Hmanah Lalpa mi huaisen, rinnaa fak hlawhte khan,
An van kawng an zawh laiin hahchawlhna hmu lo mah se;
Rinna lamtluang chhui zelin hmuh theih loh ram thlir chungin,
Beiseina sang tak nen chawlhna ram chu an pan.
Thunawn:
Chu khawpui chawlhna ram, Vanram mawiah chuan,
Hlimna chhimbal zam velah lawmna a par vul chiai e;
Chutah kan chawl tawh ang a, lei hreawm hnutiang chhawnin,
Thlen hlan ka nghakhlel thin chawlhna ram mawi tak chu.
Lalpa duhzawng ti-thinten, tahna ruam an zawh lai khan,
Tihduhdah hreawm tuarin khawvelin hmusit mah se;
Kross lamtluang chu zawh zelin an Pa duhzawng tizelin,
An chawl ta thlamuangin chawlhna ram mawiah chuan.
Lalpa buatsaih ramah chuan, chinghnia leh beram note,
Lungrual taka tual chain hlimin an lengza dawn si;
Kebai piangsual chanhaite lei lungngaih tuara rumte,
Lawmin an lam tawh ang chawlhna ram mawiah chuan.
Kan khualzinna ramah hian, lungngaih tahte tuar thinin,
Hmangaihte nen inthenin awmlai lunglian hrang mah se;
Hlimin kan tawk leh ngei ang lusun awm tawh loh naah,
Mittui a hul tawh ang chawlhna ram mawiah chuan.