Chhinchhiahna : Semi-Colon(;), Colon(:) Hman Dan

28/10/2010 00:57

Semi-Colon chu thu ziak kal mek laia thu dang hret emaw, a lehlam pang deih emaw kan sawi tawh tihkim leh belhchhah nana kan sawi zui dawn hian kan sawi tawh leh kan sawi zui tur daidan nana chhinchhiahna kan hman thin hi a ni. Comma aia rei hret chawlh tur chhinchhiahna a ni. A hman dante:

a) Semi-Colon hmanna tam ber chu kan thu sawi lai nena inzawmna nei, a sawi tum inkalh deuh si, conjunction zinga mahse, nimahsela, erawh chu, amaherawhchu, chutilochuan, thung tihte hman hma chiaha thu hlawm emaw, thu changkim ni tawh tho emaw tawpah hian a ni. Hetiang hian:
- Tun tum chu ka fail der mai; mahse ka la pass ve ngei ang.
- Khaute hian lal an nei lova; nimahsela a rualin an kal thin.
- I thian hi haw sela; nang erawh chu la awm rih teh.
- Hmangaihna hi engtikah mah a reh lo vang; amaherawhchu, thu hrilhnate hi awm mah sela, tihban a la ni ang.
- Mi tak tak nih i duh chuan nun kawng dik zawh la; chutilochuan mi naran i ni mai ang.
- A upa zawk chu Sikulah a kal a; a nau chu lovah a feh thung.

(b) Semi-Colon chu thu sawi mek nena inkalh ni chuang lo mah se, kan sawi tak chiah thu hlawm chu tichiang tur emaw, tikim tur emawa thu hlawm (clause) dang sawi belh dawnah hian dah tur a ni.
Hetiang hian:
- Delhi-ah chuan zu kal ta la, i tih tur chu tha takin zu ti la; tin, ka damdawi tur chu mi rawn hawn ang che.
- Sabengtung no chungah chuan an puante an phah a; tichuan a chungah Isua a chuang ta a.
- In leh lo kan han din ve phawt ang a; chutichuan nupui ka nei ang.
- Result a chhuak tih min hrilh a; chuvangin hman lo chungin ka lo kal a ni.
- I thu thuin awm kan duh e, i thu nunna a ni; Chuvangin min hre reng ang che, nangma mite kan ni.
- Thil paruk Lalpan a huat thin a awm a; a ni, pasarih a tenzawng tak a awm.

(c) Mi Pahnih aia tam an hming leh an nihna emaw, an awmna emaw kan ziah tlarin, an hmingah comma a awm zel a tul avangin an nihna emaw, an awmna emaw tawp zelah chuan semi-colon dah tur a ni.
- Ka thiante chu Lalmawia, LDC; Marema, B.A. III yr; Sangteii, Lunglei
leh Zotluangi, Sport mi takte an ni.

(d) Bible bung leh chang hran hran dah tlarin a inkarah semi-colon–a daidan zel tur a ni.
- Vawiina Thuhriltu Bible thu chhiar chu Mt. 28:16-20; Mk. 16:15-18; I Kor. 1:17; 9:16-18 te hi an ni.

Colon (:) :

Colon chu semi-colon aia rei deuh hret chawlhna tur chhinchhiahna a ni. Thu sawi tur tak sawi hmaa a huap zau zawk – a tlangpui emaw a kawhhmuhna emaw hmanga sawi hawnna tawpah dah a ni thin. A huap zau leh deuhvah phei chuan colon leh dash an hmang kawp thin.

Heng a hnuaia entirnaah hian colon chhinchhiahna awmna hma lama thu hi a tlangpui leh kawhhmuhna, a huap zau zawk chu a ni vek a; colon awmna hnu lam emaw nambar emawte hi a note, a thu laimu zawk chu a ni hlawm. Entirnate:

- Kan Sikul result chu hetiang hi a ni :
Exam zawng zawng: 33
Distinction: 2
First Division: 7
Second Division: 13
Third Division: 8
Fail: 3
Pass percentage: 90.1%

- Lalpa in Pathian chuan heti hian a ti:
In lei khek chu let ula, hling zingahte chi theh suh u.
- Heng hi kan zuar e:
High School Zirlaibu kim; Ball-pen tha chi; Exercise Book chi hrang hrang.
- Kum khatah hunpui pali a awm. Chungte chu: Nipui, Fur, Favang leh Thlasikte hi a ni.
- Chawk chhuak rawh: 20 + 8 – 17.
- Luka 15 : 11 – 31 hi I lo chhiar ang u.
- Pathianni chhun inkhawm hi dar 1:30 chiahah tan a ni deuh theuh.

Thu lakna :- Secondary School Mizo Grammer And Compostition

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E