Post-American Dream

27/11/2010 02:11
- Lalthuamliana

Thliah hnu par

Tun hma deuh khan fiamthu changkang tha tak pakhat ka chhiar fuh hlauh mai a,chu chu hetiang hian a ni. Pastor pakhat a tawngtai a, "Aw, Lalpa, ka dam chhung ni ngei hian America min thlen la, ka thih hnuah Vanramah i hnen ka lo then loh paw’n ka vui lo vang" tiin. Chu tawngtaina chuan Zofate America Dream chu min hmuh fiahtir a. Kan pi leh pute suangtuah leh beisei ram pialral nun aia sang zawk, thangtharte suangtuahna leh duhthusam ram chu fan ngai loh America ram nuam leh ropui chu a lo ni ta.

Kan thlen phak loh leh kan tuallen vena tur ni pawha kan ngaih ngai loh America ram chuan kan lung min len a, chu ram chu keini aia sakruang lian leh hmeltha mingo val leh lanute tana khuanu vohbikah kan ruat a. Zan mangah chauh lo chuan kan lawi lut thei ngai dawnin kan ring lo a nih kha. Chu hla taka ram nuamah chuan nuam tinreng awmin kan ring a, kan nun hian a ngai vawng vawng a, kan thlarau khawvel vanram nuna thleng theih ni sela, thleng kan hnial hlawm hmel loh hle a ni.

Mahse, khawvel thiamna sang zel leh hun inthlak thleng te chuan kan nun dan chu nasa takin a rawn tidanglam a. Eng emaw chinah chuan kan khawsak harsat leh retheih luat vangin engti kawng kawngin emaw kan tal chhuak a. Tuanna ngai loh leilung ram dangte chu kan dai dar ta deuh deuh va. Hmana mi thiam leh hausa bik te, sakhaw puithiam ropui deuh chinte chauhvin an tlawh zeuh zeuh thin, America leh khawvel ram dangte chu leiletpa leh lehkha thiam lote pawn kan thleng ta sup sup a. Tunah zet chuan hmana kan chhai ve phak hlek loh tura kan ruat American lanu meuh pawh kan thliah hnu par chei vel ve ta mai mai chu a ni ta! Ni, kan American Dream chu a tak ramah kan thleng tawh a lo ni.Zofate din khawchhuah nan tun hun hi "Hun lawmawm"-ah kan chhiar thei ang em le?

Post American Dream chu!

Zofate'n kan American Dream chu a tak ramah kan thanharhsan tawh a. Mahse, pipute pialral dream aia hahdamthlak leh nuam zawk tura kan lo ngaih chu hahdam ni reng awm lova thawhrimna zara din khawchhuahna hmun a lo ni zawk tih kan lo hre ta. Chu hmunah chuan kan thiamna leh thahrui tlin tawk hna hniam te te ah inhlawhfain kan khawsa ta a. Mahse, kan lo pian vena khawvel ai thlawt chuan thawhrim man kan tel nasa hle. Kan kalsan ram riangvaia kan mite tan kan nih ang ang hian an innghahna lungpui nghet chan kan chang a, a ropui tih loh rual a ni lo. Mahse, he dinhmun hi kan pholeng hla ber erawh chu a ni lo tih chiang takin kan hria. Hetia hna hnuaihnung leh harsa ang reng tak thawka din khawchhuah ve tawk tawk hi kan American Dream kha a lo nih chuan kan hmaah Post-American Dream chuan min la hmuak a ni. Chu chu kan hmu thiam tawh hlawm em le?

Tun hma chuan mihang chu mingote chhiahhlawh mai an ni a, an beisei ram (Dream) pawh mingote nen ang khata tuallen chu a ni. Tunah erawh chuan mingote chungah mai ni lo, hnamtin chitin chunga leng turin mihangte chu hlan chhoh an ni ta. Khawvel ke chheh hi mihangte tel lovin a kal rem thei meuh tawh lo zawk a ni. Infiamna chi hrang hrang, politics leh thildangahte mihangte tel lohna a awm tawh lo hial awm e tih mai tur a ni.

A tuamtu vun rawng hang tak chhung atanga lo chhuak finna leh theihnaten zalenna an han chan hnua Mihangho hmasawnna ropui tak ang hi Zofate ram lak tur la awm chu a ni. Min tuamtu kawr hi lian lovin ngo lo mah se, mitinin zalenna leh chanvo ang khat renga dik taka an chan vekna ram kan thlen hnu hian kan chhunga theihna leh finnaten eng ang chiaha hmasawnna ropui nge min thlenpui ve dawn tih hi suangtuahna mai ni lo, thiltih leh a tak ngeia kan chhan tur zawhna chu a ni.

Vawiina hna hnuaihnung tak thawka nun khua hmachhawntute hian nakina America President la ni thei tur tu leh fate an hnutchhiah ngei dawn a, chu’ng mite chuan Zofate Post American Dream chu thutakah an la hruai lut dawn a ni. Tuna US President Obama hi kan tan inlarna awmze nei chu a ni.

Finna leh thiamna tel lovin tunlai Postmodern thlipui hrang karah hian hnam ropui leh zahawm tak angin kan ding khawchhuak meuh dawn lova. Chuvangin, kan tlakna leilung ram hausakna, zalenna, finna leh thiamnate hmang tangkai a, hmasawnna kawng thiam taka kan zawh chhoh a pawimawh ta. Chu kawng chu mahni chauhva zawh lovin tangrual ila; hnung lama miten kan rilru leh ngaihtuahna zau taka hawngin kal chhuak tate sawisela er mai lovin tawngtaina leh fuihna hmangin tanpui ila; hma lama kalte paw’n hnung lama kalte hmusita kalsan mai lovin an tan kawng tha sialsak zawk ila, he hnam hi ropuina ata ropui zual zelin Zoram khawvel pawh a lo zau deuh deuh zel dawn a ni.

Min Thlir Reng E

Nimin lawka kan nu leh pate American Dream chu vawiina thangtharte tan thliah hnu par a lo chang ta a. Zofate hmasawnna pholeng chu hla taka sawn a lo ngai ta. Kan Post-American Dream chuan min au va, a hnen kan thlen hun tur nghakhlel takin min thlir reng a ni.

Chu hun lo thlen hun chuan raltiang ram, finna, thiamna rama min ngai lotea hlima lo leng thinte khan kan tel lova tuallen an zuam tawh bik hauh lovang le!

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E