Sakhaw Thil leh Khawvel Thil

04/09/2010 17:13

- Rev.Dr.Ngurliana

Thuhmahruai

Tahan Mission Veng Kohhran Golden Jubilee bu atana thuziak thawh ve tura sawmna England-a kana wm laiin ka dawng a. “Aw le, ka rawn thawh ve dawn nia” tiin ka chhang a.Tahan DMWA 80th Anniversary khan ‘Krista, Jubilee Thlen Famkimna’ tih kha ka ziak tawh avangin, thupui dang “Sakhaw Thil leh Khawvel Thil” tih hi ziah a that ka ring a. Kan thlan chhan pawh Jubilee chu zalenna leh inngaihdamna te a ni a. Kum 1960-61 chho vel khan, Tahan Mission Veng Kohhran chuan, Naupagn Sunday School zirtirtu pakhat an chawlhtir a.Chutia an thununna chhan chu zan enlawk zawha Gate-a a chhuah paha lengzem hla a faivuk chhuahpui vang a ni.Chumi boruak leh kum 2005 Chapchar Kut tuma Mission Veng Biak in tuala Tahan nula leh tlangval rual an han Khuallam chho boruak khan, Kawlram Zofate nuna Sakhaw thil leh khawvel thil kan ngaihdan a inthlakthleng nasat tawhzia min ngaihtuahtir a.Sat tawnga sawi chuan ‘paradigm shift’ a tling a ni.Jubilee pawh hmang lo mah ila, kan nunah Jubilee a thleng a ni tawh lawm ni? Ka ti duh a.Chuvangin, tun tum Jubilee thuziakah hian Mizo Kohhran min phuartu pakhat nia ka hriat, ‘sakhaw thil leh khawvel thil’ tih hi ngaihdan thara ziak a that ka ring a.Zofaten khawthlang Kristian missionary-te hnen atangin Chanchin Tha kan dawng a.Hnam mawl leh changkagn lo tak kan nih laiin, Kristianna chuan min tihmasawnin min tichangkang hle a.Hmasawnna leh changkanna tam tak kan neih phah a.Hma min tihsawn dan zawng zawng sawi vek sen a ni lo vang.A lawmawm hle.Mahse, Kristianna chuan a tha hlir a phur chhuak bik lova.A tira tha ang taka lang, mahse belhchian dawl lem lote pawh a inzet thei ve bawk. Chung a tha tam tak zingah chuan, tun tumah Kristiannain a rawn ken ‘sakhaw thil leh khawvel thil’ tia ‘thil thliarhranna rilru’ hi thlur deuh bik atan ka thlang a. Kan thu chheh dan tur chu hetiang hi a ni ang. A hmasa berah chuan Zofaten khawvel thil leh sakhaw thil tih ngaihdan kan lo neih tan dan tlem kan tarlang ang . A dawtah chu ngaihdanin Zofate a nghawng dan kan tarlang le hang a.Chumi zawhah chuan hetiang thlirna hi khawthlang atang kan rochun a ni a, chuvangin, keimahni tualto ngaihdanah chuan he thil pahnih hi sawi hran theih mah nise, a inzawm tlat a ni tih sawifiah a ni ang. Chu bakah tunlai mi thiamten a inzawm tawn zawnga sawi an uar zawk tih tlem kan tarlang ang a.Chumi hnuah a inzawm tawnna atanga thlirin, mihring chungchang, sum chungchang, hla chungchang, hna chungchang leh khawtlang lal leh upa chungchangte kan thlir thuak thuak ang a. A tawpah thulang kawmna siam theih kan tum dawn nia.

Zofaten Kan Neih Tanna

‘Sakhaw thil leh khawvel thil’ tih Zofaten kan lo neih dan chhui tai la. He ngaihdan hi mi thenkhat chuan kan pi leh pute thil ngaihtuah danah a awmsa a ni lawm ni? Hetiang thil pahnih inkawp rial anga ngaihna (dualism) hi kan pi leh pute hnen atang kan rochun a ni em? Hei hi zofate irawm chhuak nge a nih a, khawthlang mite thil ngaihtuah dank an lo seng luh? Mi thenkhat chuan hei hi chu pipute atanga kan rochun zel a nia lawm, a chhir leh a tha, a chhuk a chho,etc,...chutiang zel chuan thil kan ngaihtuah a ni lawm ni? an ti ngei ang.Mahse, kei chuan hei hi khawthlang lam atang lo lut, Kristiannain a rawn ken, ‘dualism’ an tih, Grik philosophy atanga lo chhuak, khawthlang miten Kristiannaa an seng luh a ni a.Keini Zofate pawhin kan missionary-te hnen atangin kan rochun a niin ka hria. Entirnan, Pu Hluia (D.E Jones) chuan , Chanchin Tha hrila a chhuak chu ‘sakhaw thil’-ah a ngai a, Bookroom-a lehkhabu a zuar chu ‘khawvel thil’-ah a ngai tih a lang a. ‘Sakhaw thil leh khawvel thil’ tiin J.Merrion Lloyd chuan a tarlang. Keiniho pawh hian kan Missionary-te tih dan chu kan chhawng nung ta niin a lang.

Zofate A Nghawng Dan

Missionary-te khan Kristian kan nih tak avanga ‘tih loh tur’ tia min khap an nei ngei a.Anni pawh mihring ve tho an nih avangin, engkim an hre bik lova. An hun laia missionary ten an tihdan chu an tihdan tur chu a ni ve mai a.Tunah dem awmin lang pawh nise, an hun laia ngaihdan (mission paradigm) a nih avangin an dem awm hran lem lo a ni tih hria ila.Pi Za Tuah Nguri’n Chin Hills-a Kristianna a lo thlen tirh laia Kohhran rilru put dan leh tihdan a tarlan hian thil awmze tam tak a tifiah awm e. Heti hian a tanglang:

·        Chin Hills-a Kristianna a rawn thlen khan, Chanchin Tha lo dawngsawngtu Zofate culture chu a hnawl hmiah a, culture hmanga thil tih reng reng chu ‘ramhuai biakna hmanrua’ an tihsak vek a. Chu mai chu a la ni lo. Culture peng thenkhat, lam te, Zofate ir-awm chhuak hla sak te, dart e khuang tum te, Kristian ni ve lote nena khawsakho te sual angah an ngai a, an khap a.Chutianga an khapna ngai pawimawh lova Kristian ni ve lote zinga an tel chuan, lainatna tel hauh lovin Kohhran ata an hnawtchhuak mai thin.

Heng zawng zawng hi sakhaw thil leh khawvel thil tia thenhran vang a i a tih theih awm e. Hetianga thenhranna hian kum za chuang min chim ta. Kristianna a lo thlen rual khan, Zofate nunphung chu khawvel thil tih a ni a.L.P Lalenga ka kawm tumin heti hian ka zawt a, “Mizo sakhua leh biak dan te hriat i nei em?” ka ti a.Min chhanna chu, “Kristianna leh Mizo sakhua chu intuithlar torah kan ngai hmiah a.Hriat tumna reng reng kan nei lova, khatih lai khan Mizo sakhaw be mek pawh an awm a.Mahse, hriat kan tum ta lo hrim hrim a,chuvangin sawi tur tak ka hre lo a ni,” tih hi a ni. Rev.Zairema’n Mizoten Kristian sakhua kan vawn khan ‘Saphun rilru puin kan vuan a’, a ti a. Hei hi a dik thui viauvin a rinawm. Saphun awmzia chu sakhaw thlak tihna a ni a. Mahse sakhaw thlaah a tawp mail ova; hnam leh nunphung zawng zawng thlak vek a ni. Ralte pain Lusei sakhuaa Sa a phun chuan, Lusei sakhua a be tawh ang a, amah pawh Ralte a ni tawh lova, Lusei a ni tawh zawk a ni. Lusei culture chu a culture a ni tawh zawk a. Chutiang chuan Kristianna chu Saphun  riltu puin kan vuan ta a nih ngai chuan, keimahni Mizo culture kan hnual suat nasat poh leh Kristian tha kan ni mai dawn a ni. Chuvang chu a ni ang e, Sap missionary te aim ah khan Mizo Kristiante khan mahni culture kan hnawl nasa zawk mah reng a. Pu Lloyd phei chuan, ‘Sap suak’ min ti hial reng a ni. Zofaten Chanchin Tha kan pawm tantirh khan, mahni sakhua leh culture kan kalsan a.Tichuan, Zofate sakhaw biak dan leh nunphung zawng zawng chu khawvel thil tih a nit a a.Mahse, ngun taka chhui chian chuan, he ngaihdan hian Zofate Kristian nun leh culture hnam nunphung, kalphung leh khawsak dan tam tak min hnawlsak niin a lang a ni.Entirnan, Kristian hla chu sakhaw thil (Pathian hla) a ngaih a nih laiin, Lengzem hla chu khawvel thil (hla) a bel a ni. Chuvangin, Kohhranin do zui tur a ni, tih hi a rawn kal chhoh zel dan chu a ni a.Kan hnam zai chi hrang hrang te, Mizo hla thluk chi hrang hrang te, lengzem hla sak te, Mizo khuang te, lam te, kut te leh tlawmngaihna zawng zawngte chu khawvel thila ngaih an ni ta vek a.Chutianga thenhranna chu Zofate sakhuaa inphum , saphun rilru chuan a thlawp bawk avangin, a chak em em a.Tichuan Zofate nun peng tinreng chu sakhaw thil leh khawvel thil chuan a sawh phel ta phawk phawk niin a lang. Thatna tak a neih laiin, that lohna tam tak a neih a rinawm bawk a.Chutiang zel chuan, sakhaw thil leh khawvel thil chu, tanrualtir lovin kan inepter a.Remna aiin buaina, harsatna leh inhriat thiam lohna min thlen a ni.Chuvangin, he ngaihdan hi Zofa Kristianten Mizo vantlang leh khawtlang nun siamthatnaah, inepter lova ‘tanrualtir’ zawnga ngaihtuah a hun tawhin a lang. He thuziakah tam tak ngaihtuah hman lo mah ila, tlem azawng tal i han zirho dawn teh ang. Kan chhun dan (methodolody ) chu ‘Khawvel thil leh sakhaw thil kan tihte hi a inzawm tawn vek a, an tangrual tur a ni’ tihah a innghat ang a.Hemi rilru pu hian kan zirho dawn nia.

Sakhaw Thil Leh Khawvel Thil Inzawm Dan

Kan hriat tawh angin, Kum 100 Kristian hmel kan hmuh hnuah pawh, sakhaw thil leh khawvel thil tiin kan thenhrang a. Kristian nunah pawh hetia then hran hi dikin kan hria. Tunah hcuan Mizo Kohhran, vantlang leh khawtlang nun khalh ngil turin ‘sakhaw thil leh khawvel thil hi thenhran theih lohvin a inzawm tawn tlat’  tih ngaihdan leh thlirdan atangin Zofate thlarau nun leh khawtlang nun tisilawngtute , tikhingbaitute leh tinatute chu paih chhuah theih beiseiin hrilhfiah kan tun tan tawh ang a.Hetia a inzawm kan tih hian ‘sakhaw’ thil kan tih leh ‘khawvel thil’ kan tih thinte hi a thuhmun vekin a intluk vek kan tihna a ni lova.Inzawm tawn vek an ni e, tih hi a ni. Chu inzawm tawnna atang chuan mimal, khawtlang leh Kohhran nun pawh hi hmasawntir theih a ni dawn lawm ni? tih hi kan kalpui duh dan a ni e.

Zofate Nunphungah

Zofate nunphungah sakhaw thil leh khawvel thil tia thenhran hi a awm vak lo.Pi pute hun lai kan thlir let phei chuan, an sakhuain an in sak dan thlengin a thunun a, a inzawm a ni.Zau dawh thei chin chu Thangchhuah Pa an ni a.Mi naranin a dawh theih ngawt loh va.Khawtlang/ vantlang thil leh sakhaw thil a inthlung nghet tlat a.Entirnan, ‘chawng chen’ chu thangchhuah theihna tura rahbi pakhat a ni a.Sakhaw thil a nih rualin, khawtlang thil pawh a ni a.A inthlungin a inzawm a.thenhran theih a ni lo.Chuvangin, Zofate nunphungah sakhaw thil leh khawvel thil kan tih hi a awm hran lova, a inzawm tawn vek a,an tangrual zawk a ni.

Theologian te Ngaihdan

He sakhaw thil leh khawvel thil tia thenhran hi Pathian thu zir dan hlui (traditional theology)-ah chuan an dah pawimawh ang reng a.Mahse, tunlai missiologist te, Third World leh Asian theologian te chuan hetiang thenhran hian Pathian thu zirna a tikhawlo zawkin an hria a ni.Paul Dakin cuan, “Hetianga sakhaw thil leh khawvel thil tia zirtirna hi Bible-a innghat a nil ova, culture-a innghat a ni zawk, Lal Isuan a zirtirnaah leh Thuthlung Thar zirtirnaah sakhaw thil leh khawvel thil tiin a then hrang ngai lo,” tiin a tarlang.Paul Dakin chhui dan hi a dik a nih chuan, sakhaw thil leh khawvel thil tia thenhran hi Isua zirtir dan a ni lo tihna a ni a.Isua min zirtir dan zawk zawm a tha ngei ang.Chuvangin, sakhaw thil tih leh khawvel thil tih hi a inzawm tawn vek a, Lal Isuan a thliar hrang lo tih kan hriat a pawimawh dawn a ni.Lal Isua zirtirna chu Zofate nunphung, sakhua leh khawvel(khawtlang / vantlang) inzawm tawna thlirna nen a inrem hle zawk dawn pawh a ni ang e.Khawvel theologian lar tling phak Paul Tillich chuan, “Sakhaw thil leh khawvel thil tia then hran theih a nil ova, khawvel thil kan tih pawh hi sakhaw thilah a tel tho va, sakhaw thil kan tih pawh hi khawvel thil kan tih nen hian a inzawm tawn vek a ni,” a ti a.Asian theologian lar tak, C.S Song pawhin Asia mite mize mila theology kan chher chhuahnaah sakhaw thil leh khawvel thil tia min daidantu hi kan thiat tur a ni, a ti bawk a. Latin America Liberation theologian Gustavo Gutierrez chuan khawvel thil leh sakhaw thil inzawm tawn dan a sawinaah, “Thu tisaa channa te, mihring mihrinna te, mi tin te leh history hi khawvel thil ni tawh lovin Pathian temple thianghlim a ni tawh zawk a. Khawvel thil tia sakhaw huang pawn lam kan hnawl thinte pawh chu sakhaw thil an lo ni ta vek a.Tichuan, sakhaw thil leh khawvel thil tia then hran theih a awm tawh lo,” a ti a.Heng theologian-te hian an sawi tum ber nia lang chu khawvel thil an lo tih thin leh sakhaw thil an tih thinte hi a inzawm tawn vek a, an theology chhernaah chuan “an intanpui tawnin an tangrual” tih hi a ni awm e.

Thlirna Thar Zawnna : Zofate Zingah

Sakhaw thil leh khawvel thil kan tih chu Chanchin Tha rawn pu luttu, kan missionary-te leh Kohhran upate atang kan rochun a ni tih kan tarlang tawh a.Chu bakah, Lal Isuan ‘sakhaw thil leh khawvel thil’ tiin a then hrang lo tih kan sawi tawh bawk a.Tunlai Third World theologian-te chuan, hetianga sakhaw thil leh khawvel thil tia then hran hian Pathian thu zirna a tikhawlo zawka an hriat avangin, sakhaw thil leh khawvel thil tia kan then hran thinte an then hrang tawh lova, a inzawm tawn vek an ti zawk bawk a.Chu ngaihdan innghahna atana hmang chuan, thlir dan (hrilhfiana) thar siam tai la. Hrilhfiahna thar chuan  ngaihdan hlui sadai a thiat ngei ang a,pen khatin hma lamah a pen chhuak ang a.Zofa Kristiante nun pawh hma lamah a pawh kal hret theih beisei bawk ila.Mizote Kristianna hi a lo Mizo sauh rualin, a thlarau zawk ang a, tin, Chanchin Tha pawh kan culture nen inmil zawkin a chhuak thei ang tih a rinawm a ni.Chu bakah sakhaw thil leh khawvel thil tia then hrannain a lo hliam tawhte a tihdam a, a lo tih silawng tawhte a tihthat a, tun hmaa a lo hnawl tawhte pawh a tuarthar leh theih a beisei awm a ni.

Mihring

Mihring chungah thlarau leh taksa tiin kan then hrang a.Thlarau chu sakhaw thil, chhandam tur a ni a.Taksa erawh chu thi a, boral tur, khawvela tawp mai tur khawvel thil a ni tih hi kan inzirtir dan niin a lang. Chuvangin, Zofate theology hi chu a vankawk zawng hian a chho tiau tiau va.Kan rawngbawlna leh thuhrilnain a tum ber pawh ‘Thlarau chhandam’ a ni. Hei hia Zofate Pathian thu kalpui dan a tikhingbai a, a tisilawng nasa hle. Thlarau chhandamna chauh uar vangin, chhandamna a bo thei lo tih te, he taksa hian eng pawh ti sela, ka thlarau nun a khawih buai pha chuang lo tithe leh ngaihdan hrawmhraw leh awmkhauh tak tak a rawn hring chhuak a ni.Heng hia Zofate Pathian thu dik taka kan nun chhuahpuina tur kawng a dal a.Taksa hlamchhiahna a hring a.Thenkhat phei chuan taksa hi sual ang dawn dawnin kan sawi. Hmasang Kohhranin a lo hnawl Gnostic zirtirnaah a lut tep thin. Bible-in mihring a zirtir dan nen a inmil lo.Bible chuan mihring chu taksa leh thlarau (rilru pawh telh ila) inkawp leh inzawm tawn vekin a sawi a.Chuvangin, mihring taksa hi khawvel thil a nil ova, thlarau thil a ni a.Chutichuan, he leia kan taksa hi sual a ni lova, Pathian anpuia siam a ni a, a zahawm a,a duhawm a, tha taka enkawl tur a ni tih hriat chian a pawimawh hle a ni.

Zofate zingah sakhaw mi leh khawvel mi tiin kan inthen thin a ni ber a.Kohhran bel mite chu sakhaw mi, Kohhran bel lova khawsa mai mail eh a bikin Zu-in mite chu khawvel mi kan ti thin. Hei hian thatna tak pawh a nei a ni ang e.Sakhaw mi chuan sakhaw dan zawm a tul a, zuk leh hmuamah te, tawng kamah te, chet danah leh khawsak danah te inserh thianghlim a tul a.Chu chuan a nun a chawikang a, Kohhran leh khawtlang pawh tihhmasawnna tam tak a nei thei.Sakhaw mi zinga inchhiar tel ta chuan a manhla nge ang. Nimahsela, hetianga then hranna hian Kohhrana mihring intluk tlanna (equality) a tikhawlo a ni. Mizo society-ah class ang hi a rawn siam chhuak a.Khawvel mite chu Kohhran hian a hmu hniam a, a ngai nep a, a ngai pawimawh lova, a thu pawh thi beh lo thu ang a ni.Kohhrana mi chanhai leh rahbeh ang an nihna a awm fo.Tichuan, khawvel mite leh sakhaw mite chu khaw khatah kan khawsaho va.A tlangpui thuin sakhaw mite hian zah an kai deuh thin a.A chang chuan khawvel mi kan tihte hian sakhaw mi kan tihte hi an nuihzatbur duh hle mai. Kohhrana nihna duha phi kual te, Kohhran hna ruaka mahni chhungte duhsak bikna te, sum leh pai fel hlel thin te, leh Kohhrana thawk – sakhaw mi in be hlei thei lote an hmuh hian, khawvel mi an tihte hian sakhaw mi intite hi an hmu sakhua lo chauh ni lovin,khawvel mi an tihte aia tawp zawkin an hmu thei a ni.Chutih rual chuan khawvel mi an tih thinte chu sakhaw mi inti thenkhatte aiin sum leh paiah te an rinawm zawk a. An nitin nunah an dik zawk fo bawk a.Sakhaw mi kan tihten thatna leh that lohna an nei.Chutiang bawkin, khawvel mi kan tihte pawhin an nei vet ho. Sakhaw mite thatna leh khawvel mite thatna hi sawrchhuak ila, chumi tangkawp chuan khawtlang nun hi a siamthat theih a rinawm a ni.An that lohna kan hnawl a, an thatna kan inhnekremtir chuan, Mizo society hi a danglam ngeiin a rinawm a ni.Chuvangin, Mizo society siam tha tur hian sakhaw mi – khawvel mi tia inthen hran hi a tangkai lova, tanrual a pawimawh zawk a. Khawvel mi kan tihteah pawh hian dikna leh sakhaw thil tak a inzep teuh va, sakhaw mi kan tihteah pawh hian dik lo tam tak a inzep ve bawk a. A tuate mah hi sakhua bik leh khawvel bik kana wm chuang lo, thenhran theih kan ni lo a ni lawm ni?

Chuvang chuan, mi kan en dan kan tihdanglam a tul a rinawm. Anniho hi zawng sakhaw mi an ni a, anniho hi chu khawvel mi an ni a, kan ti thin a. Khawkhatah chengin cheng suh ila, mihring chu inmamawh tawn thin leh nung zaho thin kan ni. Khawvel mi kan tih thinte hian sakhaw miin min hria em? Tahan leh a chhehvela thalai hruaitute leh Kohhrana inhmangte inkara thu pakhat tarlang ila. Chhiat ni that ni tlawmngaihna chungchangah Thalai hruaitute, Kohhrana inhmang mite hi khawvel mi an tihte tluk hian an tlawmngai lovin an hre thin a.Hemi chungchang hi vawi tam kan hre thin awm e. Sakhaw mi intite hian khawvel mi kan tihte nen  hian kan inzawm tawnin kan inpeng tawn vek a ni tih kan hriat chian chuan, mihring intluk tlanna kan hre fu hang. Inthliar hranna ata inpumkhatnaah min hruai lut thei ang. Chu chuan inzah tawnna leh inthian thatna a siam zawk ang.Buaina chu remnaah a lo chang ang. Khawtlang nun tinuam tur leh tithlamuang turin sakhaw thil leh khawvel thil hi a tanrual a tul tih kan hmu chiang tawlh tawlhin a rinawm.

Sum

Khawvel thil leh sakhaw thil tia thliar hrannain sum kawl chungchanga a nghawng dan tlem tarlan a tha awm e.K.Thanzauva chuan, he ngaihdan hian Tiau thlang Zofate Kristian nun a nghawng chhiat dan heti hian a sawi a.Mi pakhatin Kohhran sum leh khawtlang sum a kawl a.Kohhran sum chu a fel thlap a.Mahse, khawtlang sum a kawl chu a felt lat lo a ni, a ti a.A sawi tum tak nia lang chu, khawtlang thil chu khawvel thila an ngaih avangin lo khawlo deuh pawh nise, pawi tih lohna a awm tihna emaw, ngaihhnathiamna a awm tihna a ni thei ang e. Kohhran sum erawh chu a him dam tha- sakhaw thil a nih avangin. Keini Tiau chhaka Zofate zingah Kohhran sum chu sakhaw thila ngaihna hi a hniam ta zawk emaw tih tur ang hrimin a awm a.Khawtlang sum aiin Kohhran suma harsatna kan tawh a tam zawk mah awm e. Kohhran sum leh khawtlang sum a dik ve ve hian a thlarau a ni.Khawtlang dintu leh enkawltu chu Pathian a ni a.Kohhran enkawltu leh dintu pawh Pathian tho a ni.Chuvangin, Pathian ta ve ve an ni a,thenhran theih a nih lohna lai a awm. Kohhran chu sakhaw thil a nih rualin, khawtlang nen a inzawm tlat a ni. Kohhrana hruaitu leh member-te chu khawtlangah pawh hruaitu leh member-te an ni tho va. An thuhmun reng a ni.Chuvangin, Kohhran sum leh khawtlang sum pawh sakhaw thil a ni. An him ve ve tur a ni.Keini Kawlrama cheng Zofate zingah Kohhran sum kawl chungchangah harsatna kan tawk leh zauh thin a.Hei hian sakhaw thil kan tih pawh hi a khawvel theihzia a tilang a.Sum kawltu pakhatin Kohhran sum leh khawtlang sum him taka a kawl khan a thlarau va, a dik a.Sakhaw thil leh khawvel thil chuan thlarauzia a tifiah. Kohhran sum a him a, khawtlang sum a him loh khan, khawvel thil tia kan dah hniam khan, kan thlarau lohzia a tarlang a ni.Kan thlarau lohzia min tarlansaktu chu thlarau a ni duh fo. Kohhran sum a him loh lek phei chuan, ‘khawvel thil kan tih ai khan khawvel tawh zawk tihna a ni a.’ A tisain, ‘a thlarau lo’ hle dawn bawk a ni. Thlarau mi kan nihna tur chu Kohhran sum pawh dik, khawtlang sum pawh dikah khan a awm zawk a.Chuvangin, sakhaw thil leh khawvel thil kan tih hian kan thlarau nun a tarlang a, a dik zawng a, a dik lo do kawngah an tangrual a ni.

Hla

Sakhaw thil leh khawvel thil tih ngaihdanin Hla chungchanga Mizo Kristiante a tihbuai dan tlem ngaihtuah ila. Kan tarlan tawh angin, Mizo Kristiante zingah hla chungchang hi sawi tur a awm nual awm e.Tun hma Kristian hla kan tihte chu Sap hla lehlin an ni a.Mizo hla thluk leh hla thu (poetical words) te chu khawvel thila ngaih a ni. Pathian  Hla leh Mizo irawm chhuak hla chu “Ui leh kel thlun pawlh ang” a ni ber a.Rev.Liangkhaia’n a ngaihdan inthlakthleng dan a sawi hian khawvel thil tia Zofaten an ngaih thin chu sakhaw thil atana a lo that zawkzia a tilang chiang hlein a lang. Heti hian a ziak a,

·        Chuvang chuan kan hla thu, kan hla tawng thlum tak mai khan Kalvari te phuah ila.Lal Isua leh a hmangiahna te phuah ila, kan hla chu a tha zawk em em ang tih a rinawm ta a ni.

Hetianga Rev.Liangkhaia’n a ngaihdan a thlak hi kum 1973 vel khan a ni chauh va.Hemi hma daih hian Patea (Zaliana) te, C.Z Huala te, Kamlala te leh mi dangten Pathian hla chu Mizo ziarang milin an siam tawh a.Kohhran pate lam hian an rawn tawm har hle ang reng a.Sakhaw thila kan ngaih leh khawvel thila kan ngaih thinte inchawlhpawlh atangin ‘Mizo Kristian Hla’ a rawn chhuak a ni. Chuvangin, khawvel thil leh sakhaw thil kan tihte hi a hranga dah inepter lovin, tanrualtir a, thil tha siam chhuahna atana kan hman chiahin hma kan sawn chho dawn a ni. Chutih rual chuan sakhaw thil leh khawvel thil kan tihte chu a in unau tawlh tawlh bawk ang a.Zofa Kristiante zingah boruak tichhe tawh lovin, inremna leh hmasawnna a rawn paw chhua bawk ang.

Kohhran mite chuan lengzem leh Mizo zai chi hrang hrang chu do tur ani ber mai. Kristian hla chu Sap hla lehlin ni tura ngaih a ni a.Prof.Siamkima chuan Rev.Liangkhaia ngaihdan chu heti hia a tarlang, “Tuna upaho, Mizo

 Hmasate lah khan Pathian lam hla chu heti tur reng hi a ni kan ti a, kan hla thu pangngai chu khawvel zai emaw kan ti ta a, ‘Chutah romei a kai vel a,Vanho thianghlimte zai vawr na chu’ tih te pawh kha kan sa hreh hle mai a,”. Mizo hla thu dik ta kha khawvel thilah an dah tih he thu hian a tichiang a.Kristiante chuan khawvel thil chu kan do nasat poh leh Kristian tha leh fir kan ni a. Pu Dawngliana min hrilh danin ‘Kum 1960-1961 chho vel khan Tahan Mission Veng Kohhran Naupang Sunday School zirtirtu pakhat enlawk bang chuan , faifukin lengzem a sa chhuak a.Lo hria an awm hlauh mai si a, Kohhran chuan a thunun a.Zirtirtu hna ata a chawlhtir ta a ni.’ Kohhranin lengzem a do dan chu chutiang chu a lo ni.Mahse, ngaihdan a inthlak chho zel a.Tunah chutianga lengzem sak avanga inthununna chu a awm tawh lo. A va thawven thlak em! Kan zaithiamte pawhin Biak inah chuan Pathian Hla mawi tak an sa a, Stageshow leh hmun dangah te chuan lengzem leh hla dangte pawh an sa a.Kawl ram Kristiante hian khawvel thil leh sakhaw thil inzawm tawn dank an hria a. Inkahpuk chaw tawka hman dan thiam ila.Hei hi a changkang em em a.Heng lengzem te hi hnam dangte kara Mizo identity min siamsaktu pakhat a ni tih hriat a pawimawh hle ang. Lengzem nei lo hnam ni ta ngawt ila, a chhuanawm ang nge a zahthlak ang le? Kristian hla chauh hian Mizo identity a siam thei lo, lengzem leh hla dangte tel lovin hla lama Mizo identity a kim thei lo. Chuvangin, Hla leh a vuak veta Zofate identity siam tur hian, khawvel hla ka tih leh  Pathian hla kan tihte hi an tanrual a tul tih hi hriat chian a pawimawh hle ang. ‘Kei chu ka piangthar atangin Lengzem ka sa tawh lo’ titu lo awm thin mah se, lengzem sa tawk kana wm zel a tul a.Kan hnam a puitlin chhoh ve zel beiseiin tawngtai zawk ila.Kawlram Zofate chuan kalpui dan tawk kan thiam tan viau tawh a, a lawmawm hlein ka hria.

Hnathawh

Zofate zingah sakhaw hna leh khawvel hna tia then kan hre fo.Kohhrana hnathawh chu sakhaw thil, sorkara hnathawh chu khawvel thila ngaihna a lian a.Pastor hna ka dil laiin, ka thiante inah ka leng a.Ka thianpa nu chuan, “Nang chu sakhaw thilah i kal dawn a, kan fate chu khawvel thil (zirtir hna) lamah an kal a, zu in te hi an pawisa vak lova.....” a ti a. He ngaihdan sakhaw thil leh khawvel thil tih hian thatna tak pawh a nei thei ngei ang. Hetah hian Kohhrana hnathawh leh sorkara hnathawh chu a thuhmun reng a ni, ka tihna a ni lova.Kohhran hnathawh leh sorkara hnathawh hi hring nun chawikan leh vantlang leh khawtlang nun siamthatna kawngah a inzawm tawn a ni tih hi ka sawi tum tak zawk chu a ni.

Kohhran hi khawvela awm a ni a, khawvel thil kan tih nen a inzawm lo thei lo va. Chutiang bawkin sorkar hna kan tih pawh khawvela awm a nih avangin, sakhuana nen  inkungkaihna a nei lo thei lo a ni.Chuvangin, Kohhran hnathawh chu sakhaw thilah kan dah sa tawh avangin, kan tarlang tam lo vang a.Sorkar hnathawh chu sakhaw thila rawngbawl an nih dan hi tlemin thlur deuh ta zawk ila.Entirnan, zirtirtu pakhat chuan State Primary School-ah zirtirtu hna a tahwk a.A zirtirte tan a tangkaiin a tha a, thahnem a ngai a, mi tam takin amah avangin lehkha an thiam a.Kum a rei deuh phei cuan a zirtirte chu an rawn graduate ta teuh va.Hna ropui tak tak an thawk a ni.Hetah hian mihring changkang tur leh hmasawn tura inzirtirna hi rawngbawlna peng lia khat a ni a.Heitianga inchawikanna hi Kristian rawngbawlna peng lian tak pakhat a ni a.Chuvangin, zirtir hna chu khawvel thil a ni mai lova, sakhaw thil pawh a ni tel nghal bawk a ni.Chuti zawnga kan thlir chuan, hna zawng zawng hi sakhaw thil a ni.Sorkar zirtirtu hna emaw, clerk hna emaw, leh company hna leh hna dang thawk reng reng pawhin ram din tura hnathawk a ni tih a inhriat chuan, hnathawk zawng zawngin Kohhran hna an thawh loh avanga zuk leh hmuama zalen riauva in ngaihna a bo ang a. Kan nitin nunah khawvel thil leh sakhaw thil kan tih thin chu a inzawm tawn vek a, a tangrual tur a ni tih kan hmu chiang deuh deuh dawn a ni. Chutichuan, zawi zawiin, sakhaw thil leh khawvel thil thenhrannain min tihsilawngna te, min tihkhingbainate a reh hret hret ang a, Mizo society natna vei hi min tihdamsak a beiseiawm.

Khawtlang Lal leh Upa

Hmasang atangin Zofaten khawtlangah Lal leh Upa kan lo nei thin a.Tunah sorkar ding laiin min phalsak leh phut angin, khua/veng tinah Lal leh Upa tur te kan thlang thin. Lal leh Upa nih chu khawvel thilah kan ngai a. Ringtu dik tak leh sakhaw mi chu inthiarfihlim torah kan dah a. Kan inthiarfihlim nasat poh leh Kristian thaah kan inngai tawh a ni awm e. Hei pawh hi sakhaw thil leh khawvel thil tia kan then hrannain min nghawng niin a lang.Kohhran upa tha leh rawn tling tak takte hian pha lovin lal leh upa hna hi taima takin thawk se, tichuan, kan khawtlang leh Kohhran hian hma a sawn ang a. A thang chho zawkin a rinawm a ni.Khawtlang leh Kohhra hi a inzawm tlat a ih tih kan hriat chian chuan, a insiamthat tawn dan a lo awm mai dawn zawk a ni. Tichuan, ‘sakhaw thil’ leh ‘khawvel thil’ tih hrenga tang tawh lovin, sakhaw thil leh khawvel thil hi kan khawtlang siamthatna atan Pathian min pek a ni tihah hian fiah ila.Hma kan sawn ang.Tichuan, kan khawtlangah dikna leh felnaa innghat Pathian ram kan din theih a beiseiawm a ni.

Tlangkawmna

Zofaten sakhaw thil leh khawvel thil tia kan then hran hi kan piputen thil an ngaihtuah dan a ni lova. Kan hnam kalphung niin a lang lo. Missionary-te hnen atanga kan rochun ni zawkin a lang.Missionary-te pawhin khawthlang Grik mi fingte thil ngaihtuah dan an lak a ni a.Grik philosophy-ah zung a kaih a.Zofate thil ngaihtuah dan erawh chu ‘lungpui pawh lungtein a kamki loh chuan a awm thei lo,’ tih ang deuhvin, ‘engkim hi a inzawm vek,’ tihah hian a innghat zawk a ni. He ngaihdan – engkim hi a inzawm vek – tih hi tunlai post-modernism ngaihdan nen zai khatah an luang dun thei a.Modernism-ah chuan thil thliar hran a ni fo. Entirnan, Zofate culture chu khawvel thil, Missionary-ho culture chu sakhaw thil a lo ni mai a.Missionary-te culture kan lak nasat poh leh Kristian tha kan ni dawn. Postmodernism-ah chuan missionary-te culture leh Zofate culture chu Pathian pek ve ve a ni a, a intluk reng a ni, tih a lo ni ta a.Chu bakah, Missionary-te culture leh Zofate culture chu inhneremin a inchawm lian tawn a, ‘culture thar a rawn piang a’. Chu culture tharah chuan thenhran theih lohvin khawthlang culture leh Zofate culture chu insiamtha tawn zel ang a.A tha lo lai paihin, a tha chu chhawm nung zel ila. Kum 2005 khan Mission Veng Chapel-ah Chapchar Kut programme thenkhat hman a ni a.Chapel-ah khual liante Mizo lam leh Zaitea hmuah an ni a.Hmana ramhuai ta, khawvel thil kan tihte chu Chapel-ah leh Biak in hnungchhungah kan seng lut ta a. Khawvel thil an tih thin – Zofate nunphung culture chu tihthianghlim a ni a.Kum zabi chanve dawn lai (kum 48 vel) a han vei lian chuan, lengzem sak avanga Kohhran zirtirtu atanga inchawlhtir boruakin min kiansan ta.Sakhaw thil leh khawvel thil tia then hranna leh a puitu Saphun rilru (mahni culture hnawlna rilru) hreng ata chhuakin kan zalen chho hret hret a.Krista leh Chanchin tha azarah Jubilee chu a takin kan chang chho mek a ni.Kohhran chu Kristian rinna leh culture vawng nungtu a lo ni ta zawk a.Sakhaw thil leh khawvel thil a inzawm tawn dan hriain, a tanrualtir a, hmasawnna atan a hmang ta zawk. Chanchin Thain Zofate culture-ah zung a kaih thuk deuh deuh va, a siamthat a, a tihchangkan chhoh zel beisei ila. Tichuan, Pathian ram chu kan nitin nun, khawtlang nun leh Kohhranah zawi zawia din chhoh zel a beiseiawm.Kan nitin nun pawh Krista leh Chanchin tha azara zalenna Jubilee lo ni zel rawh se.

Thulakna: Golden Jubilee Magazine, 2009 – Mission Veng Society , Upper Myanmar Methodist

Comments

Date 12/09/2010
By Mr.Mizo-a
Subject A tha viau va....

Kan taksa hi nge Pathian anpuia siam ni a,kan thlalau zawk hi..A chunga (thuziak anga) mi anga kan taksa zawk hi Pathian anpuia siam anih chuan Pathianin hmel chin hrang hrang a nei dawn tihna a ni ang

 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E