Brig.T.Sailo Hnenah MIZO AWARD

20/04/2011 14:36

Brig. Thenphunga Sailo hnenah Mizo Award hmasa ber hlan a ni ta. He Mizo Award hlanna puala inkhawm Art & Culture Auditorium, Berawtlanga neihah, Mizoram Governor  Lt. Gen. MM Lakhera kut atangin, Brig. Thenphunga Sailo chuan Mizo Award trophy (No-pui) leh pawisa fai Rs. 100,000/- a dawng a ni.

Mizo Award hlantu Governor Lakhera chuan thu sawiin, chawimawi phute chawimawi nachang hriat te, mi chawimawi tlakte entawn nachang hriatte hi hnam changkang zia a ni, a ti a, Mizo Award hmasa ber dawngtu Brig. Thenphunga chu amah pawhin a mi ngaihsan, chawimawina dawng tur phu tak nia a hriat thu a sawi a, Mizo Award chu ruahman lawk anga nung reng turin duhsakna a hlan bawk.

Mizo Award dawngtu Brig. Thenphunga pawhin thu sawiin, amah aia phu zawk Mizote zingah a hmuh thu leh, chuti chunga he chawimawina a kut a lo thleng chu a lawm  takzet thu a sawi.

Vanglaini editor K Sapdanga chuan award an buatsaih dan leh buatsaih chhan sawiin, "Vanglaini hi duhsaktute zarah hma lam panin kum 30 zet a lo kal ve ta a, hetiang dinhmun thlentirtu mipuite tan hian, enge kan pek let theih hlu ber ni ang tih kan ngaihtuah fo a, a bul tanna atan, Mizo thangtharte'n ngaihsan tur dik an hriat a, entawn tur tha an neih theihna tur a nih beiseiin, Mizo la damlai zinga sulhnu nei tha, chawimawi tlak zawn chhuah a, chawimawi hi tha phawtin kan hria a,  Mizo Award buatsaih hi kan thlang a ni," a ti.

K Sapdanga chuan award dawng tur an thlan dan sawifiahin, "Nomination Committee din a ni phawt a, annni hian chawimawi phua an ngaih mi pasarih an chhawp chhuak a, chhawpchhuahte chanchin zir chiang a, award dawng tur mi pakhat thlang chhuaktu tur Selection Comittee siam a ni. Selection committee hian uluk taka an zir chian hnuah secret ballot-in award dawng tur hi thlang ta a ni," a ti a, Mizo Award neitu, sengsotu dik takte chu chanchinbu chhiartute leh man chawia thu chhuah thintute niin, Vanglaini chanchinbu chu a lo buaipuitu mai a nih thu a sawi a ni.

Inkhawm hi RK Lianzuala'n a kaihruai a, Mizo Award hi kum thum dana buatsaih tur a ni.

Mizo Award sem hma chaw­­hnu dar 4-6 khan A&C Auditorium-ah hian sawmbikten ZORAM TITI hun an hmang a, 'Zu' chungchang an ngaihdan an sawiho a ni. Zoram Titi programme hi kum tin buatsaih tum a ni tih he programme kaihruaitu Vanglaini Jt Editor Lalnghinglova Hmar chuan a sawi.

 

Mizo Award atana nominee leh an profile

20th April : C Pahlira
Politician hlui, C Pahlira hi Mizorama kawngpui sialtu langsar leh thawhhlawk a ni. Mizo Union Asst.Secretary bakah Ratu Constituency-ah MDC atan thlan tlin a ni tawh a, MDC Deputy Chairman nihna chawlh tawhin kum 1982-ah MLA a thlan tlin a ni bawk.
Aizawl, Lunglei, Kolasib, Champhai, Vairengte, Sairang leh Serchhip khawpui inkalpawhna kawng zawnchhuah te hi a hmalakna a ni a, Aizawl Sobji Market, Barabazar ami chu Assam Rifles-te nen inberemin tuna New Market hmunah hian a sawn thla a, a kuthnu lian tham hmuh tur thahnem tak a awm a, 'vision' a nei thain Central YMA pawhin a hnathawh that avangin a chawimawi tawh a ni.

C Rokhuma
Thu ziak mi, 'pianpui scientist' tih hial tling khawpa an sawi, vantlang tana mi tangkai C Rokhuma hi Central YMA president hlui a ni. Huan thlai enkawl lama mi tui tak a ni a, amah ngeiin a taka enchhinin thil thar a zir taima em em a,  Serthlum natna thlentu tihrehna atana RK Mixture Insecticide a siam chu a lar hle. Sazu chungchanga 'mithiam' ang hiala state pawn atang pawha an hriat C Rokuma hi pa thil chik mi leh chhinchhiah peih mi a ni a; kum 1992 khan vantlang tana a hnathawh that avangin Padma Shree hlan a ni.

Rev. HS Luaia
Zirtirtu hlui, Mission Worker hmingthang Rev. HS Luaia hi sakhaw rawngbawltu hlawhtling a nih piah lamah lehkha ziak mi a ni a, vantlang rawngbawltu tangkai a ni bawk. Mizorama remna leh muanna a awm theihna turin silai karah pawh huaisen takin ke a pen a, Mizoram chhim lama hun harsa kara mipuite thlamuantu huaisen a ni. Mizo tawnga Bible lehlin hna kum 11 chhung thawkin lehkhabu siam leh lehlin  13 vel a nei a, article 162 vel a ziak bawk.  Senate of Serampore College chuan kum 2000 khan Doctor of Divinity a hlan a, kum 2002 khan Padma Shree chawimawina a dawng bawk.

Lalhmingliana Saiawi
Mi dik leh eiru lo tia hriat lar Lalhmingliana Saiawi hian kum 1964-ah IAS a zawm a, Maharastra Cadre niin a hnathawhnaah dikna a tan tlat avangin fak a hlawh a, mi dik lote huat pawh a hlawh tel bawk.  A pension hnuah Maha­rashtra Administrative Tribunal (MAT) member leh Central Admi­nis­trative Tribunal (CAT) member a ni a, heng hunahte hian thil dik kaltlangpuitu a nih avangin a hmingthang a, a huaisen avangin fak a hlawh thin hle. Thuziak mi a ni tel bawk a, lehkhabu 15 a ziak tawh a, nitin chanchinbuah article thahnem tak a ziak tawh a, a thuziakah a huaisenin diklo nia a hriat chu hming hmerhin a ziak chhuak ngam mai thin.

Sangthankima

Fahrah, ruihhlo ngai leh rilru lama harsatna tawk tam takte pa Sangthankima hian kum 1988-a a pianthar atangin tun thlengin midangte tan a nun a hlan. Thutak Nunpuitu Team (TNT) a din a a, ruihhlo ngai an enkawl hi 11,000 chuang an ni tawh a, TNT atanga enkawl Missioanry a kal ta mi 23 an awm. Kum 1994 atangin fahrah a enkawl a tan a, fahrah 500 chuang a enkawl tawh a a, zirna sikul Class X thleng zirna tur TNT hmunpuiah an din a; Aizawl bakah Lunglei, Champhai leh kolasib-ah ruihhlo ngaite enkawlna tur in a din bawk.

Brig. T Sailo
Sailo Lal fapa lehkha thiam hmingthang |henphunga Sailo hian 1942-ah Second lieutenant in British Army a zawm a, sipaiah kum 32 tangin Mizo zinga Brigadier kan neih hmasak ber a ni. Sipai a chhuahsan hnuin Shillong-a inbenbel a awm a tum a; nimahsela Mizo mipuite auhna chhangin Mizormah a lo chhuak a, Human Rights pawl a din a, chu chu a hnuah Political party, People's Party a inletin he party president hi a ni a, Chief Minister a ni ta zel a ni. 'Visionary leader' tia an sawi thin a ni a, tun hnua Mizoram awm zel dan tur thlirin hmathlir thui tak a nei a ni.

Rev. Vanlalnghaka
Mizo fa zinga Pathian thu hriltu hmingthang bera chhal ngam Rev. Vanlalnghaka hi Mizote dik leh rinawm tura fuihtu, thinlung leh a taka thianghlim tura zirtirtu thawhlawk a ni. Lehkhathiam chungchuang a ni a, India rama MA z zawh hnuin Pathian kohna dawngin Melbourne College of Divinity-ah BD a zir zo a, India ram hmun hrang hrang bakah khawvel ram hrang hrang - USA, Canada, Ireland, England, New Zealand, Australia, Netherlands, Singapore, Pakistan, Sri Lanka leh Burma-ahte Pathian thu sawiin an sawm tawh a, USA leh Canada phei chu a fang chipchiar hle a, a rawngbawlna hmunpui bera chhal theih a ni. Krismas leh Kumthar vuakveta halpuah hal atthlakzia leh hrisel lohzia sawi uartu hmasa a ni a, tun thlenga rinawm taka Pathian rawngbawltu a ni.

Thulakna: Vanglaini

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E