Mizote Chu Mizote Hi Kan Ni

17/09/2010 03:58
-Lalchhanhima

Tunlai hian Mizote chu tute nge? tih chungchang kan sawi nasa hle a, chu chu Mizona tihbuai phet tuma min chang reng hovin remchangah la-in, fing taka min tihbuai zual an tum mek. Burma-a Mizoten nekchep leh deu an tawk nasa hle thin a, kan Mizo Kut zinga kan ngaihhlut ber “Chapchar kut ” te hmang thei lo tura tihbuai an tawk fo a. Mizo history-a hmun pawimawh tak luahtu “Khampat Bungpui ” pawh Mizote nekchep reng thintuten sorkarah ni lo tak takin an theh lut fo! Tuna kan hman mek tawng hi “Mizo tawng a ni lo,” tih thupuia hmanga buaina siam phet tum an lo chhuak bawk a,mi thenkhat, “ ’Mizo / Mizo hnahthlak ’ kan ni lo, ‘Zo / Zo hnahthlak’ kan ni ,” tia Mizote inpumkhatna tihchhiat tuma lo au lo au tawk lah bo lo! Kan hun tawngah Mizona hi humhalh a tul ta hle niin a lang a, “Mizo ” tih “kan sakhming ” hrim hrim pawh hian humhalh a mamawh ta! Fimkhur a tul ta!

History hi chhui thui poh leh mi zawng zawng hi thlahtu thuhmun kan nihzia kan hrechhuak deuh deuh. Thlahtu thuhmun , unau vek ni chungin hetiang hian hnam hrang hrang kan lo ding ta a.Chu’ng zingah chuan hnam ni ve turin “Mizo ” pawh hi a lo piang ve a, “Mizo ” tih chu kohduat nan leh hla thu-a sawi nan “Zo..” tih a ni thin.Chu “Mizo ”-ah chuan “Zo ” in tiho leh “Zo ni lo ” in tiho zawng zawng an leng thei.

Mizote chu khawi hmunah pawh an hnam hming chu “Mizo ” a ni zel a, India a ni emaw, Burma a ni emaw, Malaysia a ni emaw, USA a ni emaw, a danglam chuang lo. “Mizo ” an in ti thin.Chu’ngho chu an chhehvel hnam dangte leh khawvel pawhin “Mizo ” an ti bawk. An awmna hmun a danglam avangin “Mizona ” an phatsanin, lehlama awr dum, lehlama awr senin an awm ngai lo. Unau hnam dangte nekchepna nasa tak karah Burma-a Mizote chuan “Mizona ” an phatsan chuang lo! Mizo hi sawifiah tuma buai buai aiin  nihfiah zawk mai a tha. Chutianga Mizo nifiahte Mizo an ni a, khawvel pawhin “Mizo ” a ti thin.

Tuna kan hman mek hi “Mizo tawng ” tih a lo ni a, mithiamte ziak Mizo tawng zirna lehkhabu thahnem fe kan nei.”Mizo tawng ” tiin zirna skulah pawh zir a ni a, Mizo subject ngatin zirna zawng zawng tawpna Ph.D thleng zir theih a ni. Mizo tawng humhalhtu pawl tam tak an awm bawk.

Mizote chu “Mizo ”-a lungawi a, Mizo nih zahpui lo zawng zawng, hnam dangte pawh ina “Mizo” tia a hriatte hi kan ni a, khawvel pawhin “Mizo ” min ti thin. Khawvelin min tih aimahin keimahnia “Mizona ” awm hi a pawimawh zawk a. “Mizo kan ni ” tih kan rilru-a awm hi a pawimawh ber. Chu chuan Mizo min nihfiah tirin Mizo Mizona a lo vul zual zel thin. Chu rilru pu lo chu tumahin Mizo an ti ngai lova, chu aimaha chiang zawk chu anmahni leh anmahni “Mizo ka ni lo ” an in ti. Mizo kan nih kan lawm e.

Kawng min daltu sihal ver vek,
Lem ang der thiam Mizo hmelma;
Do zel na’nge Mizofaten,
Lungrual takin kan Mizo hnam tan.

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E