Kristian tan Yoga?

26/10/2010 16:41
- Dr.Lalchhuanawma Tochhawng

Yoga hi kan hriatna a rei ta hle a. Tunhnai mai khan a lar thar deuh niin a lang a. Kristianten eng angin nge kan ngaih ang tih te, a him chin a awm em tih te hi kan lungrual tlanna tura chhan theih a har hle mai thei.

A tobul ‘yuj’ tih hi inzawm tih te, inpumkhat tih te, inchhunfin tihna te a ni awm e (Saptawnga yoke nen hian tobul thuhmun nia sawi a ni). Awmze hrang hrang neia hman a ni fo a. Bhagavatgita-a an hman dan thenkhat leh Pitanjali hman dan hi inang lo taka ngaih theih a ni. A tak ram (reality) leh êng (light) leh chatuan nun (immortality) an zawnna kawng a ni a. “All these paths, O Lord, Veda, Samkhya, Yoga, Pasupata, Vaishnava, lead to Thee, like the winding river that at last merges into sea,” (Mahimna-Stotra) an ti. An tum ber chu pathian nena inpumkhat a ni. Heta pathian a tih hi Kristianten Pathian kan tih nen hian ze hrang daih a ni a. Lal Isuan, “Tupawh keimaha kal lo chuan Pa hnen an thleng lovang,” a tih nen hian hmeh rem theih a ni lo.

Hindu philosophy hrang hrang zinga tel, pawimawh tak a ni a. Sankhya philosophy leh yoga hi lak hran theih loh, pawisa hmai hnih (two faces of the same coin) a ni. Heng pahnihte hi sakhaw pawn lam thil niin an sawi fo a.  Mahse a zuitute chuan sakhaw thil ngei niin an sawi tlat a ni.

A hlauhawm em? He zawhna hi kan lungrual tlanna turin tumahin kan chhang theiin a rinawm loh. Hlauhawm kan teh dan a inang lo va, kan huaisen dan a inchen hek lo. Taksa sawizawina lam ni lo, a phena philosophy awm hi kan luhchilh peih ang em tih te hi sawi thiam a har hle. Mizote hian philosophy lam hi kan tuipui vak lo niin a lang a. Hindu philosophy thuk pui pui leh kan mize pawnl^ng tak hi a inchawih tehchiam hek lo. Yoga leh a phirpui philosophy pawh hi Hindu-a inpek duh phah khawpin kan luhchilh peih chuang lo mai thei. Kawng leh lama ngaihtuah erawh chuan Hindu ni tur hian an philosophy hi luhchilh kher a tul lem lo va. Hindu tam tak hian kha lam kha an ngaihtuah hek lo va. Mi tam tak chuan kan mize mil tawk kan hmu tho mai thei a. Ngaih tihthat ngawt har tak a ni.

Kristian tan eng nge? Yoga chu Hindu sakhaw thil ngei a ni a. Yoga hi Moksa (chhandamna?) thlen theihna kawng khat niin an pawm. Kristiante erawh chuan Lal Isua chauh lo chu chhandamna kawng dang kan pawm lo. Chuvangin, Kristian sakhua leh Yoga hian inzawlna engmah a nei thei lo vang. Yoga zirtirna leh Kristian zirtirna hi a inkalh vek lo a ni mai thei a. Mahse an tum erawh chu a hrang hle. Thil inkalh lo zawng zawng hi chawhpawlh theih an ni tihna a ni hek lo.

Mi thenkhatin a phena Hindu philosophy kha sawi tel lovin a practical lam chauh an tarlang a. Chu lam chu tl>m han thlir ve ila:
Exercise leh hriselna Mi tam takin yoga p>ng pakhat, taksa sawizawina lam chauh hi an hmang a. An sawimawi viau bawk. He ti taka yoga uar, a chawr chhuahna ram ni bawk India hi sport leh hriselna lamah eng ual a ni lo va, Olympic-ah te leh international athletic events-ah te a hniam pawl a ni fo. Yoga uar ve lo ram hlir hi a chungah an chuang thin. Yoga hmang kher lovin, nitin kea darkar khat kal te, infiamna dang hmang tein taksa sawizawi a, taksa hrisel tak neih theih a ni.

Hriselna leh damdawiah a hman tlakin a tangkaina lai a awm ngei ang tih phat rual a ni lo. Mi thenkhat chuan khum lum leh khawihthluk te, Benny Hinn-a te meuh pawh kha an ‘dampui’ a ni lawm ni? Yoga hmang kher lovin taksa hrisel tak neih theih a ni. Khawvela mihring maktaduai tam tak hi Yoga tel lovin hrisel takin an awm mek. Zuk leh hmuama insum te, ei leh ina fim khur te, doctor thiamten hriselna atana thil tul an sawi ang zawm that te hi a sawt em em a ni. 

Rilru hriselna
Yoga-a langsar tak chu rilru sawizawina te, rilru hriselna lam te a ni. Meditation an tih hi an sawi tangkai hle a. Hetianga rilru insawizawina hi yoga hmang kher lo pawhin Kristiante tan tih theih leh sawtpui theih a ni tho. Lei leh van siamtu Pathian hmaa thing-
thit a, tih takzeta mahni inbun ruak a, fianriala tawngtai hian Yoga atanga rilru hahdamna leh hlawkna kan hmuh aia tha kan hmuh theih ka ring.

Yoga huang chhunga meditation (rilru sawrbing?)-in a tum ber chu pathian nena inpumkhatna a ni. Chu pathian chu Jehova a ni lo va, Hindu-ho pathian a ni. Kristiante erawh chuan Pathian hnen thlen theihna kawng khat chiah kan pawm: Isua Krista hi. Isua Krista kan rin avang chauha chhandam leh Pa hnen thleng tur kan ni tih kan pawm a. Chuti ni lovin chhandamna kawng dang awm thei se la Isua Krista kha khenbeh a tul lo vang a, a thihna leh thawhlehna kha thil chuangtlai mai tihna a ni ang. Chuvangin kawng dang zawha luh tum chu kristian thurin pawn lam a ni.

Hmasawnna avangin mi leh sa kan intlawhpawh tual tual a, inkhung hrang reng thei kan ni lo tial tial bawk ang. Sakhaw dang zirtirna leh an thu kalpui dan hi a pawng a taka hlau ngawt lovin zir chiang ila, hre chiang ila, a chhiar pawh chhiar zau ila, min rawn chim tak tak a nih pawhin tan lo lak dan tur kan hre theiin a rinawm.

Thulakna: Vanglaini

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E