Ka Thenawm Nula Pali

16/11/2010 17:15
- Lalena

Kan thenawmte hi mi tha leh nun ngil tak an ni a. Nu ber leh pa ber pawh an inhmangaih thiamin an induat thiam hle. Intipiangthar leh intithlarau mi vak chu an ni lo. Mahse, kohhran ngaihthah leh ngai pawimawh lozawng erawh chuan an nun an hmang hauh lo. Kohhranah nihna leh chanvo an beisei lo va, sawisel leh phunchhiar lam aiin kohhran hruaitute tih chu Pathian tih ang zelin an pawm thei a. An nun a zalenin an awm dan a hahdamthlak khawp mai. Lehkha thiam leh pawl sang chu ni lo mah se an fate enkawl chungchangah an fakawm a. An phak tawk tawkin lehkha an chhiar a, training leh zirhonaa tel nuam an ti a. Rin aiin an hawi zau va, an thenawm nih pawh nuam tak a ni. Hetiang hian fanu pali, nula thah an nei a:

A upa ber chu a upa ber ni awm rengin fel tak a ni. A chengvawng a, thil engkim hi a nihna tur dik takin a enkawl thiam ti ila kan uar lutuk hran lo vang. An in chhung va lut ila a hriat mai. A nauten an thawmhnaw leh bungruate a dahna tura an dah loh chang te hian a hau va, a dah fel nghal zung zung bawk a. A chang chuan a nauten, “Pi Stick-i”, an ti fiam tak na a, a ruk tak chuan an zah a, an u tih ang hi an tlin ve lo tih pawh an hria. An in chhung a vawng fel mai a ni lo, an compound leh a chhehvel pawh a thian thianghlim reng a. Ama taksa ngei pawh han en vang vang hian a fai a ni tih a hriat hliah hliah a, ‘chhum lova ei theih’ an tih ang hi a ni ber. A chhip atanga a ke hmawr thleng a fai a ni tawp. Pawn lama a chhet chhuahna kohhran leh khawtlang thalai lamah pawh mawhphurhna a neih reng reng chu a hlen thin tih mai a ni lo, a atchilh a ni ber. Hetianga mi rinawm leh mawhphurhna ngai pawimawh mi a nih vang hian kohhran leh khawtlang thalai-ah mawhphurhna eng eng emaw hi a chelh deuh reng a. A chang chuan amah leh a chhungte pawhin an ning lek lek thin. Hetianga mi chengvang a nih avang hian a leng rei dawn emaw i lo ti ang e, a nihna dik tak hriate chuan nupuia neih an duh zel a nia.

A upa ber dawttu vethung chu thil danga a chungchuanna vak han sawi tur a awm lo. A thluak hi a tha hrim hrim ringawt. A piang fuh kan ti dawn nge a vannei kan ti zawk dawn. A nu leh pate khum zawk khawpin a thluak a tha a. A naupan lai atangin lehkha a zirnaah a thiam thei ber nihna a hauh char char a. A nulat hnu pawhin thiltihhonna leh hriatna lama intihsiakna a awm phawt chuan a lama tang nih an inchuh laih laih zel. Mi thluak tha tam tak chuan an thluak thatna chhuangin lehkha an zir tha peih lo va, an intithiam mai thin. Kan thenawm nula hi chu chutiang a ni ve lo. Lehkha chhiar hi a nuam tih ber a ni a, a chhinchhiah thei bawk si. A thiante chuan ‘Pi Computer-i’ an ti tawp. Hriat loh a nei ang em tih hi inzawh laih laihna awm tak a ni. A thluak a that ang chiah hian a rilru pawh a tha. A naupan laia zirtirtuten an hauh zinna ber chu mi dang thiam ve lo a tanpui thin vang a ni. Mi rethei leh chanhaite hi a khawngaih thei em em a. Mi rilru tinazawng leh tihrehawmzawnga awm chu a thil hlauh ber a ni a. Tu mah a en hniam ngai lo. Mi dangte dinhmun hi a hriatpui zung zung a, mak tak chu a ni. Pui vulh atan a tha tih chu hai rual a ni lo.

A pathumna hi chu a dang leh zak. Mizoten ‘Lu zo’ kan tih ang hi a ni berin ka hria. Ani a awm tawh hi chuan an inah lut chhuak an tam a. An chhungkua pawh an hlim ri a ring bik emaw tih tur a ni. Han en vang vang pawh hian a hrisel a ni tih a hriat a. A hmel a felin a mit meng a fiah mawi a. Mi biangbiak a thiamin hlim hmel a pu reng a. A bula awm a nuam. Thil engkim hi a thazawngin a hmu emaw tih tur hian a hmachhawn thiam a. Thiante an chiai hle pawhin a buai ve mai ngai lo. A inchei duh dan pawh a unaute aiin a dang zak a. A lerh deuh bik emaw tih palh awl tak a ni. A lerh vang a ni lo, a tun lai hrim hrim a ni. Fashion thar leh design thar-te hi mi dang aiin a hre thei emaw tih tur a ni a. A inbel apiang chu a inhmuh zek bawk si. Taksa sawizawi a peih a, nalh leh mi hip thei tak nih pawh a tum. Mi thenkhat hmuh dan  chuan pawlawh tak a ang a. Mahse, a khawvel thlir a zauva, a zalenna a hmang thiam. A sihhnipzawng leh a zuamawmzawng erawh chuan a che ngai lo. Pui tak a ni. A tul hunah chuan hlauh a nei lo emaw tih turin a huaisen a. Zah lohna tur hmunah a ip ve chuih chuih ngai lo. Kohhran leh khawtlang thalai zinga social leh games chi hrang hrangah pawh a changtu nu ber a ni thin. A tel lo chuan sera mu an thur lo a ni ber. Sawi tur dang a awm lo. Engkimah ‘a zei’ a ni tawp mai. A unaute rinchhan ber leh a nu leh pate tirhkah ber a ni a. Chhungkhat laina a tilawm thiam a, sum pawh a la lut thiam ber. Chhungkaw zangkhai tak dinpui a chakawm ngawt mai.

A naupang ber vethung hi. Duat rawn hlawh awm remg a ni. A hmel thain a nun a nem a. A awka leh zel pawh a nem. Tleirawlho chuan ‘Ankanemi’ an tifiam hial a ni. A naupang ber na na na chuan duhsak a hlawh bik a. Hna leh tul pawimawh chi hrang hrangah awl a ni thin. In lam cheveltuah a tang deuh ber. Chuvang pawh chu ni fahming, a tituai a nalh ni. A naupan laia a pangchan thin em vang nge ni, puipunna leh thiltihhonaah hian a kimki deuh thin niin a lang a. Chu tak chu tlangvalte rilru latu a ni lawi si. Thil dangah a ute angin chungchuanna nei lo mah se a nungchang a mawi a, a hmel a thain a aw a mawi a, a tawngkam a nem bawk. Tu nge ngaina lo awm ang. Mi tih ang apiang ti vek kher lo mah se a rual pawl tawka awm dan chu a thiam ve tho va. Mi huatzawng a sawi lo va, mi a hmusit ngai lo bawk. Amah a zahzum deuh avangin mi dangte a chaldelh ngai lo. Engpawh chu ni se, ‘nu hnap’ duh tan chuan pan vang vang chi maw le.

Kan thenawmte hian fapa nei lo mah se, an inlengte atang hian makpa tha tak tak an nei dawn tih a chiang a. Chhungkaw hlim tak leh duhawm tak chu an ni zel phawt ang le. Nula, a tu ang ber hi nge i nih? Tlangval, tu ber hi nge nupuia i duh?

Thulakna: Thalai Entu, October 2010

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E