MIZO TAWNG

08/09/2010 01:11

- S.Zirkunga

Mizo Tawng dik hman chungchanga mi thahnemngaite thuziak hi a bengvarthlakin tawng humhalhna leh tawngkam dik zawk inkawhmuhna pawimawh tak a ni.Heng mite zingah hian Pu Chhuanliana BVT hi thawhhlawk ber pawla ka lo ngaih laiin YMA Chanchinbu December 2008 chhuaka a thuziak thenkhat kha chu pawm a harsa deuh. Thumal tawpa belh ‘v’ chungchangah khan, “Kan lei hi a thatchhiat avangin kan lam peih loa, a karah ‘v’ kan zep a, lam a nuam deuh ta thin a ni,” tiin ngaihdan tlang tak a rawn siam a.Thatchhiat vanga ‘v’ hi belh ta ngawt zawng kan ni bik lo tih lam hawiin sawi ka tum ve thung a ni.

Kan Missionary hmasa Pu Buanga (JH Lorrain) leh Sap Upa (Rev. FW Savidge) ten Mizo tawng ziak dan tur an duan laia Roman hawrawp an thlan thu leh a lam rik dan mil thei ang bera sipel (phonetic form of spelling based on the well-known Hunterian system) zula an siam thu kan hmu a. Hei hi Mizo tawng thu leh hla (literature) to bul leh tun thlenga kan hman dan dik leh dik loh tehfung ber pawh a ni.A sipel dik tawk lo lai siam that chu a awm, eg:- a rik dan thuhmun, ‘shi’ tih aiah ‘si’ etc. Tichuan, thumal thenkhat hming(noun) a ni emaw ni lo emaw, ‘a’, ‘i’ leh ‘e’ a tawpte hi a lam rik dan mil leh mawi zawk (euphonic form) atan ‘v’ hi an lo belh mai a ni. (Pu Buanga Dictionary page 538,551) He hawrawp ‘v’ hi a bikin vowel ‘o’ leh vowel inzawm ‘au’ ‘eu’ tawpah leh a zawmtu consonant ‘h’ tawpahte an belh thin. eg:- lo va, lovin, lo vang, lo ve, deuh va, etc. hming bikah :- Nghinglova, Lalauva, Lalkohvi, Damhauhva, Laltheuva etc. Thu lam rik dan mila sipel (Hunterian system of orthography) atanga teh pawhin a dik hmel zawk hle. Hawrawp mal lam dan ringawt thlir lo va a zawmpui, a hmaa thu lam rik dan zula sipel an lo ngaihtuah chhuak hi a pawimawh lai ber a ni. Thu leh hla tam berte pawh hi heng thu te hmang hian vawn that an ni. Thatchhiat vanga ‘v’ hi a kara zep ta ngawt kan ni lo va, mi hmasa, a bul tumtute kutchhuak vawiin thlenga la dik reng chu a ni. Humhalha vawn nun reng hi thangtharte mawh a ni zawk e.

Thulakna: YMA Chanchinbu , March 2009

 

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E