MIZO TO BUL

14/08/2010 13:18
 -Pastor Rualchhina

                      Hmanni lawk khan "Mizo" tih chungchang thu titi khawchang anga sawina kan nei a.Chutah chuan  upa pakhat phanchang tawh tak mai chuan, "Mizo tih hi R Thanhlira tih chhuah a ni e" a ti ta mai a. "Ani awzawng lo, MIZO tih tuan leh mang a hmanlai atanga kan common name a ni," ka tih pawhin a hre thiam hauh chu mak ka ti hle a.Mahse R Thanhlira hian Lushai tih kha Mizo a thlak hma daih, Mizoram a politics a rawn din hlimah tu R. Vanlawma chuan  Mizo Union alo din daih tawh tih leh thildang tamtak ka hrilh hnuah chauh ''Mizo"  tih hi hman lai atanga kan hming pangngai awm sa a nihzia a hre thiam ta chauh a ni.  Upa tawk takte pawh hian, kan history hi hrelo fe fe kan tam hle mai dawn tih ka ngaihtuahna atangin "MIZO" tih thupui hmang hian thil tlemte ka han ziakchhuak a ni.  

 
             "Mizo" (or Zomi) tih hi min thlahtu kan pi leh pu te, hmanlai kum zabi tamtak atang a  kan hnam pumpui hming - common name atan an lo hman a ni.  China atanga kan lo chhuah thlak laichuan Unau pahnih Chin-a leh Kachin-a te unau thlah kan ni tih hi a chiang a.  A upa zawk Chin-a hi kal hmasa in a naupang zawk chu tuna Kachin ramrah khian a in bengbel ta a.  A upa zawk Chin-a thlahte ho erawh chuan Chindwin luipui hi kan in, luikam nitlakna lam zelah chhuk thla in Khampat phaiah an lut ani tih hi a chiang em em bawk.  Vawiinah hian Homalin atangin Chindwin lui khi Khamti thleng khian zawh chho la,luikam thlanglam nitlakna lam pang zelah hian min thlahtute hi an lo chhuk a ni tih chiang taka hriat theihna chu i mit ngeiin vawiinah pawh i hmu thei ang.
 
           Khampat phaiah hian lo lutin khua leh tui an rawn din a. Helai ram atang hian Zo tih hming hi an lo piang ta niin a hriat theih ani.  Phaizawl ram awptu kawl lal  in an nek chep avangin ram leilung kham khawp an nei lo va, zo lo an vat a, tlangram an zuan thin avangin. Zo lo, Zoram tih an vocabulary-ah a lo tel tan ta niin a lang ani.  Heng hi Century 13 vel emaw a nimai thei. Tichuan tlangram, ram zo zuana Zo leipui, Zo lo te nei an nih avangin Zo, Zomi, Mizo tih hi alo piang ta ani tih hi thu dikah ngaih theih ber a ni.
 
            Kachin ho zingah Yaw tih word hi, Dr Vumson chuan "Zo" tih lo chhuahna angin a ngai a. Pu R Thangmawia chuan China hovin "chou" an tih pawh hi keini "Zo" tih nen a in ang a, Chou Enlai pawh chou tak hi zo tia lam rik ani" tih thu a sawi a.  Mahse, Khampat phai atanga nichhuahna lamah Chindwin luipui nitlakna lama min thlahtuten an kal san tih hriat chian sa mihring awmte zingah leh thlang an rawn tlak zelna sulhnuah khian "Zo" tih hi a ri ve lo va.  Kachin hovin "Yaw" lo ti ri ve mahse, keini nena inkar awmte hian "zo" (yaw) an inti ve hauh lo va.  Vawiin thlenga "Zo" inti te chu Khampat phai leh Run lui inkar tlangram Tonzawng bial chhunga mi te leh Manipur chhunga awm Annan thleng hian "Zo" thlah kan ni, tih hi chiang takin min hrilh thung ani.  Chuvangin ngaih dan dang hi pawm theih ani lo. "Naga pawh kan ni lo" an tizui leh nghal a ni.
 
         Kalemyp Buddhist Monastery-ah chuan tum kau lehkhabu a ziak kum 350 vel laia upa ni thei tur document pakhatah chuan Khampat Mizo bungpui hi Mizo te phun a nih ngei thu ziak in a awm tih l967 velah daih tawh khan,Thang Khuma chutih llaia high school student, ordained minister lo ni ta chuan, a mit ngeiin a hmuh thu leh a chhiar thu min hrilh a ni..   
 
             Tuna "Mizoram" kan tih tak mai hi, hman lai, Sap hovin min awp hma chuan, Chin Hills ani vek a.  Chin Hills atang chuan Lushei hills siam chhuah ani a.  Chu chuan Mizo ten mei mit hauh lova hnam dangin an la luah ngai loh tlangram an lo chenchilh ram chu a central lai tlemte chauh a huap a.  Lushei tawng hman theihna huang chhung chu Lushei hill ti a vuahin Sapho chuan an awp ta a.  Chu ram zimte chu tlai khawh hnuah politics alo luh hnuah, a chhungah chuan Lusheia thlahte chauh nilovin Zo hnam chitin reng an awm avangin, Lushei tih hian clan (chi peng pakhat)  chauh a huap avangin a dik lo ve, Lushei ti lovin, Mizo tiin min thlak sak rawh u, tiin R Thanhlira khan Lushei Hills tih kha Mizoram tiin a thlak tir mai a ni. 
 
            World War II zawh hnaih velah khan Aizawlah pwh Chanchin bu lian pawl "ZOMI" tih pawh a awm kha, senior citizen tamtak chuan in la hre reng ang.  Lushei hi ZO hnam zinga pakhat ve mai chauh an ni.  An tawng hi common language alo nih tak avangin  thenkhat in Lushei a thlah ho te hi an ngai Mizo bik a ni mai thei.  Mahse chu chu a diklo hul hual a.  Chuti nise Mizoramah hian 20% pawh Lusheia thlahte chu an ni lo vang.  Ralte leh Lai, Mara leh Pawih leh Paihte, Hmar, Khiangte, Khualhring, Vangchhia, Renthlei, Parte, Varte, Lawitlang, Sailo etc etc chi dang tamtak awm zawng zawngte hi Mizo an ni ve hauh lo tihna ani ang.  Lushei tawng hmang te chauh hi Mizo an ni reng reng lo va.  Mizo thisenin a hrin apiangte hi Mizo an ni a.Mizo saphun pawh Mizo-ah chhiar tel an ni.  Hnam dang a ram chhunga piangte chu, Mizoah chhiar nilo mahse, khawvel in awpna tlangpui angin a ram mi ANGA NGAIH, Mizo ni ve lo, mahse Mizo anga en ve tur an ni.  
 
           Tawng hi Mizo nih leh nih loh tehna a ni lo.  Tuna Mizo ten tawng tlanglawn (common language) a kan hman hi Lushei tawng a ni a. :Lushei a khua Seipui khua chu Chin Hills-ah khian vawiin ni thlengin a la awm a.  Chuvangin Lushei tawng hi Chin Hills tawng a ni zawk daih nghe nghe a.  Chu chu vawiinah "Mizo tawng" tiin kan sawi ta mai a.  Chuti chung pawhin Chin Hills-ah Hmarah leh hmun hrang hrangah chuan "Lushei tawng" ti ngat in Mizoram pawn lama mite chuan an la sawi reng a ni.Zaithiam Lalruotmawi pawh hian an khaw lamah chuan Lushei tawng tiin a sawi ve ngei ang.  Lo zawt ula, a dik zia in hria ang.  
 
          US-ah hian Mizo thisen a hrin ngat, Mizo tawng thiam tawhlo kan awm nual ta mai.Burmaah chuan Mizo thisena hrin ngat mahni tawng thiam tawhlo an awm nual bawk. Vairamah pawh chu ti tho tho, Arunachal, Nagaland leh Europe-ah te pawh an awm tho mai.  Mahse heng hi Mizo an ni vek.  Pathianin Mizo a siam tawh hi, sapah emaw, African-ah emaw, Japan-ah emaw tumah an chang thei lo.  Vai te pawh hi Vai tawng thiam miah lo English chauh hmang an tam em em a.  Mahse VAI an la ni reng mai ani.  Mizoram Gorkha te pawh Mizo tawng an thiam ngawt avangin Mizo-ah an chang thei chuang lo.  Hnam hi tawngah innghat lovin thisenah a ni zawk.  Chuvangin Pathianin Mizo a lo siam tawhte chu khawi ramah pawh awm se Mizo an ni reng. He identiy Pathian siam tuma tih danglam theihloh kan nihna Pathianin min siam a ni.Chuvangin Zofate chu Mizo an ni vek a. An sual pawhin Mizo an ni a, an that pawhin Mizo an ni tho bawk.  Mahni nihna hrelo an awm a, Amercan emaw, Burmese emaw, Meitei emaw, Bangalee, Khasi emaw in ti ta mai an awm chuan, chumi chu Mi boral   a ni mai.  
 
          Chhiartute hnamah i chiang theuh ang u.   Pathian thu kan bawh pelh chuan fellohna leh thilthalo tamtak a chhuak thei.  College ka kal laia kan English pachal Dr Mackett-a, history scholar chuan, "Education hian thil eng pawh, a natural course hmuhchhuah a tum a.  Chumi ang ang nun kawng kaltir hi finna leh hlawhtlinna chu ani.  Thil eng pawh, a awm dan tur (natural course) ang lova a awm chuan, buaina leh harsatna leh chhiatna te alo thleng thin a ni" ti a a sawi ka la hre reng a  ni.

Thulakna: zawlbuk.net

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E