Hringlang Tlang Hi Khawiah Nge?

26/08/2010 15:35

- B.Zaliana , Bethlehem Veng

Thu dik zawng zawng hi sawi vek tul lo a awm thin angin, remchang hriat zawng zawng hi tih vek a tul lo thin. Kan pi pute sulhnu hi kan remchang hriat luatah kan tidava ang a, nuihzat burah kan la chhuak ang tih pawh a hlauhawm hlel ta love. Kan pi pute thlarau khawvel leh mitthi panna kawng an lo rindan hi chhui tham tak a ni. Kan Mizo thawnthua Lalruanga leh Johana te, Thlanrawkpa khuangchawi leh Lal Isua thawhleha a thlan ruak ta (thlanruakpa?) te, Pangpuielhtliaka leh Samsona leh thimzing leh kan Lal Isua thiha khawvel lo thim ta te, mitthi kawtchhuaha Pawla leh Tirhkoh Paula te.

Mitthi khua leh Pialral hi khawiahnge an awm? Thlarau lam thil hi mihring mita hmuh theih loh, rinna leh beiseina a ni. Hringlangtlang, Hawilopar leh Lunglohtui te hi thlarauin mitthi khua an panna kawnga an thil tawnte an ni a, he khawvela awm lo, mita hmuh chi loh an ni. Engtik atangin nge, tuin nge hawilopar pawh hi an hming lo chher ang. Kan pi pute mitthi thlarau tawn hawilopar kha suangluahna, thlarau thil a ni. Hetianga pi pu sulhnu leh ro thil, a bik taka an thlarau chenna tur leh an thil tawnte hi mitthite kalna tingaihnawmtu, ti hlutu, ti lunglengtu leh mitthi ngaih ti nuama hnemtu a ni a. Kristian nih hma pawha hlaa an lo chawi te an ni a. Kristian nih hnu pawhin Lunglohtui leh Hawilopar hi hla phuah thiamten mitthi ngaihna leh Vanram ngaihna kaihkepin thiam tak leh lunglen thlak takin an phuahzui ta zel a, an hlu hle a ni.

Enga, engnge ti te leh ziange, ziangha (Zahhau tawng a ni a, enga, enge tihna a ni) hmang, thlarau chuan Rihdil an pal tlang a, zeithla/ zeie/ zeihme (Pawi/ Lai tawng a ni a, enga, engnge tihna a ni) hmang thlarau chuan Zinghmuh tlang an paltlang ziah thin an ti.

Zinghmuh tlang hi Chin Hill ram, Lentlang, Ramthlo leh Chhunchung khaw ki, ft. 6000 zeta sânga awm, tlang chhip zum pali awmtlang rual, phui bawh ram, a thing awmte pawh khât tak tak, tawi buk nalh tak tak an ni a, tui pawh fim tha tak a awm a, tlang dangdai tak a ni. Rihdil atanga chhim lam, kea ni hnih leh chawhma kala hlaa awm a ni a, Lurh tlang atangin a lang paw vo a ni. Zinghmuh tlanga thing, kawngthleng velah thlarau kut vawnna a bel phei han an ti.

Buannel hi Lentlang, Rihdil atanga chhim lam, Rihdil atanga chawhma zet kala awm, Vutbuak leh Vunluah khaw chung (tlak lamah) an awm a, chhuah lam Lentlang pang liamah Kaptel (Paihte khua) a awm bawk. Tlangchhipa awme ti lovin hmun nuam leh rai tha tak, tlangbawk mum te tak te te, phul buk ram buk, a thing awm chhun te pawh buk hniam te te, khât tak tak an ni. Luite fim tha tak, kawi nalh takin phai zawla luang ang maiin a luang del del a, a kamah chuan dum pangparten an cheimawi hle a, tuten emaw hawilopar an tih takte a par vul mawi hle a. Chhawkhlei parvar leh Keifang te a tam hle. Nipui lai pawhin a vawt nuam reng a, thlifim a tleh heuh heuh reng a, Thla eng hi a mawi bik a, Honolulu an tih aiin a hmun hi a nuam hial awm e. "Nula leh tlangval inngaizawng hauh lo pawh, he hmunah hian darkar chanve pawh awmdun se an inngaizawng hman ngei ngei a ni," an ti.

Pu J.H.Rosanga, Champhai Zotlang-in 'Khawiahnge Hringlang Tlang a awm? tih Vanglaini ni 24.7.2010-a a ziak hi ka thlawp a ni. Kan thil chhut hi uluk a tul rualin fimkhur a tha, nakinah chuan Lunglohtui te, Pawla thutna leh a Sairawkherh leh Saihlum keh themte kan la hmu lovang tih a rinawm rum rum e. Hringlang Tlang chu thlarau tlang, Lunglohtui chu thlarau tui in, Hawilopar chu thlarau pangpar tawn a ni mai.

Thulakna: Vanglaini

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E