KAN CHAWHMEH A TUIBER !

17/06/2010 02:27

- P.C.Lalnghinglova (P.C-a)

Ti ve khanglang ila.Mizoram pawn India ram hmun hrang hrang (Vairam) a eizawnna chhete avanga ka thenkual ve lawp lawp hnu pawh hian; kan khua, Chhingchhip a Bawngsa leh Vairam a Bawngsa hi a tuidan a la in ang reng tho a. Mahse, mizote`n a 'Mizo Chawhmeh' kan lo tih ve mai thin, thlai hrang hrang te tui dan leh itawm dan erawh a lo danglam thei khawpin kei chuan ka hria.

Mizoram ah chuan enkawl lemlo pawha Chuktuah huanah pawh kan thar teuh teuh theih; Bal, Sawhthing,Thingfanghma,Antam,Iskut,etc te hi chaw tha an nih hrereng chung pawhin Zofate chuan kan eitui vak lo a ni. Mai, Bal leh Thingfanghma te phei chu Vawk chaw atan kan hlui pawp pawp mai a ni.Heng thlai ,kawtkai maia min intodelh tir thei khawpa awlsama kan thar theih te tui ti taka kan ei bawrh bawrh theih loh nachhan hi Zofate`n eirawngbawl kan la thiam loh lutuk hlawm vang a ni thei mai lo maw?

Mahni ngeiin kan tharchhuah ve theih thlai ner khum ner khum tu te hian Vairam thuilote, Guwahati lek pawh pel thla ila; Mai,Bal,Antam,Berul,Iskut mai mai pawh ei phalo leh lei ngamlo tur hi kan la kuh tul a ni; a biktakin thingtlang pa zingah. Tunlaiah chuan kei chuanin Vairam khawii ah mah sawhthing 1kg hi Rs.40 aia a tlawmna ka hrelo; Bagha,Silchar vel rate chu ka hre ve thiamlo a.Mai (pumpkin) chu kg khat Rs.12 te a ni a, a lian tha deuh chu pumkhat 5kg te niin Rs.60 man te a ni thin.India chhim, tuipui hnaihah chuan sangha te hi 1kg chu Rs.50 te pawh a ni a, mai 1 aiin sangha man a tlawm zawk a ni.Sangha te chi phei chu kg khat Rs 25 te a ni. Maipawl pawh 1kg chu Rs.30 te a lo ni a,Bal pawh hmun thenkhatah chuan 1kg chu Rs.20 te a ni.Tumbu hi Vairamah ka hmuh ngailoh tehlul nen Hyderabad ah chuan pakhat Rs.8 te`n kan lei thin a, hei pawh hi Changel ni lovin Balhla Tumbu/par (Banana flower) a ni.Keini chuan vawkchaw tlakah pawh kan ngaih meuh loh balhla kung laimu te hi an ei a ni(vawkchaw ah chuan changel ngei kan hmang thin). Vairam ah chuan kan leitur thil aia leitura kan kalna senso tam zawkin balhla kung laimu( banana stem) mai mai pawh lei turin mel 10 chuang te kan kal duh thin a ni. Mizoram a hnianghnara kan thlai thar ve deuh ber te hi vairam ah chuan a mak a makin an to a, Vairam atanga Mizoram a kan lakluh te hi vairam ah chuan an tlawm leh em em thung bawk tih chu tlang hriat a ni.

Nikhat chu kei pa lungmawl hian ka ngaihtuah kual ve vel a. Mizoram a hnianghnar ve deuh taka kan thlai thar ve theih, tunhmaa tuilo ti taka ka ei luih tawk tawk, tunah tui ka tih leh ei chak em em te hi vairam ah chuan an lo to em em a ni si a tih ngaihtuaha ka sawi rual rualin kan nu chuan TV en chungin,"Mizo te chuan ei leh in siam kan uluk lovin duhtui lova; eirawng bawl kan la urhsun lova,thenkhat phei chuan chawlhkar khata an vawikhat chauh hmeh tur an chawlhni tuk sa tur pawh inrinni zan ah meizial zial pah mai maiin an chhum a nia. Chumaibakah mizo mipa te hian hmeichhia te hi an la ti hahdam tawk lova, thingtlangah phei chuan khuantevik ah nu a tho a,eirawng a bawl rawk rawk a;pa a kaitho a,tukthuan an ei a,thleng seng leh hmun tifaiin a buai leh a, nu in Dawrawn (Em) lian tak a phur a ,hnathawh zat in ang kha ram lamah nu in bai a chhuang leh a. Haw kawngah iptepui tereuhte ah dumbur leh chem chauh ak a Pa a kal thauh thauh laiin nu in em lianpui a phur vum thur a. Nu bawkin zanriah a bawl leh rawk rawk a. Chutiang karah chuan neih ve chhun ang ang pawh uluk leh duhtui taka nu in a thiam tilang tura siamna hun a awm lova, siam peih tur pawhin chakna thahruiin a tlin tawh lo a lawm", a rawn ti nghal piap piap a; dik ve thei viauin a lang.

Khawvel ram hrang hrang pawh fangkual mah ila, kan kawtkai a kan thar ve theih thlai te hi a hlu leh man to ber ber, chawtha an ni ve zel ang.Thingtlang pa te hi khawvel chaw tha tha eireng thei kan lo ni zawka, a tuina pawh tak tak turin tuitaka siamdan kan ngaihtuah peihlo mai mai a lo ni. Delhi a 5 star Ashoka Hotel velah zawng, chaw kan mai mai pawh 'Bamboo Rice' tiin Raw tanbunah an rawn suah che anga tui titak leh changkang takin i ei hlawih hlawih mai ang. Rilru ngaihhlut zawng te hi a lo pawimawh khawp mai. Mahni neih sa hi ngaihluin tui taka siamdan zir ila, man to taka ramdang atanga kan thlai chawk luh te pawh hi kan mamawh lo thei maiin a rinawm a ni. Tin, a man a tlawm emaw to emaw;a tui viau emaw tui viau lemlo emaw, kan eitur sawngbawl vel dan atang pawh hian kan mizia leh boruak hap phak tawk vel hi a chhut chhuah ve theih fu a ni. Kan CM lo ni tawh te zinga pakhat hi Serchhip khaw thenawm ah Vawksa chhum deuh ringawt an lo hlui hnur mai a ni awm a,"Vawksa thau chhum kan la ei tun tun hi chu kan la mawl hle tihna a ni, a ti e", an ti. Zofate`n tui kan tihtlan em em,vawksa rep a antam han thlak hnur maite hi thenkhat chuan a hnawk tuihnailo nei nuai an lo ti leh daih tawh bawk. Chuvangin vantlang ruai siam nikhua chuan antam te hi fel takin an tawn khawm a, a hnawk lova han thur nalh nalh a awlsam hle bawk.

Zofate lei ah chuan KAN CHAWHMEH HI A LO TUI BER mai. A tui zia kan la haichhuak lo mai a ni. Tunhma atanga kan tihdan a nih avanga kan tiduhdah a ni tih pawh kan inhriat miah loh, kan hmeichhia te pawh kan lo la sal chhawr bawrh bawrh tho mai. Nu ho pawhin hunawl neih apianga second-hand thawmhnaw thin leh committee,etc buaipui phi ruai lovin chhungkaw hlimtlan nan Choka lama urhsun taka Pathian nena lendun han zir thar leh teh u.

Thulakna: Mizo Aw

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E