KHAWKHAWM CHUNGCHANG INTERNATIONAL SEMINAR BUATSAIH

07/09/2010 17:05

Zoram Research Foundation chuan “International Seminar on Grouping of Villages” hawnna inkhawm nizanah Tourist Lodge, Chaltlangah Khuallian Mizoram Governor Lt.Gen.M.M.Lakhera, PVSM, AVSM, VSM  hovin an hmang a. He seminar September ni 10 thleng awh tur ah hian India ram leh Mizoram chhunga  mithiam leh zirmi te bakah ram pawn atangin mithiam engemawzat an tel a. Khawkhawm chungchanga mithiam te paper buatsaih an zirho a ni.

Hawnna thu sawiin Khuallian chuan Mizoram rambuai lai khan inkalpawhna leh inbiakpawhna a la chhiat em avangin, thil awmdan dik tak leh dinhmun dik tak hriat a har em em a, sorkar tan pawh hmalak dan tur hriat a har hle ang, a ti. Tun hunah chuan India rama hel emaw buaina awmna hmun entir nan Maoist te chetna ang hmunah pawh khawkhawm chu a tih chi loh tiin Army hotute pawh an tang zawk hial tawh a ni, a ti bawk.  Governor chuan Mizorama khawkhawm nghawng langsar tak pakhat chu Mizorama khaw 707 zingah mi 200 aia tlem chenna khua 142 awmin, chung khuaahte chuan sorkarin sikul din mahse kai tur zirlai naupang pawh an awm ngai meuh lo a ni, a ti a. Rambuai laia khawkhawmin a nghawng te hi ennawn a, zirchian a, siamthat dan tur kawng zawn tul hle a a hriat thu a sawi bawk.

Seminar hawnnaa Keynote Address sawitu Pu Lalkhama, IAS (Rtd) chuan Mizorama khawkhawm laia thil thleng hrang hrangte tarlangin tuna pawimawh ber zawk chu  thil thleng tawh atanga zirtur awm te hre reng chunga kalsanin, thangtharte hian ram leh hnam hmasawnna tur kawng hrang hrang ngaihtuah a  thawhho zel chu tihtur pawimawh zawk a ni, a ti a. Pu Lalkhama chuan  Mizo ang hnam tlemte tan chuan chakna leh thuneihna chin te chiang taka hria a, hmalakna tur reng reng ah fing tak leh hnamin a chhawr tangkai theih tur zawnga ngaihtuahna hman chhoh zel  a pawimawh ber a ni tih hi rambuai leh khawkhawmin  Mizote a zirtir a ni, a ti.

Seminar hi vawiin khan I&PR Conference Hall-ah bultan niin  chawhma lam hun hi Aizawl Theological College Principal Rev Prof. Roger Gaekwad in a kaihruai a.  NEHU, Shillong a Head of Sociology Department lo ni tawh thin, Prof C. Nunthara paper buatsaih leh khawkhawm hunlai a Special Officer a Mizoram a lo chhuak Pu SK Agnihotri IAS (Rtd)-in paper a buatsaihte zirho a ni a. Anni bakah hian Rev Lalngurauva Ralte, Mizoram Synod Moderator hlui leh ram buai lai a Aizawl Citizen Committee a lo tel thin chuan khawkhawm chungchang a hriat dan tlangpui a sawi.

Prof JL Dawar,  Mizoram University in chawhnu lam hun hi kaihruaiin Col. Ali Ahmed, Research Fellow (Institute of Defence Studies & Analyses, New Delhi), Dr. Lalngurliana Sailo, Associate Professor (Dept. of History & Ethnography, Mizoram University), Prof Sajal Nag (Head of History Dept.) Assam University leh Shanaz Kimi, Research Fellow, University of Vienna, Austria te thuziak ngaihthlak a ni a, sawihona hun an hmang zui a ni.

Seminar chhim tur hian College hrang hrang zirtirtute, Politics hrang hlui engemawzat bakah Mizoram khaw sawikhawm hunlai hre pha khawtlang, kohhran leh sorkar hotu hlui thahnem tawk tak an tel a ni. (DIPR)

 

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E