Rev. Liangkhaia hriatrengna lungphun - Zâwnginah

03/09/2010 14:25

 

- Lalhmingmawia  Ralte, Lecturer, GRHSS

 

 

Rev. Liangkhaia (1884-1979) - Zo fate zînga chanchin ngah ber páwl, Mizo Hnam Pá tih mai tur khawpa kawng tinrénga sùl sútu, Zâwngin tlangval, Pûma zai paw chhuaktu ni bawk, Thu leh hla-a zofate Buhzémpui tih theih khawp chuan kum 1908 khân Pathian thu awihin Kristian a nih thu a puang chhuak a. Hemi avang hian an lal Lalzika chuan a hua a, a nghaisa ta a. Zawlbuka a awm chu an lal Lalzika chuan a koh chhuah tir a, a thianpa Tumbila nên Tuthlawh hà suih lohin a vaw ta zêk mai a. A nghaisak fo hnu-ah a khua atangin zan lai lai-ah a la hnawt chhuak zui!

Hei hi Zoram chhûngah chuan Kristian tihduhdah lo thlenna hmasa páwl a ni a, hriatreng tlâk a tling. Chuti anga tihduhdah an tawrh ták fo hnu-ah chuan Kristian khua atâna an din Zokhawsángah an pém ta a, chuta tangin Mission sâp chàwmin Pu Liangkhaia chuan Pathian thu a zir a; a thiam theih ém avàngin Cherra-ah Mission sáp chuan a tîr leh a, Pastor hmingthang ber a lo ni ta.

Kan ramah hian Kristian Tihduhdah Centenary làwma, hriatrengna lung phun hi sawi tur a awm meuh lo. He hun ropui tak leh chhinchhiah tlâk tak hi August 30, 2010 (Thawhtan) zîng dâr 10:30-ah, Phullen lam atanga luha Zâwngin khaw kawt chhuahah Rev. Liangkhaia, Kristian a nih avanga tihduhdah a tawrh hriatrengna lungphun hi hawn a ni a. Heti ang Centenary hi Zâwngin hian an làwm hmasa ber awm e. ‘Ber’ nihna hauh hi thil harsa a ni a, làwmawm tak a ni. Kumin 2010 hi Rev. Liangkhaia’n kum 125 a tlin kum (Quasquicentennial Jubilee) a ni a, ‘Kristian Tihduhdah Centenary’ nêna huang khata khungho hi a inhmeh zual. êng awm tur chuan thim a awm hmasa thin a, thim chu êng hmahruai a ni; Zalénna nei tur chuan tawrh a ngai hmasa a, tawrhna chuan ‘Himna Kulhpui’ min thlen thin.

A lungphunah chuan ti hian a inziak:

Rev. Liangkhaia (1884-1979)

Mizo Pastor, Writer, Historian, Folklorist, Hymn Writer, Preacher, Tribal Theologian, Poet, Translator, Evangelist, Revivalist, Teacher, Thinker, Native Scholar, etc.

Zazubili  Lungphun (1908-2008)

Tv. Liangkhaia, a hnua Rev. Liangkhaia (1884-1978) ni ta leh a thianpa leh a hnua a mâkpa ni zui ta, Tumbila ten Krista vanga tihduhdah an tuar kum 1908 atangin kum za a lo vei ta reng mai le, Haleluia. Lal Isua vanga an lal kut tuar, nghaisak leh khua ata hnawhchhuah takte nghilh lohna lungphun hi Lalpa ropuina tur ni zêl se.

Phuntu:    Prof. Laltluangliana Khiangte
leh a chhûngte, Aizawl, 30 August, 2010

Kristian tihduhdah kum 100-na lawmna-ah hian Upa Prof. Laltluangliana Khiangte chuan zângkhai taka inkhâwm kaihruaiin hriatrengna lungphun siam chung châng report ngaihnawm takin a pe a. Keiin Rev. Liangkhaia chanchin tlângpui; kawng tinrénga Pathian leh a Kohhran tâna mi inpe, sùlhnu ngah êm êm a nihzia târlangin Jubilee lungphun a nih dan te ka sawi a. Rev. Lalhmuchhuaka chuan Rev. Liangkhaia atanga entawn tlâk a tihte sawilan pahin Lungphun mawi tak chu a hawng. Zawngin Kohhran Upa min ber Upa C. Lalzara chuan Lungphun chu Pathian hnênah a hlan a, Pu Laldika, VCP, Zâwngin chuan thu a sawi leh a, chumi hnuah a duh apiang thusawina hun hawn a ni. He Kristian tihduhdah Centenary lawmnaah hian mi 100 vêl kan ni a, Upa Sangkamlova chuan malsawm tawngtaina-in kalkhâwmte min tin. Upa Dr Laltluangliana Khiangte chuan Zâwngin Kohhran Library-a dah atân Rev. Liangkhaia lehkhabu chi hrang hrang engmaw zat chu Kohhran Chairman kutah a hlàn.

Aizawl lam atanga kal te chu - Upa Prof. Laltluangliana Khiangte; Lalhmingmawia Ralte; Isaac L.Hnamte; Apuii (LTL Publication Staff) leh Laltanpuia (TP-a), Driver te kan ni. Phullen atangin Bialtu Pastor-in min hova, Zawngin Kohhran Upa 7-in min lo hmuak. Lungphum lo buaipuitu ber Lalmuanpuia-te in, Zâwngin khaw tawntirhah chuan tukthuan buatsaih a niin âr ruai tuihnai tak kan kîl a, chaw lem a nuam ngang mai!

Rev. Liangkhaia hi zirna lamah pawh a duai lo, pakhatna a hauh fo. A thawk reng a, a zir reng a, a thihni thlengin zirlai a ni reng. A nun atangin entawn tur a va tam em. ‘Zirna chuan pian atanga thih thleng a huap’ angin a ni pawh hian a thih thlengin a zir a ni. Khawvela thu leh hla thiam bera kan ngaih- William Shakespeare-a hi British-ho chuan an ngaisâng hle a, a puala Poet’s Corner an siamah pawh a lim lian leh nalh takin an ker bîk. August 7, 2007 khân he hmun hi Pu Thangmawia nên kan tlawh. A awmna lai tak hi UK atangin Dr Tluangtea ka zâwt a, a awmna lai min rawn hrilh a, kan kal a ni.

British-ho chuan “India ram pum aiin Shakespeare-a kan duh zâwk” an ti, chuti ang deuh chuan Rev. Liangkhaia hi kawng tinrenga zofate nun kaihruaitu leh khalhngiltu a nih avangin thinlung takin kan duh a, a lei taksa kan zîngah awm tawh lo mah se thih hnuah pawh thu a la sawi reng a, kan chawimawi a ni.

Thulakna: Vanglaini

 

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E