BUNGKUS HI...

30/05/2010 17:24

Thuhmatheh

Tlem lai deuh khan (Tum khat chu) Mizoram atangin ram dang mi an hnawtchhuak chiam mai a.Khatih hun lai khan Kawlram atangin kan unau “Teddim” tia kan koh Paite ho hi Mizoramah an lut nasa  hle a ni awm a, chu chu  mawhphurhna neiho pawhin an hria a ni ngei ang, “Nang, ‘R’ han ti  teh,” an ti deuh kher thin a.Kan hriat theuh angin, Kawlrama “ Zomi / Teddim “ tia kan koh kan unau Paite-ho hian an hawrawp-ah “R” tih hi an nei ve lo a, chuvang chuan an lei-in “R” hi a lam fiah thei tlat lo a, “Al ” tiin a chhuak zel.Chutianga “R” an tihtir a, “Al ” tite chu an hnawtchhuak ta zel a, pa pakhat erawh, “Burma mi i ni em?” an han ti a, “Ni lo,” a ti  tlat a, “ A nih leh  ‘R’ han ti teh,” an tih lahin a sawi duh bawk si lova.Mawhphurtute thinrimin an khawng takngial dawn tihah an zinga pakhat chuan a tawp nan tiin a zawt nawn leh a, chutah chu Paite pa chuan beidawng tak mai hian, “Pute u, khawngaih takin ‘Vawk’ min tihtir zawk mai teh u”, a ti e an tia lawm!!!

Chutiang deuh chuan vawiina kan hun-tawng nen inmil thupui tha tak mai min sawi tir – “Bungkus Hi” tih hi kei ang tunlai kan hun-tawng um pha lo, mi hmanlai tan chuan thil harsa a ni a, kan sawi fiah zo lo ang tih a hlauhawm hle. Theih nise, “ Khawkhawm lai chuan...., Hmanlai chuan...., tih lam pang hawi hi min sawi tir zawk mai r’u” tih te ka chak khawp mai. Englekhawle, “Bungkus Hi” tih thupui hian min delh tawh miau si a, mahni thiam dan danin kan han chhim thal bekang puahpui phawng phawng phawt a ni ang chu(h)!

Thuhmahruai

“Bungkus ” chu enge?

Bungkus” tih hi Malay tawng a ni a, Sap tawnga “Parcel” kan tih nen hian a thuhmun. “Bungkus” chu Mizo tawnga kan sawi dawn chuan “Thil fun” tih a ni mai awm e.

Tuna kan thupui “Bungkus” tih erawh hi chuan “Thil fun” satliah lam aiin “ Nupui / Pasal fun” lam a kawk.Tin, “Bungkus” tih hi Mizo hla thu-a “Khuandim / Thlang khuandim” kan tih nen hian a inang thei dawn dawn.Nimahsela, vawiina kan thupui hi chuan tunlai kan hun-tawnga nupui / pasal kan inneih dan , la innel lutuk lo te,tun hma atanga inhmelhriat thin tawh te, la inhmelhriat ngai lem lote pawh hmun hla atanga nupui / pasal tur funa kan thiar nal nal ang hi a cho deuh bik a ni.

1.Engvangnge “Bungkus”?

He zawhna chhanna tha ber  chu, “Hun hi a danglam (vang) a , kan hun-tawngin min phut a ni” tih hi a ni.

England ram Computer zawrhna dawr pakhatah chuan, “I computer lei kha i lei ni atang khan a tunlai tawh lo nghal tih hria ang che,” tih hi an tar kuau mai an ti.Chu chuanin khawvel hmasawn chakzia leh hun danglam chakzia a tilang chiang hle.Khawvel finna leh thiamna thangchho zel leh hun danglam zel chu khawvel hnam hrang hrangte kawtkai-ah a chuang kai zel a.Chu chuanin hnam hrang hrang , society hrang hrangte ngaihdan , tihdan leh nun dan a ti-danglam mek zel a ni.

Miin hun thar “ Modern Age (Hun changkang)” mai pawh ni tawh lo, “Post Modern Age (Hun changkang lutuk piah lam)” rama nunkhua an hman laia kum zabi 19-na vela lo tei leuh leuh ni thei bik hek lo – Keini Zofate pawh hun-tui-luangin min len tel mek zel a ni.Keini Kawlram Zofate hun-tawng hrang hrang pawh thlir kirin – Lo neih hun lai te, Sipai / police tan hun lai te, Mizoram lama sumdawn hun laite...adt . kan lo tawng tawh thin a nih kha.Vawiinah erawh khawvel ruala tlan ve thei turin fin-thiam / kut-thiam zirna kawng hrang hrangah hmasawn turin, intodelhna tur kawng hrang hrangah te leh thil dang dang ti turin emaw, beisei-in emaw, a theih ang angin hmasawn kan tum a, hmun hrang hrangah kan fehchhuak mek zel a ni.Keini vawiina Malaysia-a Refugee ngeite pawh hi kan hun-tawngin min phut angin, beisei nei ranin Malaysia hi kan kal hlawm a ni.Hetiang hian hmun hrang hranga awm Zofate  kan vak darh mek zel a ni.A chhan chu hun a danglam vang a ni.Tun hma angin chhungkua leh thenrual lungduh kima mahni inchhungkhur / mahni khuaa chen khawm luih luih ang te kha  a theih tawh loh.La theih tehreng pawh ni sela, a tunlai tawh lo.Tunlai hunah zawng, “Ka u / ka nau / ka pa / ka nu /... chulai hmun / chulai khua / chulai ram...-ah chuan lehkha zirin / hna thawkin /... a awm a, ka phone lawk dawn / ka email lawk dawn /...” tih hun a lo ni ta. Kan kalsan tak kan veng te thlir kir mah ila, mahni ina member kima awm khawm luih luih chhungkua reng reng chhungkaw changkang tak an ni lo deuh zel ang.

Khawvel finna leh thiamna changkang tak mai chuan khawvel hi khawte tak te angah chantirin khawvel hmun hrang hranga awmte min hnuk khawm a.Europe khawmuala thil thleng chu minute reilote hnu-ah emaw, a thlen lai la la-in emaw kan lo hmu-in ka lo hre ve nghal zel ta mai a. Khawvel kil khawr ber bera awmte nen pawh kan titi dun vel ta mai mai thei ta a,hmel la hmuh ngai loh hmun hlaa awmte nen pawh thian kan lo ni a, kan lo inhmelhriat ta zel a nih hi.

Pathianin a din tirh atang renga nupui / pasal nei tura a lo duan hringfate, tunlaia nupui / pasal an inzawn dan, an inneih danah pawh  tunlai hun-tawngin a hrinchhuah hun-tui-luangin a len dan ang anga hman a lo ni chho ta.Nula leh tlangvalte tunlai changkanna hmangin an indawr a, hmelhriat thang an ni emaw, inhmelhriatchawp an ni emaw, an inbe rem a, induh takin an innei mai.Kan nulate hmun dang atangin an rawn thiar bo zeuh zeuh mek zel.Tlangvalte pawhin hmun danga awm nulate an thiar ve mek bawk.Hei hian a entir chu,hun hi a danglam a, kan nula leh tlangvalte hian tun hma angin inrim tlut tlutna hun an nei tawh lo emaw, inrim tlut tlut theihna hmunah an awm tawh lo , tih a ni.

Tunlai kan hun-tawng hi thlir thiam a pawimawh a, chumi zir zela kan ngaihdan hluite pawh her rem ve zel a tulna tam tak a awm thin. Tunah pawh Zarkawt Veng leh Laipuitlang chuan hlawhfa la-in thlan an laihtir tawh.Chu chu an tlawmngaih loh vang emaw, an duh vang emaw lam ni lovin, hun-in a hrinchhuah a ni.Tun hma angin thalai zawng zawng mahni khua-ah an awm kim vek tawh lo.Tun hma angin pum khat chhuak hriamhrei hmangin lo an thlo vek tawh lo.Hun inang lo tak tak leh hmun hrang hrangah hna dang dang thawk an ni a, hna atanga chawlh dawn chuan chawlkar khat vel emaw atanga Office-ah dilna lehkha theh luh lawk tulte pawh an awm ngei ang.Chumi avang chuan tha lamah tlawmngai thei lo mah ila, sum zawngin kan la tlawmngai thei tiin hlawhfa an la mai a ni.Chu pawh chu Mizo tlawmngaihna dik tak tho a ni a, hun mila her rem a tul anga tih mai a ni.Hetiang deuh hian ngaihdan hlui leh tih dan hlui sawh sawn tulna hian Zofate hi min bawm zel dawn.Tunlaia kan tawng “ In-Bungkus” pawh hi kan pawm thiam a tha hle ang. 

 

2.Bungkus leh Hmangaihna

Hmangaihna awmzia hi chi hrang hranga hrilhfiah a ni thin. Tunah hian sawi dawn ta ila, Chhura thawnthu sawi anga tawp hlei thei lova sawi tur a awm thei ngei ang.Hrilhfiah dan hrang hrang zingah tun laia mi tam takin an pawm mithiam rualte hrilhfiahna hi a pawmawm hle. Kan hun-tawng nen pawh a inmil hle.

Tunlai mithiamte chuan, “Love is action (Hmangaihna hi thil tih a ni),” an ti.A hrilhfiahna-ah chuan, “Mipa leh hmeichhia inkara hmangaihna hi thil tih / chezia / nungchang atanga lo thangchho zel a ni” tih a ni.A awmzia chu nula leh tlangval inhmangaihna lo pianchhuahna hi thil tih a ni a, tin , nupa inkara hmangaihna lo pianchhuahna leh lo pun zual zelna pawh thil tih a ni, tihna a ni.Chuvangin nupa inkar hmangaihna lo nghet zual deuh deuh tur chuan thil tih hmanga kan inlem tawn reng hi a tul dawn a lo ni.Nupui duh-zawnga awm thiam te, pasal duh-zawnga awm thiam te,inpuih tawn thiam te, intihlungawi tawn dan thiamte leh adt. hi a pawimawh hle ang.

Hei tunlai hian Internet lamah nupui / pasal inzawna Website a tam hle mai a.Kei pawh hmun khatah chuan ka invawrh chhuak ve nghe nghe.Hetiang atanga inzawng hmu a, innei ta pawh  an tam hle a ni.Tin, kan hun-tawngah chanchinbu leh ilo-a mahni leh mahni intlangzarha nupui tur zawng, pasal tur zawng pawh an awm nuk. “ Ka hming chu chumi khami, kum..., duh-zawng...,ngainat-zawng...,tui-zawng...,adt.” tiin an tarchhuak mai thin.Chutiang atang pawh chuan mi tam takin nupui / pasal an nei.Chutiang hun te chu keini Mizote pawh hian kan rap chho tan ta niin a lang.

Hmanni khan “ Love Before First Sight (Intawn hma hmangaihna)” tih Article ka ziak a, Facebook-ah ka theh chhuak alawm. Chhanletna ka dawng nasa ngei mai.Min chhanglettu zawng zawngin, “Intawn hma hmangaihna” a awm theih an ring a, an zavai-in hmeichhia an ni nghe nghe!

Tunlai hian intawn hnu-ah kan innei emaw, intawnhma-in kan innei a ni emaw,Bungkus-in kan innei a ni emaw, engpawh chu lo ni sek sek sela,kan induha kan innei a nih kha a tha a, nupa kan nih hnu-ah pawh induh zual deuh deuha inhmangaih zual zel a pawimawh.Chumi atan chuan pakhat leh pakhat thiltih hmanga in-tihlungawi tawn a pawimawh hle a ni.Keini Kristiante ngat phei chu kan nupui leh pasalte mai ni lo, mi zawng zawng hmangaih tura phut kan nih kha inhria ila.In-Bungkus leh Hmangaihna hi insualtir chi a ni lem lo.

3.Fimkhur a tul

Bungkus hi tunlai kan hun-tawngin a hrinchhuah a ni kan tih laiin, in-Bungkus tur chuan fimkhur hle a tul a, chu’ng zinga a pawimawh zual pathumte chu he’ngte hi an ni  awm e:-

(1)         Kristian ngei neih a tha.

(2)         Mahni hnam , Zo hnahthlak ngei neih theih a tha.

(3)         Mahni kawppui turte chanchin leh mizia hriat lawk  a tha.

(4)                  Ui leh ar ang mai ni lova kawppui tur nghet tur zawn a tha.

Tlangkawmna

Mihringte hi kan lentlak a rual vek lo a,tunlaia nupui pasal kan inthiar nal nal “Bungkus” chungchangah pawh hian “A tha” ti leh “Tha lo” ti kan awm ngei ang.Tunlaia Bungkus-a inneih a tul chhan hi  kan hun-tawngin min phut vang a ni a.Kan duh emaw, duh lo emaw hun danglam zel hian nun hi a sawi danglam zel dawn a,keini dan theih a ni lo.Chu chu kan pawm thiam a pawimawh zel dawn.Hun inher danglam zel hian hringnun hi a chhe zawng leh a tha zawngin a nghawng nghir dawt dawt reng a.Chu hun danglamna-a chengte chuan kan chhia leh tha hriatna hmanga uluk taka thil kan chik a, kan tih thin a pawimawh takzet. “Bungkus” a that leh that loh thu-hlaah erawh, inhmangaih a, induh taka “in-bungkus nupate” atanga rawn  lang en chunga, mahni mimala thutlukna siam atan dah (h)rih phawt ila, a tha awm e.

Ka Lawm E

Lalchhanhima

30/5/10

 

*He thu hi Mizo Christian Fellowship , Kuala Lumpur inkhawm ( 30th May 2010)-a Lalchhanhima (Zotui Thiang) thusawi, a ngial a ngana ziak chhuah a ni.*

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E