Pu H.Liansailova, Agriculture Minister chuan nimin khan thingtlang lo neitute hman tangkai tur Mobile Soil Testing Laboratory pathum Agriculture Directorate kawtah a hawng. Mizoram pum hi zone pathumah thenin heng Laboratory te hian an vil dawn a ni. Minister chuan hun rei lo te chhunga Agriculture Department-in hma lakna a ngah chu lawmawm a tih thusawiin lo neituten awlsam zawka hna an thawh theih nan lei lehna khawl (tillers) pek chhuah a nih dante leh tunah tractors lei dan tur en mek a nih thute a sawi a. Mobile Soil Testing Laboratory hi lo neituten an tangkai pui ngei a beisei thu a sawi.
Minister chuan agriculture scientists-te hi thiam hle mah se hmanrua an neih that loh chuan duh angin hna an thawk thei lo a ni a ti a,tunah chuan lo neituten an lo lei that leh that loh an entir thei dawn tawh a, enkawl dante pawh an zir thei dawn tawh a ni a ti.
He leitha enna khawl hawnna inkhawm hi Pi L.Tochhong, Principal Secretary-in a kaihruai a, Pu K.S Thanga, Parliamentary Secretary bakah Agriculture Department Officer-te an tel. Mobile Soil Test Laboratory pakhat leina hi cheng nuai 31 a ni a, Mobile a nih angin Mizoram chhunga mamawhna khawi hmun ah pawh a kal theihna chinah chuan hnathawk thei turin ruahman a ni dawn a ni. Hetiang laboratory hi India hmar chhak state zingah Mizoram hi nei pahnihna a ni.
Thulakna: Mizo Aw