Mizoram, aw Mizoram!

02/09/2010 14:35

- P.L.Liandinga

August ni 21, 2010 a lo her chhuak a, mahse khua a la var lo. Thlawhna lianpui, chumi tum atana a hming an phuah ni ngei tur, I131 (I one three one) chhungah kan lut diah diah a. Ka thutna tur 49F lam chu ka pan chat a. Ka thutna tur takah chuan vai hmelpu, tawng lama sap awphawi dik tak si tlangval tleirawl a lo thu a. Ka'n hnawt kiang te te a. Kei thingtlang pa pek chuan a chhung ka luh rualin a len zawng ka teh ru nghal vat a.

|hutthleng hrang theuhvah thuin a vawnban chu a laiah kan intawm zel a, chutiang thutthleng zanga vel chu mihring hlirin kan luah khat vek a. A bul lam atanga a tawp lam han thlir chuan kan thlawhna chu Dina te khua, Rulchawm field ai chuan a sei mai awm mang e. Rambuai hmaa kan khaw field ai kha chuan a dung a sei chiang khawp mai. Vanneihthlak lehpek tak maiin ka mut theih a chhuak leh hlauh pek a, hahdamthlak tak maiin ka mu chiah chiah a.

Ka kianga thute chu London naupang e ti lo chuan an hmel chu vai dik tak an ni a. Ni awm reng pawh an ni, keini hnial rual lohvin London-ah an piang a, an cheng a, mahse an nu leh pa te chu Pakistan atanga London a hman hmana pem lut an lo ni a. Sap naupang tawng dik tak hian a puam talh mai a. Keini Aizawl nulaho Mizo tawng han ti-sap ve satliah ai chuan an tawng chu a sap phian. Kan hnung tlar ngana velah chuan vai-sap (vai ni si, sap rama khawsaa seilian tam tak, Mizo rilrua vai kan han tih aia changkang fe) nu hmeltha bik lem lo tak, Dara te ang tan lo chuan mangan bechhiat thilah pawh nupuia kan neih duh miah loh tur hian nau a pawm a. A nau chu a tlei duh reng reng lo mai a, a tap ngawih ngawih mai a. A chang leh thlawhna hnung awl lai chhuat zawlah chuan a nu chuan a awi ngat ngat a. Kan khawngaih tlang theuh niin ka hria.

Lehkha ka chhiar peih loh leh ka hmaa TV herh chhuah theihah chuan film tih tlak en tur a awm bawk si loh avang chuan nau tap ngaihthlak leh a chhuah hun apianga mutthluk chu ka hna a ni mai a. Ka kianga tlangval pahnih te lah an la naupang bawk a, an thutthlengah chuan thlawhna kawmawl pan te min pek hmang chuan an inzial hlawm reng mai a. An mu thei ve ngawt mai.

Kei lah chuan nidanga ka tih ngai loh ang takin lehkhabu chhiar tur inring lawk hauh lovin Aizawl atangin Kolkata ka pan a, mangan thil titiha Kolkata a ka lei chawp, lehkhabu puichang tham zet mai, The Story of Philosophy tih bu, Will Durant-a ziah ka lei chu ka chhiar hlei thei hlek lova. Ka tarmit tha zawk te ka ngai rum rum hman hial a.

Mumbai atanga zing dar hnih vela kan chhuak kha London Heathrow Airport-ah zing dar 7:30-ah kan tum ta ruai ruai a. Helai Lengpui-a an tih ngai lem loh ang hian thlawhna atanga han chhuah dawn chuan a thlawhna kawngka hne rem tawk chiahin chhuahna tur inkalpawhna (corridor) an rawn chhawp hnai a. Thlawhna kawngka kan kan atanga lei lam pana chhuk chuang lovin pindan inkal pawhna angah chuan kan phei ta diah diah a.

Kan thlawhna chu a lian ve fu bawk e tih rilru puin ka tihtur hre lo chuan airport kan panna kawngah chuan zing ni chhuah sarah ka'n thlir let mai mai a. Kan thlawhna dinglam pangah chuan Air India tih chu lianpui hian a lo inziak kalh a. Mahse chumi bak chu thil a la awm tlat - Kan thlawhna hmui zum dinglamah chuan a haia hai rual loh hian MIZORAM tih hi a lo inziak kalh a!

Mak ka tih em avangin ka thlir nawn leh ngat a. Thlawhnaah te kan lo chuang ve zauh zauh tawh thin a, eng thlawhna mahah eng state hming ziah mah ka lo la hmu fuh ngai lova. Chutah pawh thlawhna lian chi hetiang, International a service chi-ah phei chuan an ziah nachhan tur awm reng reng ka hre lo.

Ka rilruah ngaihtuahna tam tak a lo lut ve a. Chu thumal pakhat, Mizoram tih ringawt maiin ka thinlung a deh dan te chu awlsam taka hrilhfiah theih a ni lo. London thlawhna tumhmun lianberah (Dara te tan bawk - London-ah hian thlawhna han tum a, han thlawh chhuah leh theihna mai hi engemawzat a awm thei. Hmana ka kal tum pawhin Heathrow tlawh hauh lo hian London khawpui atang khan ka thlawk chhuak - kha kha a ni mai!) hawrawppuia ka Mizoram tih keima kut hlei ziah ni hauh lo han hmuh kha a nuam sawng sawng a. Chutihlaiin ka ngaihtuahna pakhatah chuan, 'E khai, kan Air India hian Mizoram hi chu a ram thlafem ber angah a ngai ang a, Mizoram te meuh pawh kan huap vek asin, tih nan min hmang em ni ang aw? Keinin, 'Kan kim khawp e, Remruata te nen vek kan ni e,' kan ti ang velah khan Official tak hian min ngai em maw ni dawn ni, te ka ti a. Pawngpaw lawm luattuk chi pawh em maw ni dawn ni,' ka ti neuh neuhva.

Mak ka tih avangin ka en nawn leh thin a. A inziak miau si a. En nawna reh mai thei lah a ni bik si lova. Keimah lam ka chiangkuang lo han ti dawn ila Mawia te ka uankhum fiamthuna, 'Thlawhnaah chuan kum puan kha Air Hostess hmeltha tawkin a rawn bawhchhe phei leh ang a....' ka tih te kha an lo khap ve ta nge, engmah han ruih tur chi an sem hauh lova. A semtu awm anga ngaih Air Hostess-ho lah chu pension tur thlan khawm ni mai awm khawpin an senior vei nen, thlawhna atanga chhuh hnua ngaihtuahna han tibuai a, mit han tifiah thei lo tur thil kha thlawhna chhungah khan a tlem phian a ni. A hun thu ni se Pentecost-ni a uain ruia an inpuh hun, fehrehsan aia hma daih, zing fir tak tak a la ni bawk si. New York atanga Maryland kan panna kawngah ka thlen-in nu RMI hnena ka sawi pawhin a awih lo tih ka hre reng mai. Mahse min hnial ngam lo mai pawh a, a awih chuang hauh lo tih ka hria.

Mahse RMI ngaihdan ai chuan ka mit chu fiah zawk feah ka ngai.

Thulakna: vanglaini

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E