HMANGAIHNA

06/09/2010 08:42

- Vanneihtluanga

Nupui pasala in siam tur hian palai kaltlanga ‘inrem’ mai theih a ni. Tunlai chuan, hmangaihna kan dah langsar a, inneihna hi hmangaihte chauh tih tur angin kan lantir lek lek. Mahse siamtu remruat dan hi a lo famkim khawp mai a, inhmangaih taka inneite ang thovin a sawia sawi remte hlei hlei hi an inkawp rem ve tho mai. Chuvangin, hmangaihna “experience” piantharna  ang deuh a ni a, nun chhungril puanchhuahna a nih a vangin, kan mizia leh min nek tu boruak leh kan kawppuite mizia a zirin kan “testimony” pawh hi a inang vek thei lo a ni.

A tira nep tak, khuareia zual zel a, chhenfakawm tawlh tawlh a awm. Tuna I ngaihzawng leh I khawppui kha tunah tak chuan I ngaihlu lo mai thei. Amah aia tha pawh tamtak awmin I hre mai thei. Mahse, nikhua han rei sela I lo tawng hlauh kha vannei I inti telh telh ang a, amah aia tha nia I hriatte kha an lo tha bik hauh lo a ni tih I hmuchhuak ve thei tho. Engemaw chenah “Hmangaihna” han ti chiam thin mah ila, ‘risk’ a ni. Risk tur chuan dinhmun derthawnga indah hmasak loh theih loh  a ni.

Rei tak lo innei tawhte hnena zawhna an zawh thin chu, “Bul tan that leh theih ni se, tuna I kawppui hi I nei ang em?” tih hi a ni. “Nei ang” tia chhangtu zat ve lai hi chu mahni kawppuite rilru tihnat hlauh vanga hetianga chhang an ni an ti lehzel. Chhanna tam tak leh dik em em mai chu, “Ka hre lo!” tih hi a ni. Huaisen taka “Nei lo vang!” ti ngam chin tawh hi chu chhungkaw bawraw tak emaw, a tuk lawka inthen tho tho tur emaw an ni duh khawp mai an ti bawk. Heng zawng zawngah hian, “In inhmangaih em?” tih zawhna tawite hi a laimu dik tak chu a ni zawk.

Mi Pahnih Inkar

Hmangaihna buaithlakna lai ber chu, mahni chauha chin fel theih a nih lohna lai tak hi a ni. Nangmah chauh i inngaihtuah thei lo va, i kawppui chuan amah i hlauthawng ang chiah khan a hlauthawng ve tho che. “Ka hmangaih che” i tih khan, i ti tak tak em tih a hre ngawt thei lo. Finfiahna te pawh a duh ang. Mahse love letter hmanga finfiah theih a ni lo va, saruaka mut dun rual a finfiah chi pawh a ni lo va, sum leh rangkachaka finfiah chi pawh a ni lo.

Atchilh nge Hmangaih?

A tira nasa tak, a hnua zuai leh deuhte pawh a awm. Duh luat vangin i mu thei lo va, i chaw ei a tui sawt loh leh i ei tui hlei thei lo va, amah hmu lovin ni khat chauh pawh awm har i ti a, i ngaihtuahna zawng zawng a nei vek a, i thawmhnaw inbel leh i rimrui in chulh thlengin nangma tan a ni lo; i duh ber tan vek a ni. Chuti khawpin atchilh mah la, i hmangaih tak tak em le? Khawvelah hian chutiang khawpa Brat Pitt atchilhtu nula singtel an awm a, chutiang khawpa Lindsey Lohan atchilhtu tlangval singtel an awm a sin! An hmangaih tak tak ang em? Atchilh hi hmangaih tihna a ni chuang lo.

Hmel, zeizia, kimtlang leh talent te hi atchilh theih a ni. Mahse, hmangaih theih a ni lo. A hmel tha lai takah savawmin a seh thei, zei tak hi an zeng thut thei, zaithiam hrawk a cancer thei, tumah hian hmabak kan hre lawk lo. Dik tak chuan, tunlai hian, nulaten, “Tlangval rau rauvah, min chawm zo ngei tur..” tih piah lamah, in leh lo nei, car leh rawngkachak nei, officer…pastor… kan ti. Hmangaihna a ni tak tak em? Nangmah chawm zo ngei tur ni a i ngaih hian nangmah bakah hmei pathum dang a chawm zo mai thei. Car leh rangkachak bakah I pasal khawlai fa I pawm tel thei, officer eiruk ching nen thlan khatah an zalh thei che. Pastor chapo zet, pawn lama thlarau mi em em, chhungrila piangthar si lo tih nang chauhin i hriatpui nen kumkhuain, Kristian chhungkaw lemchangin Biak-in chhungah in fatu sek thei tho. Nulate pawh, hmeltha leh zei tak hi harsa zeta neiin, damchhungin nupui thik leh veng reng rengin mipa hian thatlai hun kan hmang liam thei. A tawpah, “A hmel chu a tha, a rilru erawh chu….!” tiin kan inthen mai thei. Sawi sen a ni lo.

 

Hmangaihna chuan thinlung a mamawh a, thinlung a zawng a, thinlung a hneh a, thinlung a fan chhuak thin. Pawn lama lang chhuak hi chu a tuamna mai mai a ni a, hmangaihna chuan thinlung a chen chilh a ni.

Eng anga thlarau mi pawh ni la, eng anga uluk pawhin kawppui zawng la, eng anga hausa leh ‘duh thing thei’ dinhmuna ding pawh ni la, nupa nun inhamtawng lo leh hrehawm em emin thlanmual thlengin i hun i hmang thei. Pawn lamah, “Kei zawng hei hi ka kross ve a nia!” ti vak vak duh suh. Mahni kawppuite relin buai buai duh suh. Thikthu tichhe thar chiam duh suh. Nangmah inbih chiang zawk teh.

I hmangaih tak tak em?

I kawppuiin a hmangaih leh hmangaih loh che chu thlanmual I thlen thlengin i hre chiah lo mai thei. Nupa inthla hlel tak nia lang, jubilee ropui tak hmanga chhungkaw duhawm tak dintute pawh hi an thlanlungah an rilru tak tak ziah tur ni ta sela, “A dam chhunga a kawppuiin a hmangaih tak tak leh tak tak loh hre lova tar kun thlenga hun hmang liamtu chuan, a rilru hahna thu chu vawikhat mah sawi chhuak lovin he thlan khurah hian a luhpui ta.”tia ziah tur an tam ang. Chutiang bawkin, “A dam chhunga a kawppui laka thiam taka hmangaihna lemchangtu chu, lemchan awm tawh lohna pialral pan turin hetah hian zalh a ni.”tia ziah turte pawh an awm nual ang.

I theihtawpa ulukin kawpui zawng la, i hmangaih ngei em tih nangma lamah chiang la, a hmangaih ngei che em tih pawh hiat tum ang che. Mahse finfiahna leh chhinchhiahna khermei tak ngiat kher suh. A HMANGAIH CHE EM? tih finfiah tuma nasa taka buai vak ai chuan, “I HMANGAIH EM?” tih hi finfiah tum zawk rawh. I finfiah theih hmaa rin hlelh chingmi i nih chuan nupui pasal nei lovin i leng tar mai ang. Piangthar lemchang kan tam dan  han en hian Pathian leh pastor hmaa thutiam tih mai maite hi chu, mizo society-ah chuan rinawmna fianfiahna a ni miah lo. A hmangaihna che hi chu i tan chaun ‘risk’ a ni. I hmangaihna erawh chu ‘risk’ a ni ve tur a ni lo. Enganga dinhmun hreawm leh harsa leh manganthlak pawh lo thleng se, in dinhmun a khirh zawh poh leh I hmangaihna a nasa tur a ni. 

Inpumpek Nun

Hmangaihna chu dawl zawra zawr inhuamna leh, chu dinhmuna inchiah tak tak ngamnaah chauh lo chuan a lang chhuak mawh khawp mai. Chu chu “Full Surrender” kan ti awm e. Thalaite hian sex hman dun theih hi full surrender a ni emaw kan ti a. A ni miah lo. Full surrender dik tak chu cancer hospital-a sam tla kawlh vek khawpa chemo-therapy hmanga i kawppui cancer vei an hem lai te, i kawppui chu dam chhunga zun leh ek thiarsak ngai tura dinhmun khirh taka dintir a nih laite leh, namen lova mualphona tawpkhawkin i khawppui a aikhirh laite hian a lo lang chhuak ang. Nang chu a hmangaih tak tak lo che a ni mai thei, kumtlaunga neih che a tum lo pawh a ni mai thei. Mahse, a mah chu nangmah zawk chuan i hmangaih tlata,  eng anga dinhmun khirh leh hreawmah pawh ding se, tuna a mawina leh ropuina zawng zawng chu hlihsak vekin awm pawh ni se,i hmangaihna chuan a khuh zawh vek chaun, mi vannei ber i ni. Tuna i ngaihzawng leh i kawppui kha chutiang khawp chuan i hmangaih em?

Nu pakhat chuan “ Ka pasal hi  a ler khawp mai a, kawppui dang a nei zut thin a. Amah ka hmangaih takzet a ni tih pawh hi a chungah ka lantir thei lo va, ka lantir pawhin a awih lo. Vanduaithlak takin natna khirh takin a tlakbuak a, chumi hun hreawm tak chu ka tan vanneihna a ni. Ka hmangaih tak tak a ni tih ka rilru leh thahrui zawng zawngin kan lantir theihna hun Pathianin min siamsak a, tuna a lo dam leh hnu hi chuan, ka hmangaih tak tak a ni tih a hrethiam a, a nun a dang ta daih mai,” tiin a sawi a ni. Ruhseh veiin khaw dur a hria ang mai hian, hmelthatna, pian nalhna leh nawmsakna te hian hun khirh hi an hlauvin hmachhawn an huphurh em em a. Hmangaihna erawh chuan a hmachhawn hun chu a khirh zawh poh leh tlanchhiatsan lovin a par mawina a lanchhuahtirna remchangah a hmang zawk thin.

 

Kristiante Hmangaihna

 

Pathian Fapa chuan a thut hmunah lei mihring min hmangaih thu sawi sela, Lalthutthleng Var nghawr dawt dawt khawpa uarin a ke per thum dup dup pawh ni sela, keini tan hriat thiam phak rual a ni lo. Tlawm thei ang bera a lo piangin, mualpho leh na thei ang bera min thih chilh hnuah pawh awih lo heti zat kan la awm tih hi i hre reng ang u. Hmangaih han neih mai hi chu a har lo. A lo dawngtu tan rin ngam a har ang bawkin, hriattir tumtu tan hriattir a har ngawt mai. “ I love you” tih thumal pathum lek hi hrilhfiah turin saruaka khuma mut ngawta inhrilhfiah mai chi a ni lo, saruaka kros-a zangphara thih thlenga inhuam a tul a ni. Lei mihring leh mihring inkarah hian chuti ema hmangaihna nasa chu a taka lantir a tul lo a nih pawhin, hetiang taka INHUAMNA tal hi chu kan hmangaihna sawi hian a huam tel tur ani.

Inenfiah fo rawh

He lemchanna khawvelah hian, vanduaithlak takin dinhmun harsa takah in lo ding palh ta a. Theihtawp chhuahin i khawppui i buaipui a, he zawhna chu a la tawp chuang lo. Tuna i buaipui lai ngei khan, eng vangin nge khati khan i buaipui? Mi rel i hlau. I khawppui a thih hunah ro khawm i duh. Amah leh a chhungte ngaiha mawi i zawng. I ai awh tur midang an awm lo… tih vel mai mai a ni lo maw? I hmangaih vang a ni tak tak em? I kawppuiin a hmangaih leh hmangaih loh che hi buaipui suh. Nangamah khan i hmangaih em? Hei hi a pawimawh lai ber chu a ni zel ang.

Hmangaihna hi hringnun lairil pawimawh tak a ni a. Vawikhata hrilhfiah fel chi a ni lo va, a mei hi chheh nun reng a ngai. Min nektu thil hrang hrangin a lanchhuahdan a thlak a, kan kum upat ang zelin a danglam a, lanchhuahtir nan mitkhap kar lek hi a tawk chang a awm lain, nupa inhmangaih tuak duhawm takte tan chuan dam chhung nun hi hmangaihna zawng zawng lanchhuahtirna atan a tawi lutuk zawk a ni. Chu hmangaihna chu neia damchhunga nunpui turin he thuziak hian duhsakna a hlan a che.

Thulakna: Hringnun - I by Vanneihtluanga

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E