Chhura Fa Rep

09/09/2010 21:57
-L.KeiVom

Zote khua atangin hmanhmawh phelengin Champhai zawl chhim lam, Chawnchhim khaw thuta lungphun mak tak tak, CHHURA FA REP an tih mai chu kan va en a. He lungphunte zinga a sang ber hi a bung tawh naa, feet sawm deuhthawa sang a la nih ka ring, ka hmanhmawh êm avangin ka teh hman ta lo. Chu lungphunah chuan naupang lem, tûla thil tlar ang maiin a intlar diah mai a. Chung naupang lem hnuaiah chuan seki lem an ziak khat bawk a. Heng naupang lemte hi Chhura’n Phungpuinu fate a rêpa an sawi te kha niin an ring a, a seki lem pawh chu sekibuhchhuak ni thei awm tak mai hi a ni. He lungphek lehlamah hian ramsa hrang hrang lem a chuang bawk a, thangchhuah lungphun a nihzia entirna ni awm tak a ni.

Chhura fa rêp bulah hian lungphek lian ve tak, leia phah a awm a. Chu lungpheka thil ziak chu han bih thuak chuan hmeichhia ni awm takin a lang a, han en chian chuan tângtial ni thei awmin a lang bawk si a. Han ngaihtuah thuk lehzual chuan chhulin rah a chhuah hnem theihzia (sign of fertility) entirna ni awmin a lang bawk. Hengte hi minit tlemte chhunga ka hmuh dan a ni a, chhui fe ngai thil a ni. Heng thil chhuina tura zawhna awmte chu (i) Eng hunah nge heng lungte hi an ziah? (ii) Tute ziah nge (iii) Eng nge an ziah chhan leh an thu sawi duh? (iv) Lunga hetiang milem kerna tur hian eng hmanrua nge an hman? (v) Lungphunte hi a rama chengho hian engtik hunah nge an hmuh chhuah? (vi) Champhai leh a chhehvelah hetiang deuh lungphun hi a awm ve rêng rêng em?

Champhai-Aizawl 192 Kms. Vara’n kel min talh a, ei tawk atan a itawm hle. Zankhuaa ka kawchhunga indo pawl pawh kha ka lamtangho khan an ngam tak avangin inkah pawh an hai tawh a. Mahse, han ei teuh dawn ila, hmelma sipaiho tanpui emaw ka ni ang a, min rawn zut leh hrep ang tih ka hlauh avangin tlemte chauh ka ei a. Zanriah chu Delhi Curzon Road kohhrana kan membar chhuanawm tak lo ni thin Nl. Biaknungi’n Aizawlah a lo buatsaih dawn avangin, chu chu um zawk turin dar 12-ah Champhai ka chhuahsan ta a ni. Ka driver F. Vanlalmuana kha mawtor khalh a thiam bawk a, kalkawngah chuan lungmuang tak leh mumang nei khawpin ka muthlu a. Muana hi hawihhawm dan thiam em em, zuk leh in rêng rêng ti ve lo, tawngkam thiam tak mai a ni a; kan inkawm ngeihin kan inngai hman hle a ni. Muana te ang mi fel hian ram leh hnam an chawimawi nasa hle a ni.

Thulakna: Zoram Khawvel by L.Keivom

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E