Hmeichhia An Kawlhrawng Lua Em?

13/10/2010 01:37
- D.R.Zirliana

Mizoram atanga nula pathum/pali chu Goa-ah beauty parlour hna thawk (zir) turin an kal a, mahse, beauty parlour hna ni lovin nawhchizawrh hna a lo ni si a, an thawk duh lo a, eng tin tin emaw chhanchhuah an ni tih thu han hriat hian a thawn chhuaktute chu an va tizia lo em, an va huatthlala em mi tamtakin an ti ngei ang. A huatthlala a, hetianga dawta mite bum chhuak a, hla tekhuaah, ram dangahte hial pawh thawn chhuak a, an duh loh tawp hna thawk lo thei loa siam (tantir) emaw, anmahni hmuna hawng leh thei loa siam a, dinhmun tha lo taka mite dah hi sual, dan bawhchhiatna (immoral human trafficking) a ni a. Hetiang hi Mizoram atangin sawi tur a awm ve ta zauh zauh a, fimkhur a tul hle a ni.


Mizo thalaite hian Vairengte leh Saiha inkarah ringawt hna an zawng tur a ni lo a, an hna zawnna leh an khaw hawi an tizau tur a ni tih hi infuihna thu pawimawhtak a ni. A bikin lehkhathiamte an ni deuh bikawm e. Tin, lehkhathiam lote pawhin sipai leh police-ahte, ram pawn lam thlenga hna zawnna chang hre turin infuih thin a ni. India ram leh khawvel hmun hrang hrangah Mizo hna thawka awm hmuh tur awm ta se, changkanna pakhata ngaih mai tur niawm tak a ni.


Amaherawhchu, hetianga hna zawnna kawngah hian fimkhur erawh a ngai hle tih a lang. Kolkata-ah in (construction) sakna hmunah Mizo labourer tamtak mai hmuh tur awm ta se, a chhuanawm loh hle ang a, Goa-ah Mizo hmeichhia eng emawzat nawhchizuar awm ta se, a chhuanawm loh hle bawk ang. Chuvangin Mizoram pawn lama hna zawng turte pawhin hna zahawm deuh chin zawn ni thei ta sela.


Tin, Mizoramah pawh hna thawk tha peih lo tan hmun dangah thawk peih loa hlawh hmuhna leh hlawkna a awm lo tih hi hriatreng a pawimawh hle. Mizoramah hian taima leh thawk peih tan chuan ei hmuh hi a la awlsamber zawk mai thei a ni. A bikin labourer tur phei chu Mizoram pawn atanga lakluh emaw, Mizoram pawn atangin Mizoram an rawn pan zawk a ni..
Mizoram pawn lama hna zawng turte hian an fimkhur a ngai hle. Tuna Mizo nula thenkhatten Goa-a an tawn (tawh) ang hi tawh theih a ni tih a bikin hmeichhiate chuan hriatnawn fo tur a ni. Chuvangin, thil hi tawng basa ngam tur a ni lo. Mizo hmeichhiate hi mipate aimahin hetiang lamah hian an kawlhrawng emaw tih mai tur a ni ta. Hei hi thil tha nge, tha lo ngaihtuah tham tak a ni. Mizo hmeichhiate hi an vak nasa lutuk em tihte pawh hi ngaihtuah tham tak a ni.


Tin, mi tuten emaw Mizoramah emaw hmun dangah emaw hnathawh tur hna an zawng a, anmahni thuin an zalenna a nih angin an kal mai a, tumah pawh an rawn lem lo a, an veng YMA pawh an rawn lem lo. An duh vang reng pawhin eng hna pawh lo thawk ta se, hnam mualphona leh hnam mawina nge, anmahni mimal mawina? Hnam aiawhin an kal em?


Harsatna an tawh chuan tanpui tur, chhanchhuah an ngaih chuan chhanchhuah tur a ni ngei a, mahse, eng emaw hmingchhiatna an lo neih changa hnam timualpho han tih chiam chiam ang hi chu, hnam aiawh an ni lem lo a, hnam aiawha kal leh tirh pawh an ni lo a ni.


Chutichuan, hna zawnna tihzauh tur. Mahse, fimkhur tur. Thil hi basa ngam loh tur, bawh huam huam loh tur. Mizoramah pawh hna thawk tha peih lo tan hmun dangah thawk loa hlawh hmuhna a awm chuang lo. Hmeichhiate hi kawlhrawng lutuk lo se, vir ruai lo deuh se, chutih rual chuan rilru zau zawk puin miin a duh reng vangin eng hna pawh khawi hmunah pawh lo thawk se, a zalenna a lawm tih mai theih hi a tul ta niin a lang.

Thulakna: Mizo Aw

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E