BLFM nia insawi Tripura-a inpe te Mizoram sorkarin chhawmdawlna pe dawn lo

15/09/2010 20:07

 

Tunhnaia Mizoram state thenawm Tripura Kanchanpur-a Assam Rifles hnena inpe nia sawi, Bru Liberation Front of Mizoram anga inchhalte chu Mizoram sorkarin chhawmdawlna a pe dawn lo tih Home Minister R.Lalzirliana chuan a sawi.


Chief Minister awm loh avanga CM charge la mek Home Minister chuan tunhnai khan BLFM nia insawite inpekna Assam Rifles hotupa (Brigadier) lo kalin an hnenah BLFM mi leh sa nia insawimi 60 bawr vel an inpek thu leh heng mite hi Mizoram mi leh sa nia inchhalte an nih hlawm avangin Mizoram sorkarin chhawmdawlna a pe thei dawn em tih a rawn zawt niin a sawi.

Assam Rifles hotupa hnenah hian Mizoram sorkar chuan chhawmdawlna a pek dawn loh thu leh, Sinlung Peoples Liberation Army (SPLA) mi leh sa lo haw mi 63-te pawh chhawmdawlna pek an nih loh thu te a lo hrilh tih kan palai zawhna chhangin a sawi a. Mizoram mi leh sa an nih chuan nunphung pangngai zawh tura lokirin, Mizoram sorkarin New Land Use Policy (NLUP) a kalpui turah mi dang ang bawka tel thei an nih thu te ka lo hrilh a ni, home minister chuan a ti.

Mizoram-in chhawmdawlna a pe dawn lo a nih chuan sorkar laipui lamah lo buaipui (try) a tum thu AR hotupa in a sawi chungchangah Mizoram sorkar chuan lo dal a tum lo tih a hrilh thu leh hemi hnu hian AR lam hotute nen inbiakna an neih zui tawh loh thu a sawi bawk.

Thudawnna sawi danin Tripura Kanchanpur-a 14th Assam Rifles hnenah July ni 7, 2010 khan BLFM nia insawi mi 60 chuang hret chu ralthuam chi hrang hrang - AK 47, Rifle, Maniature, 9mm Pistol leh a mu te nen an inpe a. AR-a an inpek thu hi Kanchanpur SP te pawhin an hriatpui lo nia sawi a ni a, an inpek thu hi puanzar a awm lo hrim hrim nia hriat a ni bawk.

Hemi hnu, kar liamta September ni 9, 2010 khan BLFM mi leh sa nia inchhal 20 chu Kanchanpur-a AR te hnenah an ralthuam Bolt Action .22 pistol leh silai mu engemawzat nen an inpe niin media lam thlenga puanzar a ni thung.           

Heng mi 20 te hi commander invuah Apet Branto leh a hote, Bangladesh-a inkhuar a, heta tanga Mizoram hmun hrang hranga pawi khawihna chi hrang hranga inhnamhnawih tawh thin nia insawi an ni a. Inpe thar ni loin, July ni 17, 2010-a inpe tawhte zinga mi an ni mai thei tih sawi a awm.

Thudawnna pakhat sawi dan chuan Assam Rifles lam hian Bru Liberation Front of Mizoram hi Mizoram sorkar ngaihdanah chuan an awm tawh lo a, hman kuma mi 804 inpek hnu-ah BLFM chu awm tawh loa ngaih a ni a. Tunhnaia he pawl hming chhala inpe zinga tamtak chu Mizoram khua leh tui an ni loa sawi a ni bawk.

BFLM nia inchhal apiang Mizoram sorkarin a pawm zel chuan naktuk naktip lawkah midang an chhuak leh loh ang tih a sawi theih loh, BFLM chu an insurrender tawh avangin an awm tawh lo tihte, mi thenkhat, Mizoram sorkar dinhmun leh Bru mizia an hriat tawk loh avanga hetiang thil lo tuipui an awm leh thin tihte chu thil hrechiang intite sawi dan pakhat a ni.

Thulakna: The Zozam Times

 

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E