Kan ramah chuan Laptop hi powerpoint presentation tih nan leh movie en nan kan hmang deuh ber a, tam takin intih changkan nan kan hmang ve mek bawk a. Ram changkangah pawh intih changkanna atan hian an lo hmang ve nasa khawp mai, manto tak tak phei hi chu intih theih nan an hmang zawk awm e. Luvaglio One Million Dollar laptop pawh hi a neitu chu a intithei ve viau ang! A hming ang hian Dollar maktaduai khat man a ni a, he laptop design hi khawvelah pakhat chiah a awm a, a kawm hi thing leh thir hmanga siam niin a khawl chu a hmangtu-in a duh danin a thlak kual theih tura duan a ni a. A khawl chhawm sa chu 128 GB hard disk, mp3 player, USB stick leh amaha screen tifai nghal thei “integrated screen cleaning feature.” te an ni a, a manto ang hu hian a chhawm hi chu a chuti teh-ual lo!
Thulakna: Vengsang YMA Palai Vol. XX No.16 1st May 2011