Condom nge Isua?

13/08/2010 17:12

- Lalngaihawma Khiangte

Kumin 2010 hian kan Kristianna chu kum 116-a upa a lo ni ve ta. A kum ngaihtuah chuan kan rinna hi chak âwm tak a nih laiin heti mai hi kan la ni si. Khawvêl lo changkâng zêlah sualna pawh a pung ve zêl a, damdawi lam thiamna a pun nasat poh leh tihdam harsa tak tak natna pawh a pung ve zêl dâwn.

HIV/AIDS natna hi natna tihbaiawm leh hlauhawm tak a ni tih chu mi tin hriat a ni. Natna kai awl ber leh invên awl ber kan ti châmchi a; kai chu kan hlau vek a, mahse invên erawh chu harsa kan ti theuh a nih hi. Chuti ni suh se hetiang zât zât AIDS vei hi kan awm nang!

Mihring mihrinna hmang chuan sual hi hneh zawh rual a ni lo. Kan theihna hmanga kan beih nasat poh leh a nghawng a na a, kan tlûknaah kan insawh na ting mai. MSACS ten theihtâwpin hna an thawk a, HIV/AIDS laka invênna kawng tam tak min hrilh. MSACS chuan AIDS laka invênna kawng thum a târlang a, chûngte chu :-

A: Abstinence (Insûmtheihna)
B: Be Faithful (Kawppui pakhata rinawmna)
C: Condom

A: Abstinence - Insûmtheihna hi thlarau rah a ni tih Bible-in min hrilh (Gal. 5:22 & 23), insûmtheihna nei tân chuan AIDS vei hi thil hlauhawm tak chu a ni lo rêng a ni. Amaherawhchu tunge mihring mihrinna hmanga insûm tluantling thei awm? Miin Pathian duh loh zâwng a ni tih a hriata Pathian zahna tak tak a neih chuan sual hi a ti thei ngai lo. Josefa pawh khan eng vânga Potiphara nupui kha mutpui lo nge a nih? Tunge sawi ang a, tunge hêk ang, lal upa min nupuiin a hum tlat dâwn alâwm. Mahse kha sual kha ti thei lo tûrin Pathian a tihna khân a hum tlat a, a tlânsan ngam mai a ni.

MSACS first stage hi a lang chuan a tha viau a, mahse a phênah hian thil kim lo a awm tlat. Kristian ram kan inti a, first stage-ah chuan Isua hi ni thei se, chu chuan stage dang zawng hi chu a fûnkim vek mai dâwn a ni. Chuti ni lova thil tha kan inzirtir ringawta thinlung lamah a tlâk si loh chuan a rah hmuh tûr a vâng thin. Mihring mihrinna atanga insûm tluantling thei hi zaa pakhat an awm pawhin kei zawng ka ring pha mawlh lo.

B: Be Faithful - Hei hi thil harsa niin lang lo mahse a rûka harsa tak a ni. Kawppui pakhata rinawmna hian rah duhawm tak a chhuah laiin mi zawng zawng hian kan damchhûng hian kawppui pakhat chauh kan nei thei si lo va, chu chu kan buaina chu a ni leh ta a ni. Tûna ka kawppui lakah hian rinawm viau ta ila, nakinah kawppui dang ka lo nei leh thei a; sex ka hman leh atanga AIDS lo kai ni ta ila, ka tân eng nge awmzia awm tawh chuang?

C: Condom - Stage A leh B hlawhtling lote tân a tâwpkhâwkah condom an dah a, loh theih loh chauha hman tûr tiin mi an zirtîr thin. Hei hian a tha lo zâwngin hna a thawk thei. Insûmtheihna kan tih zawng zawngte pawh hi a thaichhe thei tlat. A duh apiang tân a free-in condom a lâk theih a, hetiang a nih chuan stage A leh B hi mi tam takin an ngai zam thei tlat. Condom chuan zaah za vênghim lo mah se eng emaw chen chu a vênghim thei a, chuvangin mihring mihrinna hmanga lo insûm tang tang tân chuan kâwl a êng a ni hawt alâwm le!

AIDS vênna kawngah hian MSACS hian thawk tha viau mah se, HIV/AIDS hrik pai kan pung tulh tulh tho. Kumin June thla thlenga Mizoram statistic-ah chuan thisen test - 1,12,438; HIV/AIDS hrik pai mipa - 2,949 leh hmeichhia - 1,772; total - 4,721 kan ni. Hei hi a lêt sawma puntîr tûr a la ni lehnghâl! Sexual contact chu mi 2,977 an ni a, hei hi 63% a ni. Inenfiah kan ngai hle mai. Condom hi last stage-ah dah mah ila, kan kalphunga a lan dân hi chuan kan dah chungnung ber a ang zâwk mah. Signboard-ah te, pamphlet-ah te pawh kan hmu thin a, hêngte hi han zir han zir chuan insûmtheihna leh kawppui pakhata rinawm tih ai chuan condom bawk hi a langsâr ber chu a ni leh thin. Hei hian kan rinna chak lohzia chiang takin a târlang thei âwm e.

Condom hman hi a tâwpkhâwkah chuan kan dah ve tak na a, kan phalrai a ang riau. Pathian thuawih inti tân chuan condom hmang emaw hmang lo emaw pawh ni se, nupui pasal ni lova hmeichhiat mipatna hman hrim hrim hi sual a ni. Sual kan huaa kan pawisa dâwn a nih chuan condom hman pawh hi kan tizalên thei bîk lo vang.

Mi tam zâwk hi chuan condom hman hi sualah pawh kan ngai ta lo a ang hle. Kan taksa chhanhim mah ila, kan thlarau nun chhandam a nih si loh chuan ringtu kan intih ve ngawt hian eng nge awmzia a neih? MHIP-te paw’n Tiranga do beihpui nasa takin thlâk thin mah se, a eitute leh a zuartute thinlung an hneh hmasak phawt loh chuan do hneh a harsa ang. A zîk atanga sual hi do lovin a zung kan phawi hmasak phawt a ngai thin. Thinlung lam hneh hmasa ila, chutichuan tiranga ei suh, hmeichhiat mipatna hi hmang suh intih intih kan ngai lo vang maw le!

Kan tisa mai ni lo kan thlarau zâwk chhandama a awm theih nân hian kan buai zâwk tûr a ni. Condom hman hi eng ang pawhin phal raw sek sek, Pathian ringtu tân chuan “Engtin nge he sual lian tak hi tiin Pathian chungah thil ka tihsual theih ang?” tih hi kan tanchhan a la ni reng. Chuvangin sual hnehna tha ber chu Isua hi a ni. A thu hi zawm ila, kan him a ni mai. MSACS-te pawh ka han dem dâwn dâwn a, thahnemngaihna avang chauh a ni e. Kan thupui berah Isua hi dah ila, chuti chuan engkim mai hi a lo fel mai thin.

Thulakna: Vanglaini

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E