Ni 23 March 2011, Nilaini khan Nepal khawpui Kathmandu-ah Kristian 1000 velin sorkar hnenah inphumna tur thlan ngenin kawng an zawh.
“Kan chanvo dik min pe rawh u. Thlan min buatsaihsak rawh u” tih te, “Khawnge kan inphumna tur hmun?” tih banner te kengin kawng an zawh a, mi thenkhatin mitthi kuang ruak an zawn bawk a ni.
Kawng zawh huaihawttu Pastor Sundar Thapa-a chuan, “Kristian dan ang taka kan inphum theihna turin, Nepal ram district 75-ah Kristian thlan ruahman turin sorkar kan ngen a ni. Sorkarin kan ngenna min tihhlawhtlinsak chuan, he ramah hian tha takin kan awm hle hle ang a, ram hmasawn nan theihtawp kan chhuah chhunzawm zel ang. Min ngaihtuahsak lo a nih erawh chuan kawng laiah kal chhuakin kan che chhuak dawn a ni,” a ti.
Tun hmain Kathmandu khawpuia cheng Kristiante hi Hindu temple Pashupatinath/ Pashupati bul ramah an inphum thin a, nimahsela, nikum kum tawp lam khan Temple thuneitute chuan Hindu hmun thianghlim Pashupatinath bul hnaia Kristiante inphum chu an khap. Tichuan kumin kum tir lam khan Nepal’s Supreme Court chuan Pashupatinath bul hnaiah sakhaw dang bia reng reng inphum phal a nih loh thu a tichhuak a, Christian te mang a ang a, lungawi lohna a intan ta a ni.
An rinna sakhua avanga enhran an nihna leh thlan nei lova an awm chuangchang chu National Human Rights Commission-ah an thlen a, nimahsela, ngaihthah an nih thu, Kristiante chuan an sawi.
Nepal sorkar chuan February 2011 khan Kristiante hnenah thlan tur ngaihtuahsak a lo tiam tawh a, nimahsela, vawiin thlengin tihhlawhtlin a la ni lo. Nepal’s Supreme Court chuan a thuchhuah – Pashupati bula Kristiante inphum khapna dan chu a hlip leh tawh na a, buaina-in a chhunzawm avangin Kristiante tan inphum ngam a ni leh tawh lo.
Mihring maktaduai 27 (27 millions) vel chenna Nepal ramah hian Hindu sakhua chu mi tam ber biak sakhua a ni a, 1.5% vel chauh Christian an ni.
Thulakna: BBC, World Wires, MSN