Pawngsualtu Hremna

21/09/2010 04:06

 

Kar kal ta zirtawpni khan pawngsual thubuai pahnih chu Aizawla Additional District and Sessions Court pakhat chuan a tifel a, pakhat zawk naupang kum 11 pawngsualah chuan pawngsualtua puh chu kumnga hrehawmtaka lung in tang tur leh Rs.500 chawi turin a hrem a. Pawngsual pakhatah chuan kum 15 mi pawngsual (victim) chu a thah bawk avangin tualthaha hremna na thei ber dam chhung lung in tang turin hrem a ni a,a pawngsual bawk avangin kum 10 tang tura hrem a ni a. Hremna hi kalkawp tur a ni a. Pawngsual hi hremna sang theiber chu kum 10 chhung lung in tan leh chawitir a ni a.

A bik takin naupang pawngsual a lo awm hian mipui, a bikin hmeichhia, MHIP angte chu an thin a ur thei hle a. Thinurawm tak pawh a ni a. Press release an chhuah a, a changin kawng an zawh a. Pawngsual an duh lohna thu, an dem thu an sawi a. Pawngsualtu chu a na thei ang bera hrem an phut thin a.

A bikin naupang pawngsual hi a rapthlak a, an nun tihchhiatna a ni a. Naupangin “Min pawngsual” a tih chuan court tan chuan thutlinga pawm tur tluk hial a ni a.
Pawl pakhatin pawngsualtute an zir chiannaah chuan pawngsualtu tamtak chuan pawngsual hremna natzia an lo hre lo hi a lo ni a. Chuvangin pawngsual that lohzia, a hremna natzia te, a biktakin kum tling lo naupang pawngsual phei chu kumkhua an nun tihchhiatsakna a nihziate hi puanzar (public awareness) tawk a la nih lohzia a lang theiawm e.

Kar kal taa Aizawl court pakhata pawngsual thubuai chinfel hi pakhat, dam chhung lung in tang tur leh hremna na thei ber pek hi kum 2006-a thil thleng a ni a, kum 5 tang tura hrem hi kum 2008-a thil thleng a ni.Pawngsual thubuai a ni emaw, thubuai tamtak hi kum hnih kum thum hnu-ah, chu aia rei a nih hnua court-in a chinfel chauhte an ni thin a.

Hetiang hunah hian thil sual tia puhte, pawngsualtua puhte chu bail-in emaw an lo chhuak tlangpui a. Kum 2 kum 3 hnu-ah, chu aia rei pawh a nih tawh hnu-ah an thubuai chu rem (tihfel) a ni tlangpui a. Hetiang hunah hian court tan nataka inhrem hi a harsatna lai a awm thei thinin a lang.

Hetiang kum 2 kum 3 hnu-ah hian pawngsuala puhte chu an lo piangthar tawh emaw, nungchang thatakin an lo nung tawh emaw, pawngsualte ngei pawh chu pasal te hial an lo nei tawh emaw a ni a.Pawngsuala puhte chu YMA hruaitu emaw, KTP hruaitu emaw, kohhrana inhmangtakte hial pawh an lo ni thei tawh a ni.

Kar kal taa a thubuai tihfel, kumnga hrehawmtaka lung in tang tura tih pawh hi pawngsual thubuai thehluttu (complainant) ber chuan a lo ngaidam tawh a. Pawngsualtua puh nen chuan engmah inhuatna pawh an nei tawh lo a, a thubuai chu tihtawpsak (hremna engmah pe lo) tur hialin court-ah chuan a dilsak nghe nghe a ni. Chumai a ni lo a, veng VCP chuan a dilpui a ni.

Pawngsualtua puh chu la naupang te emaw, upa tawh tak te an ni thei a. Naupang te a la nih chuan a nun tihchhiatsak emaw reitak lung ina tang tura han hrem mai chu court tan a tihchi loh viau thei a. Nungchang thaa insiamna hun te, simna hun te a la nei a tih theih a. Upa lam a lo nih chuan lung ina reitak tang tura han inhrem chu court tan a tihchi loh viau thei bawk a ni. Tin, chhungkaw dinhmun chhetakte an lo ni thei bawk a. Hetiang dinhmunah hian pawngsualtua puh, a pawngsual ngei a ni tih finfiahna thatakawmah pawh court tan nataka hrem chu a harsa duh hle ang tih a rinawm. Mahse, pawngsual hlimah chuan pawngsualtua puhte chu nataka court-in emaw thuneituten emaw hrem tura mipui, a bikin MHIP te chuan an ngiatte kha an ni si a ni.

Pawngsual a thlen laia hremna natak pek duhtute khan heng pawngsual thubuai chinfel a nih dante hi an ngaihven zui ngai em aw? Nge a sarhu laia nataka hrem ni rawh se tih kha an duhtawk mai.Diktak chuan pawngsual hi an haw tak tak a nih chuan court-in pawngsual thubuai a chinfel dante hi enzui a pawimawhin a lang. Court thuremnaah an luingawi lo a nih phei chuan court sang zawkah khinlet theih niin a lang a,  court ngaiah ngei pawh ngaihtuahnawn tur pawhin thlen theih niin a lang. Chuvangin hremna na thei ang ber pek phuttute khan heng court thuchhuakte hi ngaihven zui atan a duhawm khawp mai.

Thulakna: Mizo  Aw

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E