MUNICIPAL COUNCIL ELECTION THLIR LAWKNA LEH HMEICHHE SEAT RUAHMANNA

21/08/2010 15:24

Nizan dar 7:00 PM khan Chanmari YMA Hall-ah Mizoram State Election Commission kaihhruaina in Aizawl Municipal Council (AMC) inthlan lo awm tur atan inbuatsaihna ni pah fawmin thlir lawkna, zawhna leh chhanna hun leh tun Municipal election bik atana hmeichhia chauh thlan theihna tur bial  thumvawr hmanga thlanna neih a ni. Aizawl khawpui chhunga Assembly Constituency 10 atangin Constituency 6 thlan chhuah hmasak a nih hnu in heng Constituency 6 chhunga ward 1 theuh chu tun Municipal Council inthlan lo awm turah hmeichhe candidate te chauh din theih nan thlan chhuah a ni.

State Election Commissioner, Pu C.Ropianga,IAS (Rtd) in State Election thuneihna, pawimawhna leh hmalakna a sawi hma sa a. India danpui in a phut angin Municipal Council chu din a nih thu a sawi a, inthlan hun tur chungchangah state sawrkar nen inbiakna an neih mek thu a sawi. Aizawl Municipal Council a seat 19 zinga seat 6 chu Municipal Council a hmeichhe quota seat 3 a seat 1 behchhan in  hmeichhe candidate tana hauh a nih thu a sawi. Municipal Body hnuaia subject 18 chu Mizoram mila her danglam in 17 chauh AMC Body in a enkawl ang a ti.

State Election Commissioner in thu a sawi zawh hian Municipal election kalpui dan tur Pu H.Lianzela, Election official chuan power point hmangin a hrilhfiah leh a.Hemi hnu hian Panel of Experts lo thu chhuakin mipui lam atanga zawhna hrang hrang an chhang a. Municipal Council inthlan leh a kaihnawih thilte mipui-vantlang hriat ah an rawn chhawp chhuak nghal a ni. Municipal Councillor ni tur hian Municipal council huamchhunga kum 18 tling tawh India khua leh tui te chu pawm an ni a. Municipal Council elector hi a awmna bial (ward) chhungah chauh ni lo Municipal Council huam chhung bial dangah pawh a in pek theih thu tar lan a ni a. Anti-Defection in Municipal Councillor-te chu a huam lo naa a tul dan a zirin dan chu siam that leh theih a nih thu sawi a ni bawk. Village Council  lo awm lo pawh ni se a hmunawl luahkhat tur hian Ward Committee leh a hnuaiah Local Council-te a la awm leh zel thu sawilan a ni. AMC ah hian MLA  leh MP te chu voting right nei lovin ruat seat hmangin an tel ve thei ang.

Zawhna leh chhanna hun rei tawk tak hman a nih hnuiin tun Municipal inthlan lo awm tur bik atan hmeichhe candidate chauh thlan theihna tur bial (ward) Aizawl constituency 10 tangin thlanchhuah na hun neih leh a ni a. He hunah hian MHIP, MJA, MUP, MPF, PMSA, MMSC, MPCC, MNF, BJP, MPC, ZNP leh Aizawl City Village Council Association te aiawh theuh te n hmeichhe seat atana ruahman tur bial thumvawrin an thlang chhuak a ni. Bial thlan chhuah te chu: (1)10-Aizawl North-I (ST) ah Ward No.II (Chaltlang,Bawngkawn,Bawngkawn South), (2) 11-Aizawl North-II (ST) ah Ward No.IV (Ramhlun North & South, Ramthar, Aizawl Venglai), (3)12-Aizawl North-III (ST) ah Ward No.VI (Chandmari West, Edenthar, Hunthar), (4)15-Aizawl West-I(ST) ah Ward No XI (Luangmual, Chawlhhmun, Tanhril, Sakawrtuichhun, Rangvamual, Phunchawng, PTC, Tuivamit), (5)16-Aizawl West-II (ST) ah Ward No XII (Tuikual North & South, Dinthar), (6)18-Aizawl South-I (ST) ah Ward No XVII (Venghlui, Republic, Upper Republic, Republic Vengthlang). Aizawl Municipal Council Area ah hian vote nei mi 1,68,649 awm in chung zinga 88,259 chu hmeichhia ni in a dang 80,390 te chu mipa vote nei chin an ni thung. Municipal Ward (bial) 19 awm in Polling Station 174 a awm a Ward No.18 na ah voter tam berin Ward No.6 ah vote nei an tlem ber thung.

Nizan programme hi Dr. Cherrie Lalnunziri Chhangte leh H.Lianzela, MCS in an kaihruai a, Panel of Experts ah heng mite hi hman an ni: P. Lianhrima, MCS, Secretary, UD&PA; Pu C. Lalchhuana, MCS (Rtd), Secretary, State Election Commission; R.Sangliankhuma, CEO, AMC; J.Hmingthanmawia,  Addl DC (G), Aizawl; Dr. Lalhnehzovi, Chairperson, PMSA-core Committee; Lallianchhunga, Asst. Professor, Pol. Deptt., MZU leh Lalmuanpuia Punte, General secretary, MMSC.

Political Organization hrang hrang te, NGO hotute leh sawm bik te bakah ah Municipal chinchang hria an kal tha hnem hle.

Thulakna: DIPR

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E