Mizo Kan Tih Hi

14/08/2010 13:30
- Dr.Lalchhuanawma Tochhawng

Hmar nula zaithiam a lo lar thar a. Mi thenkhatin thu dengkhawng tak takin an bei fo mai a. Aizawl khawpuia cheng, inti changkang tak takte hian Mizo tih hi kan man fuh lo niin ka hria. Mizo kan tih hian enge a huam chin tih pawh hi sawifiah fo a tul dawn a ni awm e. 


Mizotawng hmang chauh hi Mizo an ni em? Kum 1986 vel khan Guwahati-ah Mizo tlangval pakhat nen kan inhnial a. Ani chuan, “Mizotawng hmang chauh hi Mizo kan ni, a ti a. He tlangval ngaihdan hi ka rin ai daihin a lo tlanglawn a. Hetiang ngaihdan hi kan tlansan viau tawh emaw ka tih hnuah, tunhnaiah hian mithenkhatin an lo la pawm reng mai tih a lo lang leh a. A pawi hle. Mizotawng hmang chauh hi Mizo an ni thei lo. Ralte theuh theuh, Fanai theuh theuh, Hmar theuh theuh, Paite theuh theuh, a then kan ti Mizo ang a, a then kan ti Mizo lo dawn a; awmzia a nei thei lovang. Chutih laiin, Mizorama piang, Mizotawng chauh thiam tam tak chu Mizoah kan chhiar hlei thei si lo. America lama awm, Mizotawng thiam mang lo tam tak chu kan ti Mizo leh em em lawi si a. Mizotawng hmang chauh Mizo nih theih a ni lo.

Miin a pianpui tawng a hman hian tumahin kan sawisel thei lo. Chhim lama ka awm laiin, Aizawl nula pakhat chuan, “An inah han leng ila, anmahni tawngin an inbe zel a, ka ning, a ti.


Kan inah hian sap emaw, vai emaw, Mizotawng thiam hauhlo lo lenglut sela, kan chhungkuain saptawng emaw, vaitawng emaw kan hmang nghal thut thei ang em? Chutiang khawpa hawi zau leh changkang chu Aizawlah hian chhungkaw engzat nge awm ang? Keimahni pawhin kan tih theih loh hi engatinge midang lakah kan phut thin? Mahni inchhung khura keimahni pianpui tawng ngei kan hman thu-ah hian sawrkar meuh pawh a inrawlh ngai lo.

Mizo hnahthlak zingah, tawng hrang hrang a tam a. Zai khata luantir theih ni sela chuan tawng hausa tak kan nei mai tur a ni. Mahse, keini Mizotawng hmang inti, Mizo bik lutuk hian harsatna kan siam zawk fo thin. Kum 1993 KTP Inkhawmpui lianah khan, Saiha atangin Mara tlangval kan palai tir ve a. A tawng thluk tlema danglam deuh chu a thlenpuiten nuihza siam nan an hmang fo thin a. Inkhawmpui zawh hnuah, rei kan Kohhranah a awm lo. Presbyterian Kohhran a chhuahsan thuai mai a ni. Sapram atangin sap tlangval, Mizotawng thiam manglo lokal se la, kan intlawnsiak huai huai awm si a. Hnamah kan chiang lo a ni.

Prof Siamkima Khawlhring chuan, “Awmna hmun a inthuhmun loh avangin thil thuhmun sawi nan thu mal hrang hman chungchang thuah hian inhmuh hniamna leh innuihzatburna a lo awm chhan hi eng dang mah ni lovin, induh tawk leh chapo vang a ni ber, a ti a. Heihi Mizo diktak intiho nihna chiah niin a lang. Prof Siamkima sawi bakah hian mawlna leh khaw hawi zimna hi a chhan lian tak a ni bawk awm e.

Lusei chauh hi Mizo an ni em? Hetiang ang ngaihdan zim hi mi thenkhat chuan tun thleng hian an la nei fo nia maw le. Mizo Bible-ah hian Mizo (Lusei) tiin an dah a. History of Mizo-in Burma (By B.Lalthangliana) phek 37-para 3na-ah chuan, “Mizo (Lusei) inti, tih tum hnih lai a lang a. Heng bakah Hmanlai Mizo Awmdan by Laithangpuia phek 4-na te, Mizo History by V.L Siama, phek riatna te han en ila, Lusei bak hi Mizo-ah an chhiar lo niin a lang tlat a ni. Lusei chauh hi Mizo an nih phawt chuan buai tur an va han tam dawn em! Ralte, Hmar, Sailo, Chawngthu, Khawlhring, Khiangte, Fanai etc an tam lutuk. Tuna Aizawl-a mi langsar leh mi pawimawh tam tak hi Lusei ni lo an ni hlawm a. Lusei-ho aia an Mizo lohna a awm chuang lo.

1892 March ni 1-a R.B Mc Cabe ziahah chuan Mizo tih hian Pawi, Paihte, Hmar, Lakher, Ralte etc a huam tir a. Mc Cabe hian Sailo lal Lallula thlah te ka ngei ka dawn atanga a ziah a ni. (C.Chhuanvawra; Mizo Hnahthlak, Aizawl MSO Magazine 1993-94 phek 71, Para 4) Mc Cabe ziah bakah hian Mizos : Society an Social Changes tih buah chuan Mizo tihin a huam chin a tarlang bawk a: Lusei, Ralte, Hmar, Chawngthu, Pawi, Khawlhring, Khiangte, Chawhte, Ngente, Renthlei, Tlau, Pautu, Rawihte, Zongte, Vangchhia, Punte, Paite, Fanai pawi, Thahdo, Pangkhua, Lakher, Mawk with their many sub clans.(Dr Sangkima; Mizos : Society and Social Changes phek 3, para 5). Hengte hian kan rilrua kan ngaihtuah aiin Mizo tih hian a huam zau tih a tilang chiang hle.

Hnam khata awm awm tak hi kan inla hrang tel tel a, kan in enhrang fo mai a. Zoram Khawvel ziaktu chuan, “Mizo intiten Mizo hnahthlak thenkhatin Mizo intih an iai nachhan ber hmuh chhuah an duh chuan anni an indap hmasak a ngai a ni,a ti a (L.Keivom; Zoram Khawvel 2, phek 250, para 2). I han indap chhin ang u hmiang.

Thil tam tak sawi a ngai lo. Kan rilru zim vang hi a ni ber. Rilru zim leh khawhawi zau lo chu a chapo ngei bawk thin. Chutiang mi chuan tumah a hui khawm ngai lovang.

Mizoram hi a zim tehlul nen, kan thinlunga Mizoram chin hi a la zim leh zual cheu mai a. Aizawl nula pakhat chuan, “Aizawl khawpawn thingtlanga hnathawh ai chuan vairama hnathawh ka duh zawk, a ti. Mi thenkhat, thinlunga Mizoram chuan Tuirial a kan zo lo va, Tlawng a kai zo hek lo. Hengho zingah hian lehkhathiam tak tak leh sakhaw hruaitu meuh pawh an tel miau avangin tihreh a harsa a ni.

Kan rilru leh thinlunga Mizoram leh Mizo hian a huam zim em avangin thildangah pawh huang kan zauh hlei thei lo va. Midang tan Mizo intih a harsat phah fo thin. Tawng thuah leh chetzia leh nih phungah te kan puan in hi zauh thiam a tul hle tawh a ni.

Kan lehkhabute meuh pawh hian kan sawi tak ang khan an huang an zauh hle a tul a. High Scool kan kal laia kan zirtirtu pakhat chuan, “Zirlaibute hi an tha hlawm hlein a lang a. Mahse Mizoram pum huap rilru atanga ziah a ni lo thin hi a pawi a ni. Aizawl pain Aizawl atangin a ziak a. Khi tah, Saitualah khian, te a han ti a. Tuivawl chhaklam tan chuan chhiar dik ve theih a ni miah lo, a ti thin a. Mizo History hming puin lehkhabu a chhuak nual tawh a. Mahse, Lusei History ni awm tak tak deuh vek an la ni hlawm. Mizo hnahthlak funkim history bu kan neih te chu Mizoram pawna mite kutchhuak a ni deuh zel thung. Hei hian thuziak mite rilru pawh a la zauh tawk lohzia a tilang chiang hle a ni. Mizo History leh Mizo Culture Lusei huang chhunga khung tlatna boruak zim tak mai hi tlansan a hun tawh hle.

Mizotawng ngeia ziak, Mizo hnahthlak funkim History bu kan neih a hun tawh hle a ni lawm ni? Tuna a awm sa, mi rilru a ni lo lama hruai kawi thei chite hi a neitute hian an siam tha thei ang em?

Mizo hnahthlak fun kim History hi School-ah zir ni se la. Mizotawng subject-ah pawh pawlsang deuh chinah tal hi chuan Mizo hnahthlak tawng chi hrang hrang zirtel ni bawk se la. Tawng tih hausakna a nih bakah inpumkhatna thlentu a ni ngeiin a rinawm.

Mizo inti, Mizotawng hmang tute ngei hi in enfiah ngam ila. Mizo hnahthlak zawng zawng len theihna tura kan rilru hi tih zauh a hun tawh hle a ni. Tunah hian keimahni lam inenna chauh kan ziak a. Lehlam a mite kan en tel lo va; a tul ber bawk hek lo. Keimahni ngei kan inchinfel chuan harsatna lian tham a awm hauhin ka ring lo. Mizo hnahthlak tam takin Mizo an intih hreh chhan hi zir chiang ila, a tihrehna ngaihtuah bawk ila, inpumkhatna lamah hma kan sawn ngeiin ka ring.

Ram tin kil tina Zofate zawng hian, 
Suihlung ruala thinlung hmunkhat puin; 
Hmangaihnaa insuihkhawm zel hi, 
Kei ka lungkham leh duhaisam a ni. (Capt. LZ.Sailo)###

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E