Mizo nunzia siam that ngaite

18/07/2010 00:27

- VL Huala , Upper Republic

Pi pu atanga Mizo nunze mawi tak tak vawiin ni thlenga chhawm nun zel tlak tam tak an awm laiin, thenkhat chu chin zel atana duhawm lo leh, tihdanglam ngaite an ni a; her danglam mekte pawh an awm bawk. Bihchian tul thenkhatte tarlang ila:

Chaw ei laia inzilh leh rorel
Pi pute hun lai chuan chaw ei lai bak hi chu mumal taka chhungkaw inhmuhkhawmna hun an nei ngai meuh lo. Zan lamah chuan nula tlangvalte chu thimhmulah an hnathawk an hawng thin a; zanriah chaw eiin a zui nghal mai thin. Tlangvalte chu chaw ei kham kam thuah leh leng tura kal an rual a, a ei kham hmasate an nih thin avangin a kham hnuhnungte phei chuan an mawngphe pawh an hmuhman ngai meuh lo. Nulate lah feh hawn atangin mawng pawh hung hman lo lekin an che char char a. Chaw ei an siam a, an seng a, chawei thleng an sil fai a, inlengte lo thlen hmain la deh tur an inchhawp a, upa-in 'Mawngvawm ba' an sawite hi chu nepte a ni; an che char char mai thin. Zing lamah nise hma takah an tho a, mite aia tlai hlau reng rengin rawng an bawl a, feh chhuak hmasa nih tumin an phe dawr dawr thin.

Tlangvalte chu Zawlbuk atangin tukthuan ei dawnah an hawng a, an ei bawrh bawrh a, hnathawk turin an chhuak leh nghal mai bawk. Hetiang hlira ni tin tuk tin chhiara chhuan tam lo kal tawh an nih avangin chaw ei lai lo chu inzilh nan leh rorel nan hun tha an nei lo tih an chiang hle. An hun tha neih chhun chawei lai chu hmang tangkaiin, pa berin fate zilh nan te, rorel nante an hmang thin. An hunlaite ngaihtuah chuan remchanna an lei thiam hle.

He zonunze mawi tak hi tunlai hian a hman zui zel chi em? Hmun thenkhat chhungkaw ze kalphung fel tak neiteah chuan nakin thlengin a hman chi teh meuh mai. Chaw ei dawnin an hawng kim map map thin a, nu ber emaw, pa ber emawin zilhna thu emaw, rorel tur mu emaw chu ngaihthlak hreawm lo takin a chhak chhuak nem thlap thin a; a bik takin inzilhna avangin tumah an thinrim ngai lova, tun hun mai ni lovin, nakin zelah pawh hetiang hi chhungkaw ze thate hi chuan an hmang zel theiin a rinawm.

A tam zawk chhungkuate erawh hi chuan 'an qualified lo' ti ila kan sawi sual tam awm love. Tukthuan ei dawna la mu vum ther thur, kaih thawh chawp ngai, kai thawh pawha insual ngam khawpa tum bur chhungkua an ni a. Tlai lamah nise zanriah chaw ei hun tawha veng hmawr hmeithai ina "Khawi maw no khat chu" meng mang lova la ti duar duar chhungkuate an ni hlawm. Chhungkaw thenkhat erawh chu eizawnna avanga a huna chaw kil tlang thei lo an ni bawk. Chhungkaw tulna avanga chhungte chaw ei ruala ei thei lote hi chu, chhungkaw rorelnaa rel tel sa vek an nih avangin he subject-ah hi chuan chhiar tel chi an ni lem lo.

Chhungkaw kalphung fel tawk lo-ah chuan chaw ei laia inzilh leh rorel hi inhauna titamtu, thleng thlawkthei siam chhuaktu leh sa tui hang chhuat sil nana hmanna bul a ni duh hle. Tin, naupang emaw, hmeichhia emaw, diknaah pawh tang tha ngam mang lo khawpa rilru dawizep te, thu chiang chiah lo avanga dawp chhuah nan leh zilh nana chaw ei lai hmang thinte phei chuan hman zui zel loh a tha hle. Naupang emaw chu a tih loh tawp a nih phei chuan nu leh pa ten el-euhva an ei laiin, hlauhna nen tap hnapin chaw an ei a, arpui tuilai sa pawh hmeh mah se, mittui nen chuan an ei tui tak tak ngai lo. Puar taka chaw ei tur chuan hlim tlan a pawimawh a, hlim tlang tur chuan inhauh leh inzilh, rorelna tluangtlam chiah lo atana chaw ei lai hun hman hi chin loh a tha berin a lang. Chuvangin kan Mizo nunze mawi tak vawiin ni thlenga chhungkaw thenkhatin an la chhawm nun zel theih hi, thenkhat tan chuan chhawm nun zel chi niin a lang lo.

Inkoh dan
Pi pute hun lai atangin mipain nupui a neihin, a nupuia pa chu mipa tan chuan 'Pu zawn' a ni a, "Kapu" tiin a ko thin. Hei hi tun thlenga la hmang an awm laiin, thenkhat chuan an nupuia pate hi "Ka pa" tia ko ta sawi tur an awm ta zut mai. A dik lo a ni. Mipain nupui a neih hmain a nupuia pa chu koh dan mumal tak a nei sa kher lo mai thei, koh dan mumal tak a neih tanna chu a nupui neih atang chiahin a ni. Nupui a neih chuan a nupuia pa chu 'Pu' atan a zawn a ni a, a 'Pu zawn' a ni. Chuvangin mipain a nupuia pa chu 'Kapu' tia a koh hi a dik a, zonunze mawi chhawm nun zelna chi khat a tling.

Unau mipa leh hmeichhe fate inkoh dan hi pi pute atanga chin than dan mah nise, felhlel deuh tlatin a lang. Pi pute atanga hman danah chuan, unau mipa leh hmeichhiain fa an neih ve ve in, hmeichhe fate chuan an nu nuta chu an pu thin a, an fate pawh mipa an nih a, an aia an upat bawk chuan an pu zel thin. Hei hi ngun zawka bih chian chuan a fel dan hi a mumal lo deuh. Mipa fa chu mipa a nih a, hmeichhe faten "Kapu" tia an ko chu a mawi lohna a awm lem lo. Mipa fateah hian hmeichhia an awm ve fova, han ngaih mai chuan, mipa "Kapu" tia an koh chuan, a unau nu (far nu) chu "Kapi" tia koh ve tur niawm tak a ni. Hmeichhiate hi koh dan mumal an nei tlat lo hi pi pute atanga chin than dan mah nise, a mumal dan hi a chiang tawk lo tlat. Mizo pi pute nunze mawi leh chin dan sadai kan thiat deuh a nih pawhin pawi thui lutuk turah ngai lo ila, unau mipa leh hmeichhe fate chuan an nu leh pate unau an nih angin anni pawh unau inkohin inko mai ta sela, an inkoh dan a mumal zawkin a rinawm.

Zu rui khin
Tunhma Mizo zinga zu in thinte chu upa lam deuh te, tarte an ni tlangpui. Kutni vangthlaah emaw, hun pawimawh bikah emaw a nih loh chuan la valai deuhte leh tlangvalte chuan zu an in ngai lo. An ruih lai pawhin an chhia leh tha hriatna an hmang reng a, chatthla khawpa an ruih chuan in lamah an mu mai thin. Chuvangin mi tana hnawksak turin an awm ngai lova, zu rui an nih inhriain mite lakah an inthlahrung a, mi tamna hmunah phei chuan an awm duh ngai lo. Mite pawi an sawi palh a nih pawhin upa tha thum tawh an nih avangin miten ngaihkhatah an ngai mai a, khintlakah an ngai ngai lo. Chuvangin, "Zu rui tawng mai mai" tih te, "Zu mi an khing ngai lo" tih tawngkate hi zu rui chunga an tawngkam hman a ni thin.

Tunlaiah erawh chuan thalai tha chak zawkten zu an in tlangpui. An tha a la chak that avangin mite tihbuai pawh an hreh lova, chapona leh mi dang pawisak lohna an nei lian em em a; ramin dan leh dun a siamte leh, inthenawm khawvennate pawh an palzut hreh tawh lo. Chuvangin, "Zu rui thu mai mai" tih te, "Zu rui an khing ngai lo" tih te hi tunlai zu rui thinte chungah chuan hman chi niin a lang lo. Kan Zoram khawvel hmun hrang hrang han thlir hian, ram leh hnam hmangaihtu chuan zu ruite hi khing hreh lovin, an thu leh hlate pawh chaw tak khukin khukpui fo zawk sela, an tihmakmawh tur zawk niin a lang. Hetianga an tih chuan kan ram leh khawtlang hian zahna hmel pawh a hmu khât zawk ang a, zu rui vanga buaina thleng fo thin pawh a nep deuh ngei ang.

Thulakna: Vanglaini

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E