NUNGCHATE TAWNGTAINA

15/09/2010 17:48
- C.Lalrinawma , Champhai Zote

“Aw Lalpa, thilsiam zawng zawng zinga a tha ber leh ropui bera mihring siamtu, keini nungchate hi mihringte ang em chuan min hmangaih lo a nih pawhin; i thilsiam kan nih ve tho avangin min enkawla min veng turin, i hmangaih zofate chu i dah a. Kan chenna turin Zoram mawi leh nuam, boruak thianghlim tak awmna chu min pe tel bawk a. Tichuan, min enkawltu Zofate chu kan zaha, nang min siamtu pawh theih tawpin kan chawimawiin kan fak che a, he Mizoram mawi leh nuam tak hi kan thlahlel ngawih ngawh a ni.

Mahse, Lalpa kum kha leh chen kan lo chen ve na ram Mizoram chhunga cheng zofate chuan, nang an siamtu leh hmangaihtu chu an theihnghilh zo ta che a ni ang, keini an enkawl nungchate chu min nghaisa nasa ta em em mai a. Kum tin maiin kan in leh lo leh kan awmna hmun tha tha te chu min tih chereu sakin chu pawh chu duh tawk mai lovin min hal darh sak vek mai thin a. Kan sa te ei tumin ralthuam nen kan

nunna min laksak reng mai a, nilengin min enkawltu Zofate tan tiin kan awrawl tawpin kan zai thin a, chutih laiin ka bulah chuan min tihhlum tumin awmhmun an lo khuar ve reng a. Hla taka thlawhbo vawn vawn a ngai thin. Thingrah leh parzu tui tak takte han tlan ve thin mah ila, kan thihna turin Thang chitin reng an lo kam thin a; luipuia chengte pawh lena min man mai duhtawk lovin, TUR hmangin min hrai thin a, kan mang hneh thin khawp mai.

Aw Lalpa, Mizo mipuite hnenah hian keini nungchate hian, engtin nge kan harsatna hi kan hriattir theih tak ang le ? Zofa Kristian tha tak takte hi kan hotu tha tak tak an nih theih nan, nangin an thinlungah hna thawk la, nang an zah ang bawk chein kan chungah zahngaihna an lantir theih nan i hnenah kan rawn dil sak e. An ram roreltuten mirethei chanai tur an lo tih chingpen chang pawhin, nasa takin an sawisel thin a, mahse kan nunna min laksak mai bakah kan sa te hial an ei a, an roreltute hian an sa te ei sak ve ta se engtin ngai ang maw ?

An ram roreltute hian an sa te hi eizawn nan Bazarah te han zuar ve ta se engtin ngai ang maw ? Bazar-a kan sa eizawn nana an zuar han hmuh changte hian kan rilru hi a na thin teh a nia !! Min nghaisak dan hi a nasain kan lungchhiat dan hi kan sawi thiamlo zawk a ni. An buh leh balte kan han eisak ve chang lahin min um sawn mai pawh duhtawk lovin kan nunna hial min laksak thin a, kan chunga an tih ang hian an chungah thleng ve ta se an va phun nasa dawn em !! Aw Lalpa, Roreltu tha leh rinawm Zoram mipuite hian neih an duh chuan, kan chungah hian zahngai hmasa sela, tichuan an nei mai ang.

Atawp berah chuan, keini  nungchate hian he Zoramah hian hlim tak leh thlamuang taka kan chen ve theih hi kan duh ber a, he ram lo hi chu ram dang kan nei bik chuang lo. Siamtu’n nungchate hi in mamawh tawn dial diala a siamte kan nih avangin kan tello chuan Zofate pawhin nuam an ti chuanglo ang. Aw Lalpa, Zofate hian kan chungah zahngai tawh sela, he ram timawi tur hian a chhunga chengte hian kan theihtawpin tan la tlang leh ila, thlabar leh hlauhna lakah hian ZALENNA nei ve tawh ila, chumi atan chuan nangin an rilruah hna thawk ang che.

Thulakna: YMA Chanchinbu, 2009 - March

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E