Nupa Inpawlna Thatna leh Harsatna Thenkhat

Tunlai hian nupa tam takte chu an inneih atanga kum tam liam hmain inpawlna hman an ninga, an inning thuai thing. Tin, mihring mihrinnaah hmeichha aiin mipa hian mipat hmeichhiatna hman hi a duh tam zawk thin a, nimahsela, tunlai hian mipa tam takte chuan an kawppuite chak hun a lo thlen pawhin an tihhlawhtling sak peih lo. Chu chuanin nupa inkarah buaina a siam chho zel a, chhungkaw buaina lian tak a thlen thin a ni.

Mipa-in Inpawl A Chak Loh Hian...

Hmeichhia aia inpawl chakna nei tam mipa-in inpawlna hman a chak loh tlat chuan chhan leh vang hrang hrang vang a ni thei.

Mipa chakna tihniam thei natna hrang hrang – lung lam natna leh natna dang vang a ni thei a, zu leh ruihhlo hrang hrang vang a ni thei bawk.

Rilru hahna chi hrang hrang, sum-pai lam harsatna, hnathawh tluan lohna te avangin mipa chuan inpawl chakna a hloh thei. Mipa rilru a hah a, amah a nguai viau chuan, inpawl chakna pawh a bo ve nghal mai thin a ni.

Thinurna, kawppuite laka lungawi lohna leh duhthusam lohna atangin mipa chuan a kawppui chu a pawl duh lo tlat thei bawk. Hetih hun lai hian mipa chuan inpawl chakna hi a nei reng tho a, chu a chakna chu hmun dangah a hmang thin chawk. Entirnan: sex video leh thlalak saruak nalh tak takte ena mahnia chakna hrikthlak (zang hrawt) tein emaw, amah tihlim thei hlimhlawp bawlna dang daih hmangin emaw a inhnem thin.

Tunlai hian Chanchinbu leh Magazine hrang hrangah hmeichhe saruak thlalak nalh tak tak en tur tam tak a awm a, tin sex video chi hrang hrang awlai takin hmuh theih a ni bawk. Internet-a thlalak leh video hrang hrang awlai taka en theih a ni hian mipa tam tak a hruai khawlo mek a ni. Internet-a hmeichhe saruak thlalak leh sex video hrang hrang en thin mipa chuan mipa dang aiin a zang a hrawt ngun deuh nge nge a ni. Entirnan: kar khata vawi hnih emaw zang hrawt thin khan Internet-a chutiang en a hrat hnu chuan ni tin emaw, ni khatah vawi hnih hial emaw a hrawt ta a, chu chuan a ti-chau a, kawppuite pawl chak lohna a thlen thin. Tin, chu mai bakah Internet-a chutiang en a hrat hnu chuan ni khata darkar 2 lek computer khawih thin khan darkar tam tak a khawih belh ta a, chu chuan a taksa chauhna a thlen bawk thin a ni.

Inpawl Chungchanga Hmeichhiate Harsatna Langsar Zualte

The Journal of the British Association of Urological Surgeons-in a tarlan danin, zirchiangtuten kum 18-95 inkar kawppui nei hmeichhia 587 an zirchiannaah, inpawl chungchanga an harsatnate chu hetiang hian an sawi:-

1)    Inpawl chakna ka nei lo (47%)

2)    A nuam vawr tawp ka thleng ngai lo (45%)

3)    Chakna inkaihthawh sak chungchang thuah ka duh khawp lo (40%)

4)    Ka lungawina khawp ka hmu lo (39%)

5)    Inpawlna tinuamtu hriak a awm lo (37%)

6)    A na ka ti lutuk (36%)

Nupa inpawlna chungchanga harsatnate chingfel tur hian mipa pawh hmeichhia pawh an pawimawh ve ve a, a hmasa berah chuan inhriatthiam tawnna an neih a tul. Tichuan nupa an nihna an hriat reng a tul a, nupa inpawlna hi thil tha tak leh tih ngei ngei chi a ni tih an rilru-a an tuh tlat a tul bawk.

Taksa hriselna tha an mamawh. A tul chuan daktorte pawh rawn a tha. Tichuan, inpawl chakna nei thei tura inchei thiam leh inhip tawn thiam a tul hle a ni. A bik takin, mipa hian thil thar leh tih dan thar hi a lawm em em thin a, chu chu hmeichhia zawkin a hriat tlat a tha a, thawmhnaw thar emaw, inchei dan thar emawa mipa chu engtin tin emawa a hip thiam a pawimawh.

Tin, inpawlna hman a nih dawnin, chakna inkaihthawh sak tawn peih hle te, mahni nuam tihdanzawng inhrilha inngaihpawimawh sak tawn te a tul a, tichuan inpawl kan inpeih tak tak hun nghah peiha a hun taka thun a pawimawh em em a ni. Nupa inpawlna nuam thlen theih dan lehkhabu chi hrang hrang dap kual a tha a, a tul chuan daktor leh mi thiamte rawn a tha bawk.

Inpawlna Hman Thatna Thenkhat

1. Royal Edinburgh Hospital in Scotland-a zirchiangtuten kum 30-101 inkar mi 3,500 an zirchiannaah, inpawlna hmang zing takte chu hmang ve ngai mang lote aiin kum 4-7 in an lang naupang bik a ni, tih an hmuchhuak.

2. Inpawlna hian mihring taksaa awm thau chhia a titlem thei.

3. Wilkes University in Pennsylvania zirchiangtu mi thiamten college zirlaite an zirchiannaah, kar khata vawi khat emaw, vawi hnih emaw mipat hmeichhiatna hmang thin zirlaite-ah hmang ve ngai lote aiin immunoglobulin A a sang zawk a, taksaa natna dotu a chak tha zawk tih zir chhuah a ni.

4. Inpawlna hman hian mihring a tihlimin rilru hahna tam tak a tibo a, rilrua awm hlauhthawnna te hial a tinep thei a ni.  University of Paisley in Scotland zirchiangtuten hmeichhia leh mipa 46-te dinhmun hetiang hian an zir :- Mi 46-te chu mipui hmaa thu eng emaw tak sawitir an ni a, chumi hnu-ah chu’ng mite thisen kal dan leh marphu chu uluk taka enfiah a ni. Chutah chuan, kar hnih liam ta chhunga mipat hmeichhiatna hmang nia insawite thisen kal dan leh marphu chu mipat hmeichhiatna hmang lo nia insawite aiin a kal thain a phu dik zawk a ni, tih hmuhchhuah a ni.

5. Journal of the American College of Cardiology-in a tarlan danin, zirchianna hrang hrangah mipat hmeichhiatna hmang thinte chuan hmang ngai lote aiin lung lam natna chi hrang hrang vei theihna an nei tlem bik a ni, tih hmuhchhuah a ni. Inpawlna hian thisen a ti kal tha a, lung-a thisen kal vel a tikal tha a, lung natna vei theihna a titlem thei a ni.

6. Pawm tawp ngam la ni lo zirna leh chhuina thenkhat atanga a lan danin, mipat hmeichhiatna hman thinin mihring kum a pawt sei deuh thei mai thei. British Medical Journal-a tarlan zirchianna pakhat chuan thla khata vawi khat aia tlem inpawlna hmang thin mipate chu kar khata vawi khat vel inpawlna hmang thinte aiin kum 1-10 inkar velin an thi hma. Duke University zirchiangtute chuan inpawlna hlimawm hmang thin hmeichhiate chu hmang ve ngai lote aiin kum 7-8 velin an dam rei, niin an sawi.