Nausen Tahbelh Lutuk Chu Naupang Khawlh Takah A Chhuak Thei

Nausen piang hlimte zan laiah an thang harh a, an tap thin hi a dan ve tur reng anga ngaih a ni. Nimahsela, thla 3 tling tawh nausen tah belh lutuk, chaw/hnute tui hrai leh muttir kawnga thunun harsa lutukte chu an upat hnu-ah enkawl harsa tak, naupang khawlh takah an chhuak tam bik, niin London zirchiangtu mi thiamten an sawi. He thu hi  Archives of Disease in Childhood journal-ah tihchhuah a ni.

Zirchiangtu mi thiamte hian naupang 17,000 an zir chian hnuin, nausen laia tah belh lutuk, chaw hrai harsa lutuk, zan mut harsa lutukte chu nausen tlei leh thunun nuamte aiin naupang khawlhah an chhuak tam bik a ni, tih an hmu chhuak.

Nausen tet laia tah belh lutuk leh chaw hrai leh muttir kawnga thunun harsa lutukte chu skul lut rual naupang an lo nihin, naupang hlim lo, rilru thunun thei lo, nungchang mawi lo, mumal lo, inchengvawng lo leh enkawl harsa takah an chhuak duh bik a ni. Chhui mite chuan nausen zawng zawng 20% vel chu nausen tah belh lutuk leh chaw hrai leh mutir kawnga thunun harsa an ni, niin an chhut a. Chuti a nih chuan nausen 5 zingah 1-ah naupang khawlh taka chhuah theihna a tam bik tihna a ni.

 Zirchiannaa tel ve, University of Warwick Professor Dieter Wolke-a chuan, “Nausen chu a tah belh lutuk a, chaw hrai leh muttir kawnga thunun harsa lutuk a nih chuan a nungchang a tha lo tihna a ni a, chu nungchang chu a than lenpui zela ngaiah a neih chuan naupang thunun harsa takah a chhuak thin a ni. Chuvangin nu leh paten nausen tet atanga tan an lak a, nunchan zawiawi leh mawi an zirtir a pawimawh a, a tul chuan daktorte leh mi thiamte pawh rawih a tha a ni,” tiin a sawi. Tin, he zirchianna hi pawm tawp theih a la ni chiah lo a, zirchian belh zel a pawimawh thu a sawi tel bawk.

The Royal College of Paediatrics and Child Health Professor Mitch Blair-a chuan, he zirchianna hi zirchianna pawimawh tak a nih thu sawiin, “Naupang tha chher chhuak turin nausen tet atanga inzirtirna a pawimawhzia a tarlang chiang hle a ni,” a ti.