KAN MEDIA-TE TAWNGKAM KA NGAIHMAWH THENKHATTE

06/09/2010 08:48

- Lalthanzuala , Vengthlang - Champhai

Media Person-te leh zirtirtute hi mipuiin tawng kalphung dik leh dik lo kan zirna ber an nih vangin midang zawng aiin an fimkhur a ngai bik. Media-ten tawngkam an hman zinga ka ngaimawh thenkhatte han tarlang ila-

‘Lei’ nge ‘Leilawn’?
Lei chu lui chunga thing emaw, thir emaw, RCC emaw hmanga lui kam tawn tawn inkalpawh theihna atana thil dawh thin, English-a ‘bridge’ an tih hi ni maiin ka hria. Leilawn chu inchung leh hmun sang deuh lawn chhohna atana kan hman thin, thing emaw, thir emawa siam, laksawn theih, English-a ‘ladder’ an tih hi niin ka hre bawk. Mahse hei hi tunlai hian kan media-te hian an hman pawlh nasa hle niin a lang. 29th Jan, 2010-a Vanglaini Chanchinbu ngei pawhin front page-ah NABARD-in loan-in Mizoram hmasawnna tur tam tak atana sum a puktirah ‘leilawn’ pahnih siamna tur a tel thu a rawn chhuah a. Hei hi ‘lei’ pahnih siamna tur zawk a ni lo maw? NABARD loan meuha state puitling ve meuhvin inchung lawnna tur ‘leilawn’ siamna tur sum a puk a rinawm chiah si loh. Print media an ni emaw, visual media an ni emaw, ‘leilawn’ hi an hmang rim zawk hle a. Mizo tawngah hian a lo hman pawlh theih reng em ni zawk?

‘Man hu’ nge ‘hu’?
Tunlaiin kan media-ten police, excise, forest department etc. ten misualte hnen atanga an thil man leh in kang etc. chungchang an puanin ‘Chumi man hu chu man a ni/ a kang chhia’ an ti fo mai hi a dik lovin ka hre leh tlat pek a. Excise-in zu an man chuan ‘Rs. 1,00,000 man hu an man’ ti lovin ‘Rs. 1,00,000 man an man’ ti mai se; ‘Rs. 1,00,000 man’ tih tawh hnua ‘hu’ tih tel leh kher hi a chuangtlai mai mai. A hralha hralh chi a nih chuan ‘Rs. 1,00,000 man’ tih mai a tawk. Dawra thil kan leiin ‘Rs. 500 man chawhmeh ka lei dawn’ kan ti mai a, ‘Rs. 500 man hu chawhmeh ka lei dawn’ kan ti duah ngai si lo. Police etc. te thil man a nih tak avanga ‘man hu’ kan ti duah kher zel hi a tul lo hlein a lang.

In kang leh leimin etc. vanga bungraw chhia a hlutna kan sawi dawn chuan ‘Cheng nuai 5 hu a chhia/kangral’ ti mai ila a tawk. Mimal inchhung bungrua, hralh tura zawrh pawh ni lo a chhia a ni a, ‘man’ tih ziah/puan tel kher a tul lo.

Chanchinthar ‘Mizo tawnga’ chhiar?
Hei hi chu DDK Aizawl tan deuh bik a ni. Tlai lam Dar 5:30 a lo rika an program tur an chhiar chhuah hian ‘Dar 7-ah Chanchinthar Mizo tawnga chhiar kan ngaithla ang’ an ti deuh kher thin hi ka ngaimawh hle. Dar 5:30 atanga Dar 8:00, darkar hnih leh a chanve chauh mai Mizo tawngin program kan hmang ni na na na, ‘Mizo tawnga chhiar’ han tih leh kher hi eng nge maw a tulna le? ‘Dar 7:15-ah Chanchinthar Sap tawnga chhiar, Guwahati ami lakchhawn kan ngaithla ang’ han tih te hi chu a dam thlap mai. Tin, Dar 7 chanchinthar lan dawna ‘CHANCHIN THAR’ tih an rawn tarlang thin hi ‘CHANCHINTHAR’ tiin ziak zawm ta se a dik zawk lo maw? ‘News’ a nih chuan’Chanchinthar’ a ni mai lo vem ni?

Tunlai hian a bikin kum 35 hnuai lam zingah Mizo tawnga ‘a’ ni si, ‘e’ anga lam ri kan tam lutuk hi ngaimawh tham a tling ta bawk. ‘Maian’ tih turah ‘meian’, ‘bai’ tih turah ‘bei’, ‘mai’ tih turah ‘mei’, a tam mai. DDK Aizawl anchor pakhat ngei pawhin a sim hleithei lo hi chu a pawi ngawt mai. Mipuiin kan thlir tam si. Hetianga tawng hman dik loh chungchangah hian visual media-te leh zirtirtute hian kan hman dik theihnan tan han la lehzual teh se.

English Medium School chhuak, Mizo tawng dik leh dik lo ngaihtuah lem lo kha English Medium School zirtirtuah vek a han tang ve leh a, kan tawng tidazattu an ni thei. English Medium Shool zirtirtute hian an syllabus chhunga tel lo mah ni se, Mizo tawng ziah leh lam dan dik hi an naupangte pawh nasa lehzualin zirtir thin se a tha ngawt ang.

Thulakna: Vanglaini

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E