LITERATURE THA PAWIMAWHNA LEH HLUTNA

25/08/2010 23:32

- Upa Dr.R.L.Thanmawia

Literature awmzia
Literature chu thuziak engpawh, mihring nun nena inlaichinna nei hi a ni a. A zau zawnga sawi chuan thuziak engpawh, thamral mai lo tura ziaka vawn that reng reng chu literature tiin a sawi theih. Chuvangin literature tha leh thalo inkar chu a hla hle a ni. Literature tha chu mihringte tana lunghlu a ni a, literature thalo chu tur hlauhawm tak a ni thung. Thu leh hla thalovin nun a hruai sual theih tluk bawkin thu leh hla tha chuan mihring hi hmun chungnung berah a hlangkai thei thin. Literature thalo chu a awm teh meuh mai, amaherawhchu literature tia sawi hian 'tha' tih hi sawi tel chiah lo mah ila, rilru chuan a zawm nghal thin. French tawnga Literature sawina tawngkam hian a nihna a sawi fiah ber a ni an ti thin. French tawng chuan, "Belles letters" an ti a, chu chu thuziak mam, thuziak duhawm tihna a ni.


Goodman chuan Literature chu, " Tha chungchuang, mawi famkim, thudik kum hlun a ni," tiin a sawi. Literature tha chu thuziak engpawh, mihring nun nenena inlaichinna nei, eng hun lai bik emaw atan ni mai lo, eng hun pawha mihringte tana hlutna nei hi a ni. Chuvangin a thu ken chu sawi loh, a ziak dan hmang pawh a pawimawh tel a. Tawng uchuak leh thu dengkhawng tak tak hi literature tha a ni thei lo. Tawngkam mawi leh thuziak dan kalhmang tha a nih a ngai, Thu tha leh thu dik tak pawh nise a ziak dan hmangin a zir loh chuan a hlutna a nep thei. Literature tha chuan hun bi leh ramri a nei lo va, mihring nun a pawl hlim a, a nung reng thin.

A hlutna leh pawimawhna:
Literature tha hlutzia leh mihring nuna a pawimawhzia hi sawi sen a ni lo va, mi pakhata fiah vek theih pawh a ni hek lo. Hun hrang hranga mite tan hlu theuh mahse, a hlut dan a inchen lo va, ram hrang hranga mite leh mi hrang hrangte tana a hlutna pawh a inchen hek lo. Amaherawh chu a hlutna leh a pawimawhna hi sawi tawh awm thei lo khawpin a ni lawi si. Kan ngaihtuahna kaihruaitu atan tlem azawng han tarlang i la:

Hringnun darthlalang a ni.
Literature chu hringnun hlimthla tarlanna a ni a. Thawnthu hmangte, lemchan hmangte, hla leh thu tluang hmangtein miin a suangthuahna khawvel a din a; chu khawvela chengte nunzia leh thil thlengte chuan planet danga mite nun ni lovin mihring nun hi a tarlang a, Darthlalang kan bih a, keimahni kan inhmu a, insiam that ngai laite kan insiamtha thei ang hian Literature hi mihringte'n kan inbihchianna hmanraw pawimawh tak a ni.

Hnam darthlalang a ni. 
Literature chu mihring mimal tin nun ze hrang hrangte tarlanna a nih rualin hnam nun nawlpui tarlanna a ni a, inbih chianna darthlalang pawimawh ber a ni bawk. Ram leh hnam dinhmun hi an thu leh hla atang a chiang ber an ti thin. Hnamte hnama phuarkhawmtu, ti thanga tiropuitu chu thu leh hla hi a ni. Matthew Arnold-a pawhin, " England hi a hla neihte hian a tih ropui ang tluka tiropuitu thildang engmah a awm lo," tiin a sawi hial a ni ( Essays in Criticism ).

Ram hmasawnna chabi a ni:
Thu leh hla tello chuan ramin kal a siam tak tak thei ngai lo. Literature nei tha ram chu a changkang nge nge thin. Literature thain a chawm loh, sum leh paia hmasawnnaah chuan nunphung a tlahniam a, rorel khawl a kalsual thuai thin. Wordsworth-a meuh pawh hla phuah thiam Miton-a a han boral chuan a thlaphang a, heti hian a au chhuak ta hial a nih kha.."Hmanlai English-ho chhuanawmna a bo zo va, chhung lam hlimnate kha duhamnain a luahlan zo ta. Aw! lo kir la, min tiharh teh, nun dan mawi te, thatna te, zalenna leh thuneihnate min pe leh lul teh," tiin ( London 1802 ).
Hmasawnnain a zakzeh tel tlat sum leh pai hian no chimawm tak, chapona te, intihveina te, duhamna te, itsikna te, mahni hmasialna te, hmeichhia leh mipa inhman dik lohnate leh a dang tam tak a pai teuh va, chung chu thu leh hla thain a ven loh chuan chimawm sa lohvin an chimawm a, mihringte dikna chanvo pawh hi a pawngsual ta thin a ni. Chutiang hmasawnna khingbai chuan mipuite rumna a thlen a, mi retheite an er chhuak a, sei hlei inpawhthlaksak duhna a lo piang a; hetiang avang hian ram tam takah intualvuakna ( revolution ) a lo thleng ta thin a ni. Hei hi kan ramah la thleng em lo mah se kan hla phuathiam Ngurchawna chuan a hmu chiang hle a ni ang;


Ami zaleng lungduh sumpai mai hi 
Zo fa than siam ka chhal ngam lo;
Vai ang a tham ral mai thin,
Ni rei a cham dawn lo
a ti a.  Ngaihsan tur dik tak a sawi zui a;

Hei erawh hi ka chhuang zel ang,
In thu leh hla kim ten'n biahthu an kaina;
Fin thiamna zir lang lo thlengan, 
Khawvar lenkawl a lo en nan
a ti a.


Zalenna a ni.
Literature hi mihringte tana zalenna dar rimawi tak mai a ni. Mihringte chu rilru lam zalenna a siamsak a, a chang chuan taksa ( physical ) zalenna a thlen bawk. Mihring hi thilsiam danglam tak, zalen chak, phuartu ngah em em si a ni a. Mihring nihphung pangai aiin a phuarna chi hrang hrang bakah hian mihring hi ama dan siam hmangin a la inphuar bawk a. Chu dinhmun pik tak atang chuan thu leh hlate hian mihring hi a chhuah thin, Hla hi a tangkai lehzual a, a hla chhiartu, satu leh ngaithlatute nen lamin a tizalen thin. R.L. Kamlala phei chuan thu leh hla ngaihsan lohna ramah chuan zalenna a awm thei lo a ti hial a ni. ( Thu leh Hla, May & June 1982 )

Rilru thawidamtu a ni.
Thu leh hla thate hi mihring nun thawi damtu a ni bawk. Mi mangang leh lungngaia indawm kun tlawk tlawkte, mihring tawngkam thiamnin a hnem theih hauh tawh lohte hnem theitu a ni. Khawhar lusunte a hnem a, a awitlei thin.  Mizote zingah ngat phei chuan kan khawhar hla tha tak tak hian lusun chhungte mai bakah khawtlang hi min hnem a ni ngawt a. Mihring nun sual avanga dam lo hi a tidam thin a, taksa dam lo ngei pawh a thawi dam thin.


An thu leh hlate'n mihring thinlung a thawi dam thin avangin a lo luan chhuahna hnar, mihringa pawh chu "Tidamtu" an ti hial thin. Mathew Arnold-a chuan sualna leh tharum thawhnate a nasat lai tak maia Wordsworth-a a han boral ta mai chu a thla a phang ngiang a ni ang, "Hun hian ama hun teah zawng rorel thiam leh fing tak min la rawn thlen sak leh ang a; amaherawhchu, Europe hun hnuhnung lam tawng tawh hian tidam thei Wordsworth-a khawiah tehlul nge a tawn leh ang?" a tichhuak hial a ni. ( Memorial Verses ).

Beiseina siamtu a ni.
Thu leh hla tha chuan mihringte hi beiseina a siam thar sak thin. Beidawnna khur thuk taka tla tawhte pawh khawvel engah a hruai leh a; chung mite chuan thu leh hla avangin khawvel hi chenna tlakah an ngai leh theih hial thin. German tleirawl pakhat pawh inawhhlum a tum lai mekin a ke bula lehkhabu phek tlahlang let reng chu a zu chhiar kher a, chu chuan a thil tih tum chu a thulhtir der a ni. Augustine A. Birrela-a chuan, "Literature pian chhan chu mihringte ritphurh tihzante, an sualna leh lungngaihna theihnghilhtirte, an thinphu leh an beiseina tihthar lehte hi a ni," a ti.

Hlimna Chabi a ni.
Rom vanglaia ziaktu lar tak, Horace-a chuan, "Ziakmite thiltum ber chu mi zirtir leh chawh hlim a ni," a ti. Literature tha chuan hlimna thuah hnih a keng an ti thin a, thuah hnih mai a nih loh chang a tam bawk. A hmasaah chuan ziaktu chuan a rilru leh a veite, a suangtuahna leh a duhthusam thilte chu  a ziak lai chuan hlim takin, mut chhuak leh mawng khamte, riltamte pawh theihnghilh vekin tlaivar dawn dawnin a ziak a. Chu chu a chhiartuin hlim takin a lo kawm ve leh tin a. A chhiartu chuan chu a thil chhiar chu mi dang a hrilh a, chu pawh chuan chilthli tla duah duah khawpin a la ngaihthla tui thei tho.

Literature chuan kan thinlung kawngkhar a kik hawng a, kan hngaihtuah thiam loh leh kan suangtuah phak loh te; kan suangtuahna mitin a lo thlir ngai lohte min thlirtir a. Kan buaina khawvel, tihtur leh mawhphurhna chi hrang hrangte'n min delhna khawvel atang hian khawvel dangah min chentir daih thei thin.

Chakna leh thiltihtheihna a ni.
Thu leh hla hian a chang chuan ram ropui tak tak a sawi thiat a, rorel khawl a vawthlu a, roreltu sualte a phin darh vek thei thin. Hlaphuahtu thenkhat chuan hlau hauh lovin rorelna dik lo an hmuh chu an hmachhawn a; an tuar thin. Darpawngi chuan dikna a palzut a, mi pamhamte vulh liantu rorelnate a kawi a ngila zawma, khua leh tui tha nih ai chuan 'Pemthuli' tia tlang sawi pawh a thlang ta zawk a.  Laltheri pawhin a nutate nunrawnna chhut nem nan a mah a intimualpho ngam bawk. A chang chuan hla phuahtute chuan mipui ngaihtuahna muhil chu an au harh a, rorelna diklo su ngam turin an fuih a, an san hmuh bawk. Silai leh sipai chaknain a tukdawl zawh loh khawpin a thinlung a lo tikhauh hman thin. France lalin mipui a ngamloh chhante, Kumpinu sorkarin Vaiho a tukdawl zawh loh chhante chu an thu leh hla vang a ni. Chutiang bawkin, French revolution-a thisen luang ang maia Sapram mipui nawrhna rapthlak thleng tur chu Shakespear-a, 'Julius Caeser' hian a chhandam a ni an ti.

Rakzu thlawr fir tha tak ar chil zah lek pawhin pa ngaihtuahna a chawk nu vek thei ang hian hla thu tha tak tlar khat lek pawhin ngaihdan nghet tak a lo phun tawh pawh a sawhsawn dawrh thei thin. Hmanlai deuh tawhah khan Tokyo khawpuia kawngpui kaltir an tumna laiah hian thingbuk mawi fahran hi a ding a. Pawl hrang hrang leh mi tam takin chu thing chu an ui a, paihlo hram turin sawrkar chu an ngen chamchi a; mahse sawrkar chuan a ruahmanna siam tawh chu sut leh a tum chuang hauh lo mai a, Nakinah hian chu thinga inchan chuan hla a phuah ta a. Japan sawrkar chuan chu laia kawng kaltir a tum chu a sawn phah der mai a ni an ti. Hei hian thu leh hla chakzia leh thiltihtheihzia a tichiang hle. Mihringte hi thil ropui tak ti thei turin min tuaihriam thin a ni.

Literature-
Rawngbawlna Hmanraw Pawimawh:
Thu leh hla thiltihtheihzia tlem kan sawi ta a. Hetiang hi a nih avangin Literature hi Politics thilah leh sakhaw thila ram lak nan a tangkai em em a ni. Karl Marx-a lehkhabu te reuh te, 'Das Kapital' leh a thianpa Fredrich Engels nena an ziak, 'The Manifesto of the Communist Party' tih bu phek 96 leka chhahte chuan kum zabi 20-na khawvel hawiher a sawi danglam nasa hle anih kha.

Kristiante pun chak chhan pawimawh tak chu Kristian literature thehdarhtu pawl hrang hrangte tan lak vang a ni. Arabic Literature Mission pawhin hei hi an hria a, literature lama tan lak a tulzia a tlangaupui ve ta a. Thawm awm si lovin khawvelah hian Literature Indopui hi a kal muah muah reng a ni. Communist tlukchhiat chhan kha kawng hrang hrangin an sawi thin a; a chhan pawimawh tak pakhat chu Literature tho a ni.

Tunlai khawvel changkangah phei hi chuan tawngkaa Chanchin Tha hril ( direct evangelism )chu a har em em tawh a; Literature hi rawngbawlna hmanraw pawimawh tak a ni lehzual ta. Kan Zosapte khan literature lama tanlak a tulzia an hre chiang a, an bur nghal chat a. Bible an letling a, hla an phuah a, chanchinbu an chhuah a, zirlaibu leh Pathian thu lama kaihruaina bu an buatsaih a, literature hmangin Zoram hi Kristianna ramah an siam ti ila a sual tam awm lo ve. Synod pawhin 1980 atang in Publication Board a din ta hial reng a ni.

Literature hi Missionary huaisen, tlanchhe ve ngai lo, tawng tinreng thiam bawk si a ni a. Damloh leh rokhawlhna a nei ve lo va, kal hrehna hmun a nei lo va, thu nung leh thiltithei, dotute hneh zel thin a ni. H.W. Garrod-a'n, "Mihring nun hian min sawi nghing a, literature chuan min tinghet," a tih angin thalaite nunkawng hruaitu, ringtu chaklote chelhdingtu, rawngbawltute fuihtu a ni a; a pawimawhna hi haider theih a ni lo. Kan hman tangkai zawh poh leh kan rawngbawlna zar zotu an thahnem dawn a ni.

Source: Thlawhhma, 1996, pp 96 - 100 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E