Khaichhuak Ta Che

16/11/2010 14:59
- F.Chaltluanga, Salem Veng

Khawtlang nun han thlir vang vang hian, YMA-in khawtlang nun siamthat a ngaihzia hria in, 'khawtlang nun siamthat' tih kumpuanah a hmang hi hman awm tak a ni tih hi hai rual a ni lo.

Thil reng reng a chhiat loh chuan siamthat a tul lo. Khawtlang nun pawh hi siamthat ngai zawngin kan tichhe mek zel a nih si hi. Khawtlang nun siam tha tur hian tu mawhphurhna nge tih leh a siam tha tur hian tunge tha ber ang a, tu in nge hlawhtlinpui thei ang tih pawh kan ngaihtuah chian a ngai.

Sual do hi a tha a, mahse dona ringawt chuan siamthatna a thlen kher lo thei. Entirnan, khawtlangah zu kan do va, kan check sim thei lo hle mai si. Zu do leh check nuam ti tak, chutiang zingah chuan zu in leh a lova awm thei lo an tam zawk emaw tih mai tur a nih chang a awm fova, a pawi hle. Kan do ber leh siamthat kan tum ber te chu sual bumnaa tihkhauh ang maiin kan ti luhlul tulh tulh emaw tih mai tur a ni si. Sual leh a hmanrua tih zalen lah a tha der si lo. Mihring nun a zalen tulh tulh a, kan zalenna kan hmang thiam lo tulh tulh ni maiin a lang a. Engemaw ti tala tan kan lak loh chuan khawtlang nun chu kan la manganpui hle dawn tih a lang.

Hun hmasa lam han thlir ila, kumpuan buaipui em em ngai lovin khawtlang nun kha tha takin a kal thei. Khawlaiah pawh nungchang tha puakchhuah tur a la tam. Rukruk, tualthah leh mahni intihlum sawi tur a vâng a, aia upa zahna a tamin, nu leh pa ngaih pawimawhna a nasa. Khawtlangah tanpui ngai an awmin, mi chhumchhia leh hmeithaite leh damlohna avanga hun rei tak harsatna tawk te an tanpuiin an khaichhuak thin. Mitinin tanpui ngai bika awm an hlau hle thin. Khawtlangah chhiatna a lo thlenin, mahni hma zawnah tan an la theuh a, an bibo mai mai ngai lo. Khawhar in kal te, thlan laih te leh khawhar in riah thlengin zirtir leh fuih an ngai fo lova, mahni mawhphurhnaah an ngai mai. Hruaitu chin ngat phei chu hruaitu tlak an niin, campaign pui ngai lova tling an ni thin.

Tunlaiah chuan, khawtlang nun a lo nawm theih nan pawl hrang hrangin kumpuan kan nei fova, theihtawp chhuahin kan bawhzui a, kan hlawhtlinpui hma in, kumthar atan kumpuan dang mamawhna a lo sosang hman zel si. Hetiang zela kan kal chuan kum khatah kumpuan pahnih pathum emaw a aia tam emaw neih hial a ngai ang tih pawh a hlauhawm ta. A manganthlak lam deuh zawng a ni.

Nu leh paten an fate an inkhawm san fo avanga sualna pung ta anga sawi a awm fova. Han ngaihtuah chian chuan inkhawm an tlem thinzia ngaihtuahin, inkhawm mumal lo hi veng tinah kan tam daih zawk niin a lang. Chuvang chuan, inkhawm fo thin fate ai chuan, inkhawm ngai lo leh sakhaw bel mumal lo chhungkua atangin khawtlang nun tha lo chu a chhuak tam daih zawk tih hi a dik zawk ngei ang.

Inchhung khur han bihchiang ila, Pa berin nupui fanau enkawlna kawngah mahni mawhphurhna hlen zo lo leh nupui fanaute thlamuang taka siam thei lo, nupuite thawhchhuah sa a lo rui ve mai mai te pawh a awm. Hmeichhe Office kal tam em em dan atang te, nu, fate pawh ngaihtuah hman lo leka dawr nghak leh bazara thu tam em em dan atang te hian, chhungkua leh khawtlang nun chu that ngaihna a awm hmel lo hle. Rangkachak thi tak ngial pawh an kawl tir phal loh te kuta an fanaute an han dah nileng ngam lawi si te hi aw... a pawi thui theihzia kan ngaihtuah chian tawk loh vang a ni ngei ang.

Hetiang a nih avang hian, khawtlang nun tha lo chu chhung­kua atanga lo chhuak a ni tih hi hrechiang ngam ila. Pawl hrang hrangten sual dovin kumpuan te neiin tan la thin mahse, chhungtin ten chhungkaw khawsak fel loh avanga khawtlang nun hi lo chhe ta a ni tih hrechiang ila. Chhungkaw tanrualna atang chauh lo chuan khawtlang nun hi siamthat theih a ni mai lo, tih hi kan ngaihdan ni tlang bawk se a va tha dawn em!

Kan khawtlang nun siamthat ngaia siamtu eiruk ching te, dik lo taka induhsak ching te, mahni hna tha taka thawk peih lo te, mi tham ching leh thamna la thin te, a thiam lo zawk thiam chantir hmang te, mahni dinchan duh avanga thil tihawm loh mi tiam ching te, mi rel leh dawtsawi ching te, rukruk hmang leh mi rawk ching te, tualthat leh mahni intihlum te, K.S. leh AIDS vei te, zu leh drugs ngawlvei te, pawngsual leh dan zah lo te, khawtlang duhloh leh phal loh tihluih ching te, thenawm khawveng tana mi hnawksak te, mi bumhmang leh leiba ngaihsak lo te, fate khawlaia vah tir mai mai mi awmtha duh lo te, vantlang thil zah lo leh ngai pawimawh lo te, nu leh pa leh aia upa zah nachang hre lo te, chhungkaw thatpui tlan loh sakhaw vuana chapo pui tute.

Hengho hi tu chhungkua atanga lo piang chhuak a, khaw­tlang nun ti chhia nge tih chhungtinin in enfiah ila, khawtlang nun a chhiat zel loh nan leh, siamthatna hlawhtling a lo thlen theih nan, i chhungkua kha nangma mawhphurhnaah ngaiin, nangmah ngeiin 'khai chhuak ta che.'

Thulakna: Vanglaini

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E