KAN NIHNA (IDENTIRY) LEH KAN TAWNG

14/08/2010 13:22
- Florence B.Chhakchhuak                  

                   Kum 20 vel kalta ah khan Mizoram, vai ram, Burma, Manipur, Bangladesh, Meghalaya leh Nagaland etc. te hi Mizo awm tamna deuh ber a ni mai awm e.  Tun lai hian, Mizoramah lehkha thiam tan pawh hna te a van tak em a vangte, Myanmar (Burma) ram sorkar kalphung dik loh luat a vang te, changkan leh nawmsak zawk beiseina avangin hmun tina awm Zofate, ram changkang zawkah in kah chhuah dan kan dap a,  kan in kap chhuak ve ta zeuh zeuh reng a.  Chuvangin Mizoram pawn chu sawi loh India ram pawna khawsa kan thahnem ve tanin society nei tham awmna a tam ve tawh a ni.  Chutih rualin Mizoram chhung hrim hrimah pawh hnam dang ten min rawn chim nasa tial tial bawk a.  Hetia hnam dang ten min rawn chim hi kan lo duh loh ringawt theih pawh a ni si lo.  Keini pawh hnam dang kan va chim ve tho bawk a.  Hei hi khawvel kalphungin a ken tel a ni.  Hetih lai hian, fimkhur nachang kan hriat loh erawh chuan hnam bo/thi kan ni thuai mai dawn a ni.  Chuvangin, mi tha hnemngai thenkhat hnam bo nih hlauvin fa nei tam zawng a tan la turin an tlangau ta fo mai.  Ni e, fa neih tam hi kan hnam ral lohna tur emaw in humhalhna a tan tanfung pawimawh tak a ni thei ngei ang.  Hetih lai hian, fa neih tam/tam lama tan kan lak rual a, kan ngaihthah miah loh tur chu thil pakhat a awm a. Chu chu; Mizo tawh phawt chuan (a piang tawhte) kan nihna a kan chian a theih tawp chhuah a kan identity vawn nun tlat hi a ni.  Hemi nen a thenhran theih miah loh leh kalkawp tlat chu  hi a ni.

           Tawng hi kan nihna ti langtu leh hnam humhalhna hmanrua pawimawh ber a nih em loh pawhin a pawimawh ber filawr zualpui 3 zing a pakhat a ni ngat ang.  Tawng hriatthiam miah lohna hmun/ramah emaw puipunna a, awm hrehawm zia chu sawi ngai lovin kan hre theuh awm e.  Mi a ang maiin kan thu ngawi reng a, kan in thlahrungin, kan mikhual hru thin a ni lawm ni!  Mahni hnam pui ngeite zing a awm si, tawng mal khat pawh hriat miah loh mai chu a hrehawm chauh ni lovin a zahthlak tak zet a ni.  Mizo ni mah ila Mizo ka ni han tih ngawt pawh a har khawp a niang!  Tum khat pawh, thlahtu lam a Mizo dik tak, Mizo tawng thiam si lo pakhat chuan Aaa, kei chu Mizo ka ni lo . . . a han ti ngawt a.  Mizo i nih loh chuan eng nge i nih a?, an han tih lahin sawi tur a hre mumal bawk si lo.  Mizo tawng chu thiam se fiamthu emaw thu tak pawhin Mizo ka ni lo . . . a ti duh hauhin ka ring lo.  Tawng thiam loh avangin mahni nihna a, inchhal nuam a ti chiah lo va, hnam dang a inchhal thei inti bawk si lovin laklawh deuhin an awm a ni.  Mahni hnam puite zingah nuam ti tak tak thei lo, hnam dang karah nuam ti chuang bawk si lo, hei ngei hi a ni identity crisis an tih thin chu!  Aw le, mahni tawng thiam loh na in min nghawng dan hi kan sawi fiah vek seng lovin, in hrilhfiah sen vek pawh a ni hek lovang.  Chuvangin mahni tawng thiam loh hi a pawi lutuk, tihah chiang em em phawt mai ila a tha ber awm e.

          Mizo tawng hman theihna hmunah kan awm loh avangin kan tawng kau chhehte a dangin kan aw phawi leh thluk te pawh alo pai ta deuhin, kan awmna ram a tawng hman lar (e.g. Hindi/Burmese/German/English etc.) te kan thiam ang tlukin kan thiam nal kher lo pawh a ni thei e.  Amaherawhchu, duh zawng sawi thei leh mi nuih rual a nui thei tur tawk tal a Mizo tawng thiam tur a zir emaw in zirtir hi Mizo kan nih phawt chuan tih makmawh a ni.

           Mi hnam kar a awm hian Mizo tawng ziak leh chhiar thiam tur a zir emaw inzirtir hi thil awlsam a ni hauh lo, tih hre chiang ber pawl ka ni ve in ka ring thin.  A bik takin Mizo society nei tham Mizo awm lohna ah phei chuan a harsa leh zual thin a.  Kan unau za Mizo tawng kan thiam/zir chhoh dan te ka ngaihtuah kir fo thin.  Naupang mai kan la nih lai kha chuan Mizo tawng thiam a tulna leh hlutna emaw pawh kan hre hauh lova.  Nu leh pa tih luihna in inchhungah Mizo tawng kan hmang nawk nawk a, phun nawi leh peih lo zet chungte khan a ziak leh chhiar te kan zir thin a.  Ka nu leh pa ten mut mawh hnar mawhah neiin, theih tawp chhuahin tan la lo se chuan vawiin ni a Mizo tawng ka thiam ang hian ka thiam ngai hauh lovang tih ka ring.  Tunah hian Fapa pahnih kan nei ve a, Mizo tawng thiam tir kan duh chuan, khawvel thiamna/zirna lama an hlawhtlin kan duh avanga theih tawp kan chhuah ang bawkin sum leh pai leh hun tamtak sen pawh huama kan nupa a tan kan lak a ngai dawn a ni tih a lang sa reng mai a.  Chutianga kan tih phawt chuan kan fapa te hian Mizo tawng an thiam ngei ang tih ka nu leh pa ten min lo enkawl dan atang ka hre thei a.  Mizo nu leh pa zawng zawng ten hetianga tan kan lak phawt chuan khawiah pawh awm ila kan fate chuan Mizo tawng an thiam ngei ngei ang tih ka ring tlat bawk a ni.

            Ei zawnna leh zirna a vanga vai rama awm, Manipur leh Burma lama kan Mizo unau awm te hi mi hnam kar a awm reng, piang leh sei lian e ti lovin Mizo tawng an thiam hlawm hle a, an fakawm in, an entawn tlak tak zet a ni.  Tan lo la zel turin ka han fuih nghal duh bawk che u a ni.  Naupang leh thalaite chu sawi loh, puitling tamtakin Mizo tawng thiam a tulna leh hlutna kan hre lo fo thin.  Hnam changkang zinga awm te, a bik takin sap tawng hmanna rama awm te zingah Mizo tawng ngaihthah leh ngaih pawimawh lohna a lian deuh emaw ni.  A rama piang leh sei lian chu thu hran naupang/tleirawl Mizo tawng tawng thei zat zat hnu a pem thla te pawh rei lo te ah Mizo tawng an tawng duh lo mai thin.  Mizo ten sap/vun ngo kan ngaihsan na hian min la bual a niin alang.  Hnam pui nge nge an fing a hnam hnuai hnung zawk ni mah ila min fak derin leh min ngaisang der thiam a.  An tawng te thiam tawk lovin leh pai mah ila min nuihzat duh lo mai pawh ni lovin Your English is very good, an han ti zui lehnghal a.  An tawngkam tha ah kan awk a, an tawng kan thiam tak tak emaw tiin kan tu leh fa te biaknan leh kan inchhungah ngei kan hmang hlawm a.  Khawi hmun/ram ah pawh awm ila kan inchhungah Mizo tawng aia hnam dang tawng kan dah lal chhung chu kan tu leh fa ten Mizo tawng an thiam lovang a, thiam a tulna leh hlutna pawh an hre ngai dawn lo a ni.  Mizo tawng hi kan tawng a ni a, he leiah chuan vantirhkoh tawng ai pawha kan ngaih pawimawh leh kan dah LAL tur tawng ani tih hi I hre reng ang u.

          Thenkhat chuan kan awmna ramah khua leh tui nihna nei in leh mahni tawng pawh thiam miah lo khawpin kan awmna ram tawng te kan thiam nal em em pawh a ni thei e.  Mahse, heng avang hian kan to bul (origin/ethinic background/race) hi engti kawng mahin kan thai bo thei lo.  USA hi Land of Immigrant (Pem khawmna ram) tih a nih angin a rama piang ni lo tan pawh USA khua leh tui nih theihna dan fel takin a nei a.  Amaerawh chu sorkar hian USA khua leh tui (citizen) nihna nei zawng zawng te tobul (ethnic background/race) leh pian na ram (citizenship at birth) erawh a chhinchhiah thlapin passport ah hial pawh a chuang kuau mai.  In ang khat veka min en anih chuan kan tobul chhinchhiah a tihlan eng nge a tul na ni ang le aw!!!  Eng emaw hlekah British/American ti mai lovin British national of Indian descent emaw Indian-American tih kan hlawh a.  Kan nun phung, kan hmel, pian phung, vun rawng etc. avangin kan tobul/ethnic background/root hre duhin Where are you from?/Khawi  mi nge I nih? tih zawhna hi nitina kan tawn a ni tho tho mai.  Ram changkang leh hnam changkang zingah chuan Mizorama kan tih anga tawngkam chhe tleuhna, inhmusitna tawngkam leh hnuaichhiah nana kan hman fo vai chhia/nghapih tih ang chi racial slur hi an hmang mai mai lo.  Sorkar danin a phal loh vang te, awm leh mawi an dawn vangte emaw etiang tawngkamin thil pawi a thlen theih zia an hriathiam tawh vang emaw a ni ngei ang.  Amaherawhchu, kan tobul leh an tobul a inang lo tih erawh an hai bik reng reng lo tih i hria ang u.

            Aw le, hnam changkang leh upa zawkte tih dan atang hian keini hnam naupang leh tlem zawk te hian zir tur tam tak kan nei a.  Kan tawng hi keimahni leh kan hnam tan a ni. Kan hnam/tawng ngaih hlutna leh dah pawimawh nachang kan hriat loh chuan tumahin min ngaihhlut suak chuang dawn lo.  Thlahtu lam a, kan tobul hriat ringawt hi a tawk lo.  A tir lama ka sawi tawh angin kan hnam tawng (mother tongue) kan thiam loh chuan kan to bul/nihna nen pawh inchhuizawm (identify/relate )a har tlat thin.  Chuvangin kan tu leh fa te Mizo tawng thiam chakna te, Mizo tawng thiam nih lawm nachang leh hlut nachang te an hriat theih na turin theihtawp chhuah a ngai ta a ni.  Amehrawhchu, hei hi hnam dang hmusit nan emaw la thiam chiahlo kan unaute diriam tur a in fuihna a ni lo va.  Ka tum ber zawk chu khawiah pawh awm ila kan vela hnam dangte ngaisang leh zah thiam tak chung si in kan tobul, kan tawng, kan incheina, kan nunphung (tradition & Culture) te ngai hlu leh ngaih pawimawh (dah pawimawh ber) nachang hre theuh tura in fuihna a ni tih min lo hriatsak dawn nia.  “Be proud of what you are and where you come from. “ Hei hi kan hnam chim rala kan awm lohna tur, hnam mite ngaihsan kan nih theihna tur leh khawvel hriata kan in vawrh chhuah theihna tur a ni tih vawng nghet tlat chungin tan ila theuh ang u.

Thulakna: zawlbuk.net

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E