CCC thukhawmin General Conference agenda thlifim: Corruption do ‘agenda’ tlang zo lo!

09/09/2010 00:51

Central YMA hnuaia thuneitu sang ber dawttu Central Coordination Committee chu vawiin(8.9.10) khan Central YMA Hall, Tuikhuahtlang-ah president Lal Chungnunga hoin an thukhawm a. October thlaa Lunglei-a YMA khawmpui lian lo awm tura thurel tur (agenda) thlifimin, Hmuifangtlang Group YMA atanga agenda lut, ‘Sorkarin corruption do kawngah tun aia nasa zawkin hma la rawh se,’ tih chu tlang lo zingah a tel.

CYMA khawmpui lian agenda thlitfimnaah hian khawmpuia chhawp-chhuah tura tlang zingah YMA khawih- Mizo hming hawha hnamdang sumdawngte titawp turin CYMA-in hma la se tihte, thing leh mau chereu zel tur ven nan kuang atan thingphel hmang tlem tur leh remchang dang hmang zawk tura hmalak te, National Highway 54 siamthat chungchangte leh YMA kalphung uar zawka inzirtir chungchang te a tel.

Sorkar khawih agenda chhawp-chhuah tura tlangte hi Mizoram mil tura Mizoram Drug Control Act siam rawt chungchang te, Reserve Bank of India phalna nei loa pung tamtak pek tiama mipuite sum lalut thinte khuahkhirhna dan khauh taka kenkawh chungchang te, Mizoram chhunga kawngpui hrang hrang siamtu contractor-te thawhah thuk zawka inrawlh tura sorkar ngen chungchangte leh halpuah leh halmawi kumtluana khap tura sorkara ngenna thlen chungchang te a tel bawk. Heng agenda te hi khawmpui lianah palai ten an la chai leh phawt dawn a ni.

Agenda thenkhat chu CEC bawhzui mek niin, agenda tura rawtna engemawzat chu CEC lo enzui tura dah a ni a. Chu’ng zingah chuan sorkar khawih, district tina High Power Committee din a nih theih nana hmalak chungchang te leh Mizoram State/International Boun-dary tichiang tura ke pen ve chung-chang te a tel.

Heng bakah hian CEC-ina tul anga a lo hma zui tura dah zingah sorkar agency-a YMA tanna thin tihtlem chungchang te, NLUP/BPL/AAY thlan dana YMA in sorkar a thawhpui dan ennawn chungchang te leh foreigner enkawl dan tur branch YMA kaihhruaina CYMA in siam se tihte a tel bawk a ni.

CYMA general secretary Lalbiakzuala’n CCC meeting hmasa leh tun tum meeting inkara hmalakna report pe in, kumpuan chungchangah May ni 29 atanga CADS din a nih atangin August ni 31, 2010 thleng khan ruihhlo ` 82,53,280/- hu man a nih tawh thu a tarlang a. Kohhran hrang hrang, tlawmngai pawl leh mimal thahnemngai te hnen atanga ruihhlo do hmalakna tanpuina tura sum dawn tlingkhawm tawh zat chu ` 6,38,650/- a ni, a ti.

CCC meeting vawi 63-naah hian Sub-Hqrs. YMA tinah ruihhlo do pawl Anti Drug/Narcotic Squad din vek a nih tawh thu leh theihtawp chhuaha hmalak mek a nih thu report a ni bawk a. Kum 2010-2011 kumpuan atan tuna kumpuan hman mek ‘Khawtlang Nun Siamthat’ tih leh ‘Ruihhlo Do’ tih rawtna a luh thu tarlan a ni bawk.

 

Thulakna: The Zozam Times

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E