak set set thei a ni a. ka lens chuan pixel thrahnem tak leh resolution fiah tawk hian lairilah chatuana tan picture tam lua awm lovin a capture chuai chuai mai a. Chuti chuan ka thinlai luahtu dik tak, ka taksa khingpui ngei nia ka ngaih chu ka chhar ta a. Tunhmaa ka duh ber ka pianpui emaw ka lo tih tawh meizial chu ka duhlaii chuan a huat em a vangin lawm takin ka thren ta hmiah a. Meizial chu chu ti maia awlsam chuan kan inthren bik mai lo. A zun zamin min phuar hneh tawh em a vangin ka kut te khur a,  ka hawina lama piang a meizial bungah chuan tum luih vang reng ni lovin ka mit a fu chat chat thrin. Meizial zuk ka bansan vangin hremhmun chhumchhe ber pindanah awm thrin mah ila hlimna min petu Lengler mawii chuan suangtuah phak piah lama vanram chu min thlenpuiin Vanram tlafual chu he leiah ngei hian min temtir thrin si a. Amaherawhchu ka D duhlaiin trang dang belin khiang min awisan takah chuan ka thrian leh rualte'n "Meizial Bung" bawk chuan min rawn ral leh ta si a... lam ang let zai rel a trul leh a nih si hi...

Chhinglung atrangin...

Meizial hi buaipui tham a lo ni chek a niang, Mihring Maktaduaih 1200 chuang awma China communist kawngzawhho paw'n vaihlo mahni mamawh inphuhhru turin intodelh an auchhuahpui a, rei ilovah mi nawlpui chu meizial zu an ni deuh titih vek a. Tunah chuan Sokar paw'n a hmun a zira Meizial zuk khap phalna dan te siam a tum ve tawh a ni... Kan Mizoram ngeiah pawh Chinese ho aiin ka buaipui mai ni lovin ka tuipui hlawm hle bawk... Kan thlahtute rawn chhuahna nia kan ngaih China ram Yin Lung lui kam khua pakhat a hmun awmna chiah an hriat theih loh Chhinlung atranga Mizoram thleng dawrh rawn thleh thla keini Zofate hi ka thlahtute ram atrang renga Vaihlo ngaina ve hrim hrim a Chin Hill leh Mizoram thleng chho te pawh an ni chek ang. Kan Pu Chinese-te hi chu a rumin a thu a tlang thra bawk a, khap an nih ngat chuan an ri leh bur mai dawn a... Keini Zofate erawh kan ti leh hlei thei lo chek ang le...

Eng tin nge?
Vaihlo zun atrang tal chhuak thei tur hian Mizote'n kan ngaihhlut "Tlawmngaihna" te, "Thrian chan thih ngam zofa" kan intih te leh Hla thu a "Teuh lo mai...kan zam mai dawn lo Zofa" kan intih te hi a trangkai ta lo te pawh a ni ang e... Zukhmum laka fihlim tur hian do duhna leh ngaihsanlohna a zu leh a hmumte thinlungah hian a zu lo te'n kan tuhhneh theih chuan thrang leh pekah zuk leh hmum hi hnam dangte tih tur chauhvah kan ngai ve thei tawh ngei ang....

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E