Mizo Culture leh Identity Thlir Lehna

28/10/2010 00:23
- H.Vanlalhruaia

          Kum tam a liam ta! Zohnahthlak identity ala chiri chho ta zel mai. Kan mithiam ten theihtawpin tan khawh thin viau mahse, kan boruak hip fuh tawk loh avangin kum zabi 21-na kan chuan kai tawh hnu pawhin kan lungrual thei meuh si lo. Zohnahthlak tlang hrang hranga awm thenkhat ten mahni chibing (lineage/clan) hnam hming kan la hmang ta zel a. Chin Hills leh Manipur Zohnahthlak unaute zingah Zomi inti an awm a, thenkhat ten Chin emaw Kuki tih an la hmang zel bawk a. Heng bakah, Mizo hnahthlak chibing engemaw zah, hmun hrang hrangah, tlahlang tak takin kan awm bawk a. Thenkhatin Israel thlah niin an insawi chamchi bawk a. Mi thenkhat ten chibing (lineage/sub-clan) hming hman duhpawl kan awm bawk. Tin, Mizoram-ah Mizo tih chu official taka hman a ni na in, Mizoram pawna zohnahthlak mipui mimir ten an pawm dan erawh a danglam viau thung si.  Mizo nih harsa ti kan la tam in, a thlazar hnuaiah hian kan ngaih a la ngam famkim thei meuh si lo. Mizoram chhunga mi ten, Mizoram pawn zohnahthlak awm tlema mani chibing tawng la hmangte kan hmuh dan pawh a dik thin meuh si lo. Mizo-Two tih tawngkam thlengin thangthar ten an hmang hial a ni. 

          Hetiang hian i han ngaihtuah teh ang. Zohnahthlak-te chhuahna bul, Mogolian thlah kan nih thu te emaw China emaw Burma ram emaw Israel ram emaw atanga chhuak kan nih thute chu mithiam zawk te chaiah dah ila. Tuna kan thu khel tur chu, tun dinhmun a Mizoram chhung leh pawna Mizo tih kan pawm tlan theihna tur, cultural identity / kan hnam ziarang chungchang a, kan lehkhaziaktu ten an tarlan dan leh mipui mimir ngaihdan chungchang a ni. Mizo hnam ze chipchiar tawk tak bihchian nan entirna tlem te, chawhchawrawi deuh tak a tarlan tum a ni. He thuziakin a tum ber chu, keimahni Mizo ngeiin hnam chanchin ziak a kan vawn that tantirh a tanga tunlai hun thlenga kan chanchin chhuitu leh ziak tuten culture chungchanga culture zeding kan thlirna a kan khaw hmuh fiah tawk lohna tarlan a ni.

          Mizo hnahthlak chi tinte hi chhungkaw khat dik tak kan ni. Hemi tichiang em em tu chu chhuahna thuhmun nei kan nih mai bakah, culture pakhat chipchiar zet kan nei bawk. Culture pakhat chhungah chuan, Mizo hnam hrang hrang ten ziarang (customs/ traditions/beliefs) kan neih hrang ve thliah thliah a. Hei hian Mizo chhungkua a culture hrang hrang tihna erawh a kawk lo va. Chhungkua a, kan dan leh hrai (traditions/customs/beliefs) peng darh hlek hlek tihna mai chauh a ni. Hei tak hi kan culture hausakna, kan ziaktu leh kan mithiam hmasa ten an huihkhawm thiam hleih theih si loh chu a ni.

            Thangthar khawvel kan chuan kai hnu thleng hian kan la hlamchhiah zel ta rih a ni. Lusei leh a hnaivai (Lusei hnamten an hip khawm (hegemonised) hote dan ngawr ngawr hmanga Mizo hnam hi din kan tum tlat a. A kalh a kim thei ngang lova, Mizo hnam tamtak kan hlam chhiah hle a tih theih. Ka ziaktu hmasa ten hnam nihna tak emaw Mizo nihna tak emaw an hre chiang lo a nih a rinawm, hemi a nih loh pawh in, kan hmaih lui ngat a ni ang. Kan Mizo lehkhabu chhuak hmasa tam zawkte hi siamthat (re-construct or re-writing) that fe anih loh chuan, thangthar hnam leh khawtlang chanchin zir mekte leh zir zel turte tan hmansual hlauhawm tak a ni tawh. Entirnan, Rev.Liangkhaia (Fam) chuan, Mizo hnam hming a khawn khawm that teh lul nen, Mizoram chhung ngeia awm Mara hnamte a hmaih der mai nia! V.L Siama chuan, Pawi (Lai) leh zohnahthlak tam takte chu, Mizoah a chhiar lo hrim hrim niin alang. Zatluanga chuan, Mizo tih chu, Lusei atang ngawr ngawrin a din bawk. Heng hote hi entirna tlemte mai chauh a ni. Kan hnam chanchin ziahna pahnih / khat bak hi chu, chik zawka chhut cheuh cheuh peih tan chuan, kan khawhawi a zim hretin, tualchhung khaw pakhat emaw ngaihdan ngau ngau a tih theih rum rum mai.

         Engpawhnise, heng kan han sawi mekah hian, kan rualute hnathawh fuh tawk loah an mahni mawhchhiat tumna ngawr ngawr erawh ni lo sela. Amaherawchu, tunlaiin kan hnam chanchin ziakna hmasate hi zir chian a, huap zau zawk leh dik zawka siamthatna hna kan thawh zel hi kan hnam thanlen chhoh zel nan atul-in-atul tak meuh tih kan hriat atha hle.

          Ngun thluk zawka chhut cheuh cheuh peih mi tan, zohnahthlak Identity harsatna hi culture chungchangah a innghat thuk tak zet. Zo hnathlak chhungkua, culture thuhmun nei si, engatinge kan inlungrual theih loh fo si le? Kan culture pakhat chhungah chuan, ziarang hrang hrang a awm a, hei hi kan inpawmpui thiam tawk lo a ni ngei mai. Engtin nge kan cultural identity  chu kan suihkhawm ang le? Entirnan, kan lehkha ziaktu thenkhat ten Mizo tawh phawt chuan Zawlbuk an nei ngei ngei thin emaw kan ti ngawt a. Mizo hnam thenkhat, entir nan Mara ten an nei hauh lo. Heti anih chuan, Mizo kan ni velo intih na chance a awm tlat. Zawlbuk neih hunlai khan, mahni hnam chibing hming (kinship/lineage/clan/sub-clan) kan la hmang theuh hlawm a. Khami nihna ang tak khan, Lusei leh Dapzar Paite ten Zawlbuk an nei emaw ti thin zawk ila. Lai emaw Mara emaw ten nei lovin, nula inah tlangval an riak mai thin tih ve thliah thliah hi afuh zawk niin alang. (Laiho hian a hnuah Lusei tihdan lachhawngin Zawlbuk an nei ve chauh a ni) Hmanlai Mizo nunah Zawlbuk pawimawh zia leh khawtlang nun a kenkawh zia kan sawi thin rual hian neive lo ten an khawtlang an venhim ve tho zia leh tun thlengin an la chimit vek bik lo tih hi kan hriat a tul. Zawlbuk awm lohna hmunah (institution) inrelbawlna dang enge awm ve tih chhut ngun a zirchian lehzual hi kan mithiamte tihtur a ni.

            Anih leh hahip a kan sawi fo thin, Rihdil te hi Zohnahthlak hnam zawng zawngte nen inkungkaihna a nei kher em? Tuna Mizo hnam dan kan tih fo pawh hi Lusei dan kha a ni mai lo maw? Mizoram chhung ngei ngei a, awm Lai leh Mara te dan kha a tel ve chiah em ni? Mizo hnahthlak zawng Mizo kan tih chhungah hian hnam thenkhat ziarang kan hmaih pheng phung thin hi a fuh thei mawlh lo.

              Kan lehkha ziaktu thenkhat ten culture ziarang tarlan nan, Mizo ten an neih ngei ngei an tarlan fo thin pakhat chu tlawmngaihna a ni. Amaherawhchu, Mizo hnahthlakte zingah, athu ngau ngau a nei lo kan awm tih erawh kan hriat ve a tha ang. A hminghmerh (term or concept) a tlawmngaihna tih nei ve lote hian a takin tlawmngaihna an neilo tih erawh a kawk hauh lovang. Kan tarlan leh hmandanah hian kimchang tawk lo a awm mai chauh zawk a ni. A hminghmerh emaw thumal emaw hi apawimawh lai ber ni lovin, chhungril nuna (moral code) thil tha tihduh tlat thin Mizo hnam tawh phawt ziarang a nihna hi a pawimawh lai tak zawk a ni.

           Hmanlai hunah khan, Mizo zawng zawng in Chapchar Kut, Mim Kut, Pawl Kut hi an hmang vek lem lo tih pawh kan hriat a tha ang.  Mizo vek kan nih chuan kan ta vek a ni a lawm kan ti liam leh mai zawk dawn em ni? A tlukpui leh a anpui emaw kut dang emaw, entirnan Thokut, Hlukhla, Kiches, Pakui, Lalia te leh a dang tam tak a awm ve tih hi tarlan a va hun em! Hnam chanchin chhuitu te zingah HMANLAI PI LEH PU hunah khan kan ti dap dap dawn a nih chuan hei hi tih makmawh a ni.

           Sailo lal ropui tak takte bakah Lai-bawi, leh Mara-Abei, Fanai Lal, Ralte Lal etc an awm ve dawn lawm ni? Sailo lal ropui kan tih fote bakah hian Mizo lal dang (eg Hnamchawm lal) pawimawh tak takte dinhmun leh nihna (role) hi kan tarlan tan a hun hle. Sailo lal hote kha an mahni lawng lawng khan an chak bik a ni hauh lo. Mizo hnamdang thenkhat (hnamchawm lal) te nen inthurualin (alliance) a ni, ram an lak fo ni. Hnam chawm Lal emaw te awm lo khan Sailo ho kha an Sailo tak tak hauh lovang. India historian lartak pakhat Romilla Thapar chuan, hnam leh khawthlang nihphung tak hi Lalram tenau zawka Lalte dinhmunah a inghat ber” tiin alo sawi nghe nghe tawh. Khawthlang rama zingbing miten an dah pawimawh em em chu, sorkar record (official record) huang pawn mipui mimir a te ber atanga a lianber thleng ngaihdan hi a ni.

             Tunlaiin, America leh Europe rama zirbingna huang chhungah, popular culture an tih mai chu a lar chho em em a. He zirna huangin a tum chu mithiamte emaw sorkar hnalian chelhtute leh khawthlanga mi challang (intellectual/ elite) chauhte ngaihdan nilo, mi hnuaihnung berte nunzia, ngaihdan leh hmuhdan (history from below) a tanga hnam chanchin chhuina hi a ni. Khawtlang nun pum kha, mi narante nunzia a tanga bih tanin an thlir chho thin a ni.

          Kan lehkhaziaktu hmasate hian an fimkhur tawk loh avangin, kan hnam ziarang (cultural identity)hrang hrang te hi kan la sawk khawm tlat lo. Mizo chanchin chhuitu/ziaktute pawn hetiang hi kan ngaipawimawh tan a hun hle. Hnam chanchin chhuina huang kan zauh a hun ve tak zet tawh. Hmanlai, Mizo hnam hrang hrangte awmdan leh tihdan (customs/traditions/ beliefs) hrang hlek hlek kha sawilang thliah thliah thin ila. Hemi atang hian a hran hlek hleknate kha kan ziaktute hian Mizo culture  chhungah suihkhawm an tum tur a ni. Kan hran hlek hlek nate hi kan culture ze ding chhung a, dan leh hrai darhzau (diversity) ve zia te, kan culture tihausatu anih si ziate kan thlir thiam fo tur a ni. Kan hrang tak tak lo tih ringawt hian, kan hnamzia a sawikhawm zo lova, Mizo hnam thenkhatah chauh sawrbing chi lah a ni hek lo. Lusei leh a sangawizawnpuite tihdan ang deuh ngawr ngawt kha tunlai thlengin Mizo tih dan kan ti awlsam mai thin. Heng bak (Mara, Hmar, Paite, Lai, Thado, Kuki etc) ho hman dan erawh kan dah hrang deuh tlat thin. Heng Lusei leh hnamdang tlemte te nunzia ngawr ngawr chauh ni lo, Mizo hnamtinte, te lua lianlua awm lovin, Mizo hnam tan an hna thawh theuhte kan tarlan thiam tan a hun ta hle.

           Mizo cultural chungchang harsatna hi pan huaisual ang maia enkawl thiam ngai anih zia hriain, a bikin kan ziaktute hian tawngkam (concept/term) kan hman dante hi i fimkhur deuh ang u. Mizo hnam tenau (lineage/clan) zawkte dan leh dun a hming hmerh dik takin tarlang ve thin ila. Hei hian Mizo identity  insiamchho mek zelah nasa takin a tanpui ngei ang. Pawnlanga Mizo kan ni vek ti liam ringawt lovin, engvanga tunthlenga rilru hmunkhat pu hleitheilo nge kan nih? Engber hi nge kan harsatna tih hi mithiam zawk ten a chin chhuaka chhui chian a hun hle. Tunlaiin, identity harsatna hmuhthiam lovin, tihkian theihna tur nia ngaiin politics thil ngau ngau nen kan thlun zawm a, a kalhkimlo lai hmuh kanin inlakhran duhna emaw kawngdang reh talh tumna a thlen mai thin. Kan harsatna hi politics thil ngawr ngawr a hmehbel tum hi thilfuh ber niin a lang lova, culture chungchang kan chhui nawn leh a, famkimlo leh siamthat ngai lai a piang kan siamthat (re-construct) zawk a hun e.!

           Mizo hnam tinrengte hian lungrualte a kan lawina tur hmun (public sphere) kan mamawh takzet a. Chu hmunah chuan Mizo hnahthlak zawng zawngte kan nihphung leh ziarang (culture) te hian engthawl takin hmun tha an luah vek ang. A bik tih a ri lo ang a, kan hnam bik (lineage/clan) tih dan chawilen duh bikna leh midang chimral tumna hi a awm tawh ngai lo ang. Lungrual takin kan leng ho dial dial tawh ang. Nia, chhungkhat rual tak ni dawn mahila kan ngaihdan leh duhdante kan inzahtawn a tul dawn reng a ni. Unau zingah te ber leh lian ber pawh awm chuang lo a, ngaihdan leh duhdante inngaihthla tawnin lungrualna kulhpuiah kan lawiza mai dawn a ni. Tlangtin, hmun tin leh kar hlaah he chhungkua a mite hi awm darh sung mah ila, a tlang leh ruam hlatna te chuan kawngro a su tawh lo anga, chu inunauna chu thinlung chhungah sawifiah hleihtheih si lovin a chiang thung si ang. Chu hmun, Mizo zawng zawng ten kan luah tur ram chu Zofa tinte ban phakah hian a awm e. Chu chu, kan Mizo culture chhunga ze tinreng kan huihkhawm thiam hun tur hi a ni.

A rei lua em mai, unau hmelhai
A dang chuang ne maw
Zo, Mizo, Zomi leh Thado Kuki
Chhulkhat hrin theuh theuh;
Chibing tih bo se, in ngaidam tawn in,
Lungrual ten i leng za zawk ang.


Thu ziak rawn thenkhatte:

1. Anne Kane “Reconstructing Culture In Historical Explanation: Narratives As Cultural Structure And Practice” in History and Theory: Studies in the Philosophy of history, Volume-39. No. 3. October 2000.
2. J.R Porter & R.E Washington, “Popular Cultureâ€
 in American Quarterly, Vol-35, 1983.
3. John. R Hall “Cultural Meaning and Cultural Structures In historical explanationâ€
 in History and Theory: Studies in the Philosophy of history, Volume-39, No. 3 October 2000.
4. Romilla Thapar: Ancient Indian Social History: Some interpretation, Orient Longman 1979.
5. Lewis D Wurgaft, “Identity in world history: Postmodern perspectiveâ€
 in History and Theory, Vol. 34, No.2 May 1995.
6. Karen A Cerulo, “Identity Construction: New issues, New Directionsâ€
 in Annual Review of Sociology, Vol-32, 1997.
7. Simon Harrison, “Cultural Boundariesâ€
 in Anthropology Today, Vol-15, No.5 October 1999.
8. Isaac Sequeira; Popular Culture: East and West, B.P Publishing Corporation, Delhi 1991.
9. Jurgen Habermas, The Structural Transformation of the Public Sphere, (trans) Thomas Burger& Frederick Lawrence, Cambridge, M.A MIT, 1991.
10. Barry Reay (edited): Popular Culture in Seventeenth-century England, Great Britain, 1985.
11. Baidyanath Saraswati (edited): Tribal Though and Culture, New Delhi, 1991.
12. S.P Sharma & J.B Sharma (Edited); Culture of Indian Tribes: Concept and Identity, New Delhi, 1998.

Thulakna: Zawlbuk.net

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E