Mizo Nun Ze Mawi

26/08/2010 22:32

- J.Malsawma, McDonald Hill - Aizawl

Kumin 2010 June ni 15 hi YMA (a tira YLA)-in kum 75 a tlinna a lo ni ta reng mai. YMA hotuten Jubilee hriat rengna SOUVENIR-a chuang turin MIZO NUN ZE MAWI ziak turin min sáwm a. Ka tan lehkha ziak hi harsa hle mah se, YMA hotu chan lo chang ve tawh ka nih avangin pha mai turah ka inngai lo a, tawi te tal ka han ziak ve a ni.

He YMA hi kum 1935 a din a nih lai khan kum 8 mi chauh ka la ni a.  Ka pu, Primary School zirtirtu chu Aizawlah a va zin a, a cham chhungin he pawl hi din a ni a. A lo haw chuan kan khuaah YMA hi a din ve a; zirtirtu hna a thawhna khua Thingsâtah pawh a din nghâl a.

YMA hna hmasa
Chung hun laia Mizorama hna tul berte zinga mi, bungbel nawh fai, puan leh kawr sûk fai, khawlai phiah fai te chu mipui an zirtir a; mi inah te lûtin an chaw bel leh chawhmeh bel pawn lam nawh fai an zirtir a; a lo tha viau nghe nghe mai.  Hnatlang a thawh ho te an uar tan a, zawngchhang tlâk tak mai a ni.

Mizo nun ze mawi chuan a huam zau hle a, sawi tur chin hriat pawh har tak a ni.  Nun ze mawi chu chhungrila intan, lang thei, hriat theih, zawm theih, mi tihlim thei, mi hahchawlhtir thei, chhuan tlâk tak mai a ni. Chutiang nun chu hmanlai atangin Mizo zepui niin khawtlang nunah hian mawi takin a lo vul chhuak a, khawtlang leh mi tin nun a lo tihlim thin a ni.

Nun ze mawi; khawi atangin nge?
Hmanlai atanga tualzal nun ze mawi kan neih thin chu mi mal nun mawi infawk khâwm a ni thin a.  Mipa leh hmeichhiate pawhin an hna chanpualah an nun ze mawi chu an lantir thin a ni.  Nuho tui chawi, a thleng hmasain a thal hmasa tur a ni tih te chu lal thupêk pawh ni lo, mi tin thinlunga tuh a ni a, hmanhmawh vanga mi dang thal khalh leh inhnial bur bur te a awm ngai lo.  Naupang dai vâkin sava bu hmu sela, a hmu hmasatuin a ‘hual’ a, a bula miin a lo ‘dawt’ a; chu chu an inzahsak zel a ni.  Hmeichhe hna- puantah, thing phurh, tui chawi, thawmhnaw sûk fai, naupang enkawl leh eirawngbawlah te chin dan tur zawm zelin nun ze mawi chu an lantir thin a ni.

Mipa chanpual bik, hreipui leh chem hriam rawihna, in sak, lo vah, thlan laih, mi zawn, sar thi leh tui tla zawnah te kawng kal nei taka nun ze mawi pho lan a ni bawk.  Ramhnuai ngawa ‘Lo’ tur pain a en, perh a zeh tawh chu mi dangin an chhuhsak ngai lo.  Thingtlang khaw bit pui pui-ah pawh, lo tur ram inchuh an awm ngai lo. Zawlbuk enkawl dan, thing nawi keuh thu-ah te, thing nawi keuh si lo, keuh anga lang man chhuah hremna thing nawi vawi tir dan ding lai chu miin an zah a, an zawmin an intibuai ngai lo.  Tunlai pawh hian tih àwm, ri kham chin hi a awm zel a, mi pangngai chuan an zawm mai thin.  Mahni chanvo bâka duham vanga dap dun dun an awm hian nun chu a mawi thei tawh lo a, tunlaia kan huat êm êm ‘corruption’ chuan zung a lo kaih a, Mizo nun ze mawi chu a hliah ta thin a ni.  Tunah hi chuan hmeichhe hna bik, mipa thawh tur bik pawh a awm ta meuh lo ve.  Kan remchan dan ang angin kan inthawh pawlh ta zel zawng a nih tâk hi. A tha tho e; amaherawhchu, hna kalphung, rinawm taka kan thawh thin hi chhunzawm zel a tha ang.

Nun ze thuhmun : intawm zel
Mizo tualzal nun hi a mawi êm êm a, hmangaihnaa insuih khâwm nun, duham leh hlâwk bik tuma beih a ni ngai lo.  Thuhnuairawlh, mahni aia mi dang duhsakna thinlung ze mawi nei kan ni a, Lal te, mi neinung te, mi chhe fate pawh inthliar hrang lo, ei tur a awma ei ho, thawh tur a awma thawk ho nun zepui chu kan nei a, tunlai mite zingah pawh he ze mawi hi a la chuai chuang lo.  Hriat ngai loh mikhual pawh thleng mai, an ei man pawh thing ngai lo, an chawfun pawh la tumsak zel kan ni.  He nun dan hi a tha thlâwt mai.  Tunah hi chuan kan hnung tawlh ta deuh a ni.  Mizo nunah chuan engkim hi kan intâwm ta emaw tih awl tak a ni.  Phurhhlan, hriamhrei, saum, chingal, anhnah, sa hrang te inhleh tawnin chhungkhat ang hrimin kan khawsa thin.  Zan mut reh chhung tih lohah chuan tu inah pawh, an chaw ei lai te pawhin kan lûtin kan inlen tawn a, hna pawh, puih ngai chu inpui tawnin theih tawpin hna kan thawk thin.  Mi thatchhia, mi khawngaih dila kutdawh pawh an awm ngai lo.  Kutdawh hi kan hmu ngai lo reng reng a ni.

Nun ze tha, rinawm: sem sem dam dam; ei bil thi thi
Mipui an rinawm a; mi thil an la mai mai ngai lo.  In pawh kalh loin an chhuahsan a, an awm lo tih entir nan thingfâk pakhat kawngkharah an tung mai a ni.  An in chhung ro hlu; thi leh dar te, silai te, sum leh pai, buh leh bal te- engmah a bo ngai lo.  Intanpui tawn hi an thupui a ni a, neinungten retheite an khaiding thin. Buh leh bal, ei sen loh neite chuan hausak nana hralh lo in, mi rethei, leina tur nei lote hnenah an pe mai thin.  “Sem sem dam dam, ei bil thi thi” thuvawn hi an hlen chhuak thin a ni.  Mizo nun a Corruption do leh, he Sem sem dam dam, ei bil thi thi thupui hi Kristian inzirtirna a ni a, Kristian zawng zawngin zawm tur a ni ang.

Tlawmngaih leh nun thianghlim
Tlawmngaih chhuah hi a ropui bawk.  Thlawhhma la a, ei zawng kan ni bawk a, hna bung tinrengah hian thawk thei lote tanpui hi a tul a, tlawmngaih chhuahna tur vek a ni.  Hna tul leh hlauhawmah pawh “Khaw nge, keimah ka awm alawm” ti thei an awm chuan rilru a hahdam thin.  Thu khuh, thuhnuairawlh, mahni aia mi dangte tha zâwk leh tluk lohah an ngai a, an lakah an hawihhawm êm êm thin.  Nupui pasal zawn kawngah pawh hawihhawm thiam hi an hlawhtling cháwk a ni.  Miin pawi khawih se, phuba lâk tuma beih ai chuan thu thaa inrem hi a chhuanawm fo.  Val upa pakhat thu min chah hi a ho hle nâ a, tih chi tak a ni.  “Khual zinnaah te, khawi hmunah pawh tlangval hoin mitthi te, damlo te an zawn i hmuh hlauh chuan, i ipte nghat la, zawn ve rawh.  Pên thum bâk i pên lo ang.  ‘A tâwk e, kan lawm e. I kalna turah kal zel rawh,’ an ti mai ang a, nang pawh i lawm ang," a ti a.  A tih chi khawp mai.  Hei hi nun ze mawi a ni.

Upa thu
Mizo nun timawi bertu pakhat chu aia upa zah hi a ni.  “Upa thu zawng a tha nge nge ngai e” tia an thu zawm hi a hahdam a, chin zui zel chi a ni e.

Tunah chuan kan khawsak dan leh kan ei zawn dante a lo danglam ta a.  Kan nun ze dik tak, kan sawi tak ang te khi kan pho chhuak zo lo fo a ni mai thei.  Mahse, heng nun mawi tak nunpui zel duh tan chuan kawng a awm tho.  Kan aia rethei zâwk tanpui theih dan a tam mai.  Vantlang thatna tura beih dan pawh a tam.  Thahnemngai taka hna tha thawk mang si lo a, mi neih eisak tum rana ‘huau huau’ buaipui hlut te hi sim tur a ni ang.  Kan ‘huau huau’ hian tha leh sum a heh a, rilru leh ngaihtuahna fim pawh a chai buai thei.  Heng thil hre reng chung hian YMA pawh hian kal fimkhur kan zir tur a ni ang.

Kan thu tàwp nan kum 1940-a Sakawrdai khuaa ka sikul kalpui, Pu R. Rochungnunga (tuna Vairengte a awm) hla hi i sa teh ang u:

Thlir zel ila Zofate nun,
A mawi chuang e, an rinawmna;
Khar lai kalh nan fakthing a tâwk,
A bo ngai lo chhêk buh bal zawng;
Zo fate lènna ramah hian.

Ruk ruk, tualthah, uire, ei ruk,
Tual a leng lo, Zofa zingah;
Chutiang ti zaleng zingah,
An leihnawng thin chhantu an vai;
‘Dam reiah pawh tlâk lo’ an ti.

Thulakna: YMA Souvenir (Zawlbuk)@ www.centralyma.org.in

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E